.jpg)
ទីតាំងអភិវឌ្ឍន៍ Naga3 នៅលើទីតាំងអតីត «ប៊ុលឌីងស»។ ហេង ជីវ័ន
ភ្នំពេញៈ NagaCorp ជាក្រុមហ៊ុនមេរបស់កាស៊ីណូ Naga World នៅកម្ពុជា និងចុះបញ្ជីនៅផ្សារហ៊ុនហុងកុងបានបង្ហាញចំណាប់អារម្មណ៍លើការអភិវឌ្ឍ រមណីយដ្ឋានរួមបញ្ជូលគ្នា (Integrated Resort-IR) នៅតំបន់ជាច្រើនរបស់ខេត្តសៀមរាប និងក្រុងព្រះសីហនុ។ នេះបើយោងតាមគេហទំព័រ GGRAsia។
គេហទំព័រ និងជាទីភ្នាក់ងារព័ត៌មាន GGRAsia បានរាយការណ៍ព័ត៌មានអំពីឧស្សាហកម្មកាស៊ីណូបានកត់សម្គាល់ថាពាក្យ «IR» ឬរមណីយដ្ឋានរួមបញ្ជូលគ្នា (IR) ត្រូវបានប្រើប្រាស់ជាធម្មតានៅក្នុងឧស្សាហកម្មភ្នាល់ល្បែងដើម្បីពណ៌នាកាស៊ីណូមានលក្ខណពិសេសទ្រង់ទ្រាយធំ ព្រមទាំងជាទីកន្លែងទេសចរណ៍ និងសន្និសីទផងដែរ។ ពាក្យនេះជួនកាលក៏ត្រូវបានគេប្រើប្រាស់ដើម្បីពណ៌នាពីរមណីយដ្ឋានមួយមានលក្ខណពិសេស ប៉ុន្តែមិនមានកាស៊ីណូ។
NagaCorp ដែលចុះបញ្ជីនៅផ្សារហ៊ុនហុងកុង មានសិទ្ធិផ្ដាច់មុខកាស៊ីណូរយៈពេលវែងនៅភ្នំពេញបានលើកឡើងពីគោលបំណងរបស់ខ្លួនពង្រីកទីផ្សារកម្ពុជានៅក្នុងលទ្ធផលបណ្ដោះអាសន្នដែលបានចេញផ្សាយកាលពីថ្ងៃព្រហស្បត៍។
ក្រុមហ៊ុននេះបញ្ជាក់ថា៖ «វាជាគោលបំណងរបស់ក្រុមហ៊ុនដែលត្រូវបានគេយល់ថា ជាក្រុមហ៊ុនអភិវឌ្ឍន៍រមណីយដ្ឋានរួមបញ្ចូលគ្នាមានលក្ខណៈទូលំទូលាយ និងប្រកបដោយគុណភាព ដែលសង្កត់ធ្ងន់លើប្រភពប្រាក់ចំណូលដែលមិនមែនជាការភ្នាល់ល្បែង»។
NagaCorp បានកត់សម្គាល់បន្ថែមទៀតថា៖ «វាជាគោលបំណងរបស់ក្រុមហ៊ុនក្នុងការស្វែងរកការអភិវឌ្ឍ IR ដែលសម្រេចបាន និងទទួលបានប្រាក់ចំណេញនៅតំបន់សៀមរាប និងក្រុងព្រះសីហនុ។ នៅពេលនោះយើងជឿជាក់ថា ក្រុមហ៊ុននេះនឹងទទួលបានទីតាំងឈរជើងជាក្រុមហ៊ុនអភិវឌ្ឍន៍ IR លំដាប់ពិភពលោកដែលមានលក្ខណៈជាយុទ្ធសាស្ដ្រ និងទូលំទូលាយដើម្បីជួយលើកកម្ពស់វិស័យទេសចរណ៍នៅកម្ពុជា»។
លោក ម៉ី វ៉ាន់ អគ្គនាយកនៃនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ ប្រាប់ភ្នំពេញប៉ុស្តិ៍កាលពីថ្ងៃចន្ទថា លោកមិនទទួលបានព័ត៌មានច្បាស់លាស់នោះទេ។
លោកថ្លែងថា៖ «ខ្ញុំអត់ដឹងរឿងនេះទេ។ ខ្ញុំមិនដឹងថាគេទទួលបានព័ត៌មានពីណានោះទេ។ នៅក្នុងច្បាប់យើងគេហាមបើកកាស៊ីណូនៅតំបន់អង្គរក្នុងខេត្តសៀមរាប ប៉ុន្តែបើក្រុមហ៊ុនចង់អភិវឌ្ឍរមណីយដ្ឋានចម្រុះត្រូវសុំអាជ្ញាប័ណ្ណពីក្រសួងទេសចរណ៍»។
លោក តុប សុភ័ក្រ អ្នកនាំពាក្យក្រសួងទេសចរណ៍ប្រាប់ភ្នំពេញប៉ុស្តិ៍ថា លោកក៏មិនទាន់ទទួលបានព័ត៌មាននេះទេ ប៉ុន្តែក្រសួងអាចពិចារណា ប្រសិនបើក្រុមហ៊ុននេះចង់វិនិយោគលើរមណីយដ្ឋានរួមបញ្ជូលគ្នា (IR) បម្រើដល់វិស័យទេសចរណ៍។
លោកថ្លែងថា៖ «ប្រសិនបើគាត់ចង់បើករមណីយដ្ឋានដែលមានសាលសន្និសីទគាត់ត្រូវចុះបញ្ជីនៅក្រសួងពាណិជ្ជកម្ម មុននឹងស្នើសុំអាជ្ញាប័ណ្ណពីក្រសួងទេសចរណ៍»។
ក្រុមហ៊ុន Nagacorp ដែលគ្រប់គ្រងកាស៊ីណូ Naga World ដែលទទួលបានអាជ្ញាប័ណ្ណតែមួយគត់របស់ទីក្រុងភ្នំពេញ បច្ចុប្បន្នកំពុងអភិវឌ្ឍន៍គម្រោង Naga3 មានតម្លៃ ៤ ពាន់លានដុល្លារនៅលើទីតាំងអតីត «ប៊ុលឌីងស» នៅសង្កាត់ទន្លេបាសាក់។
NagaCorp បានរាយការណ៍កាលពីថ្ងៃព្រហស្បតិ៍ទី ២៧ ខែសីហា ថា ក្រុមហ៊ុនបានរកប្រាក់ចំណេញសុទ្ធជាង ២០,៦ លានដុល្លារអាមេរិកនៅរយៈពេល ៦ ខែដំបូងឆ្នាំនេះ ដោយធ្លាក់ចុះ ៩១,៦ ភាគរយធៀបនឹងរយៈពេលដូចគ្នាកាលពីឆ្នាំមុនព្រោះវិបត្តិកូវីដ។ ចំណែកឯប្រាក់ចំណូលក៏បានធ្លាក់ចុះ ៥៧,៧ ភាគរយធៀបរយៈពេលដូចគ្នានៃឆ្នាំមុនមកត្រឹម ៣៧៧,៥ លានដុល្លារ៕LA
