.jpg)
លោក ជា ចាន់តូ ទេសាភិបាលធនាគារជាតិនៃកម្ពុជាថ្លែងនៅក្នុងពិធីប្រារព្ធខួបលើកទី ៤០ នៃការដាក់ឲ្យចរាចរប្រាក់រៀលឡើងវិញ។ ហ៊ាន រង្សី
ភ្នំពេញ: លោក ជា ចាន់តូ ទេសាភិបាលធនាគារជាតិនៃកម្ពុជា (NBC) បានថ្លែងថា កំណើនតម្រូវការប្រាក់រៀលមានការកើនឡើងជាលំដាប់ប្រកបដោយជំនឿទុកចិត្តពីសាធារណជន និងវិនិយោគិនក្នុងរយៈពេល ២ ទសវត្សរ៍ចុងក្រោយនេះ ដែលបានជួយជំរុញការអភិវឌ្ឍវិស័យធនាគារ និងហិរញ្ញវត្ថុ និងពង្រឹងភាពធន់នៃសេដ្ឋកិច្ច។
ការថ្លែងរបស់លោកត្រូវបានធ្វើឡើងក្នុងឱកាសប្រារព្ធខួបអនុស្សាវរីយ៍លើកទី ៤០ នៃការដាក់ឱ្យចរាចរប្រាក់រៀលឡើងវិញកាលពីថ្ងៃម្សិលមិញក្នុងរាជធានីភ្នំពេញ។
លោក ចាន់តូ ថ្លែងបន្តថា រដ្ឋាភិបាលកម្ពុជាបានសម្រេចដាក់ឱ្យប្រាក់រៀលចរាចរឡើងវិញនៅថ្ងៃទី ២០ ខែ មីនា ឆ្នាំ ១៩៨០ ដើម្បីបង្ហាញពីឯករាជភាពអធិបតេយ្យជាតិ និងបម្រើដល់ការស្តារអភិវឌ្ឍសេដ្ឋកិច្ច និងសង្គម ក្រោយពីរបប ប៉ុល ពតត្រូវបានបំផ្លិចបំផ្លាញមូលដ្ឋានគ្រឹះនៃហេដ្ឋារចនាសម្ព័ន្ធសេដ្ឋកិច្ច និងហិរញ្ញវត្ថុព្រមទាំងអគារនៃធនាគារជាតិនៃកម្ពុជា នៅពេលនោះក៏ត្រូវបានកម្ទេច ចោល ហើយប្រាក់រៀលក៏ត្រូវបានបោះបង់ចោលផងដែរ។
លោកបន្ថែមថាក្នុងរយៈពេល ២០ ឆ្នាំចុងក្រោយនេះ តម្រូវការប្រាក់រៀលបានកើនឡើងជាមធ្យមប្រមាណ ១៦ ភាគរយក្នុង ១ ឆ្នាំៗ។ ជាក់ស្តែង សេដ្ឋកិច្ច កម្ពុជាមានកំណើនជាមធ្យមប្រមាណ ៧,៨ ភាគរយ ជាមួយអត្រាអតិផរណាត្រូវបានរក្សាឱ្យស្ថិតក្នុងកម្រិតទាបប្រមាណ ២,៥ ភាគរយ ហើយប្រាក់រៀលមានស្ថិរភាពល្អប្រសើរក្នុងរង្វង់ ៤ ០៥០ រៀល ក្នុង ១ ដុល្លារ។
ការតាំងបង្ហាញក្រដាសប្រាក់រៀលក្នុងខួបលើកទី ៣៩ ក្នុងឆ្នាំ ២០១៩ ក្នុងផ្សារទំនើបអ៊ីអន។ហុង មិនា
លោកថ្លែងថា៖ «ខ្ញុំជឿជាក់យ៉ាងមុតមាំថា ក្រសួង ស្ថាប័នក្រុមហ៊ុន សហគ្រាស និងភាគីពាក់ព័ន្ធ និងប្រជាពលរដ្ឋទាំងអស់នឹងបន្តចូលរួមយ៉ាងសកម្មក្នុងដំណើរការអភិវឌ្ឍប្រព័ន្ធធនាគារ និងចូលរួមលើកកម្ពស់ការប្រើប្រាស់ប្រាក់រៀលដែលជារូបិយវត្ថុ ជាតិរបស់យើងទាំងអស់គ្នាឱ្យកាន់តែទូលំទូលាយ»។
លោកអះអាងថា ទុនបម្រុងអន្តរជាតិបានកើនឡើងដល់ ២០ ពាន់លានដុល្លារដែលអាចធានាការនាំចូលទំនិញ និងសេវានាគ្រាបន្ទាប់បានប្រមាណ ១០ ខែ ខ្ពស់ជាងកម្រិតអប្បបរមាចំនួន ៣ ខែសម្រាប់ប្រទេសកំពុងអភិវឌ្ឍន៍គឺកើនឡើងជាង ១០០ ដង។
លោកបន្ថែមថាជាមួយគ្នានេះ វិស័យធនាគារបានបន្តអភិវឌ្ឍប្រកបដោយភាពរឹងមាំ និងបានពង្រីកវិសាលភាពសេវាកម្មនៅទូទាំងប្រទេសដោយទ្រព្យសកម្មរបស់វិស័យធនាគារបានកើនឡើង ៩៣ ដង ឥណទានបានកើនឡើង ១៧៨ ដង និងប្រាក់បញ្ញើកើនឡើង ៩៥ ដង បើប្រៀបធៀបរវាងចុង និងដើមនៃ ២ ទសវត្សរ៍ចុងក្រោយនេះ។
លោកថា៖ «នៅចំពោះមុខស្ថិតក្នុងស្ថានភាពសេដ្ឋកិច្ចពិភពលោកដែលមានភាពមិនប្រាកដប្រជាខ្ពស់ជាមួយនឹងការរីកចម្រើននៃវិស័យសេដ្ឋកិច្ច និងហិរញ្ញវត្ថុកម្ពុជា យើងនៅមានបញ្ហាប្រឈម និងការងារជាច្រើនទៀតដែលត្រូវបន្តអនុវត្ត និងទាមទារនូវកិច្ចខិតខំប្រឹងប្រែងទាំងអស់គ្នាបន្ថែមទៀត ដើម្បីបន្តសម្រេចបាននូវប្រព័ន្ធធនាគារមួយប្រកបដោយប្រសិទ្ធភាពពិពិធកម្ម និងបរិយាប័ន្នសំដៅគាំទ្រចីរភាពនៃកំណើន បង្កើនចំណូលរបស់ប្រជាពលរដ្ឋ កាត់បន្ថយភាពក្រីក្រ និងលើកកម្ពស់សមាហរណកម្មសេដ្ឋកិច្ច និងហិរញ្ញវត្ថុក្នុងតំបន់»។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដាដែលជាធនាគារឈានមុខនៅកម្ពុជាបានកត់សម្គាល់ថា និន្នាការប្រើប្រាស់ប្រាក់រៀលកំពុងមានការកើនឡើងពី ១ ឆ្នាំទៅ ១ ឆ្នាំ។ ជាក់ស្តែង ធនាគារអេស៊ីលីដាបានផ្តល់ឥណទានដល់អតិថិជនជាប្រាក់រៀលជិត ១៥ ភាគរយនៃឥណទានសរុបជិត ៤ ពាន់លានដុល្លារ។
លោកថ្លែងថា៖ «ការជឿជាក់នៃការប្រើប្រាស់ប្រាក់រៀលនឹងកាន់តែកើនឡើង ដោយសារច្បាប់របស់ធនាគារជាតិ និងការគ្រប់គ្រងគោលនយោបាយរូបិយវត្ថុរបស់ជាតិធ្វើយ៉ាងណាឱ្យមានសេដ្ឋកិច្ចរីកលូតលាស់ប្រកបដោយចីរភាព និងគ្រប់គ្រងអតិផរណា។ ទាំងនេះធ្វើឱ្យប្រជាជន ពាណិជ្ជករមានភាពជឿជាក់លើប្រាក់រៀល»។
ដុល្លារូបនីយកម្មត្រូវបានហូរចូលមកក្នុងប្រព័ន្ធសេដ្ឋកិច្ចរបស់កម្ពុជានៅដើមទសវត្សរ៍ឆ្នាំ ១៩៩០ ក្នុងអំឡុងពេលដែលអង្គការសហប្រជាជាតិ (UNTAC) បានរៀបចំការបោះឆ្នោតសកលទូទាំងប្រទេស ដើម្បីបញ្ចប់សង្គ្រាមរុំារ៉ៃជាង ២ ទសវត្សរ៍។
ទោះបីជាយ៉ាងណា ក្រោមសេដ្ឋកិច្ចទីផ្សារ និងប្រព័ន្ធធនាគារពីរថ្នាក់ (Two-tier banking system) ប្រាក់រៀលបានចរាចរជាមួយនឹងប្រាក់ដុល្លារនៅក្នុងសេដ្ឋកិច្ចជាតិ។
លោក ជា ចាន់តូ បញ្ជាក់ថាក្នុងដំណាក់កាលដំបូង ប្រាក់ដុល្លារបានរួមចំណែកអភិវឌ្ឍសេដ្ឋកិច្ចកម្ពុជាតាមរយៈការជំរុញការវិនិយោគបរទេសវិស័យហិរញ្ញវត្ថុ ពាណិជ្ជកម្មអន្តរជាតិ និងទេសចរណ៍ ក៏ប៉ុន្តែក្នុងស្ថានភាពបច្ចុប្បន្ននៃទំហំសេដ្ឋកិច្ច និងហិរញ្ញវត្ថុកាន់តែកើនឡើងឥតឈប់ឈរ និងមានសមាហរណកម្មក្នុងតំបន់ខ្ពស់ ការប្រើប្រាស់ប្រាក់ដុល្លារអាមេរិកបានកំហិតលទ្ធភាពធនាគារកណ្តាលក្នុងការអនុវត្តឱ្យបានពេញលេញនូវគោលនយោបាយរូបិយវត្ថុដើម្បីគាំទ្រកំណើនសេដ្ឋកិច្ច និងទប់ទល់វិបត្តិ៕ LA
វីដេអូ៖
