ភ្នំពេញៈ ធនាគារជាតិនៃកម្ពុជា (NBC) កាលពីឆ្នាំ ២០១៨ បានប្រើប្រាស់ប្រាក់រៀលតិចជាងមុនដើម្បីទិញប្រាក់ដុល្លារអាមេរិក ខណៈអត្រាប្តូរប្រាក់រៀល ធៀបនឹងដុល្លារកាន់តែមានស្ថិរភាព។ នេះបើយោងតាមរបាយការណ៍ប្រចាំឆ្នាំរបស់ NBC។
ការយកប្រាក់រៀលកាន់តែតិចទៅទិញប្រាក់ដុល្លារនេះដោយសារ NBC មានឧបករណ៍គោលនយោបាយរូបិយវត្ថុថ្មីមួយ ដែលត្រូវបានប្រើប្រាស់ច្រើនជាងមុនពីប្រតិបត្តិករហិរញ្ញវត្ថុ។
នេះជាការវិវត្តល្អមួយសម្រាប់ធនាគារជាតិនៃកម្ពុជាក្នុងតួនាទីរក្សាស្ថិរភាពអត្រាប្តូរប្រាក់ ដោយសារថានាពេលកន្លងមក ធនាគារកណ្ដាលរបស់កម្ពុជាមួយនេះមានជម្រើសតិចតួចប៉ុណ្ណោះក្នុងការធ្វើគោលនយោបាយរូបិយវត្ថុរបស់ខ្លួន។ ដោយសារកម្ពុជាមានសេដ្ឋកិច្ចពឹងផ្អែកខ្លាំងលើប្រាក់ដុល្លារ នាពេលកន្លងមកការយកប្រាក់រៀលទៅទិញប្រាក់ដុល្លារដើម្បីរក្សាស្ថិរភាពអត្រាប្តូរប្រាក់គឺជាភារកិច្ចដ៏សំខាន់តែមួយគត់របស់ធនាគារកណ្ដាល។
យោងតាមរបាយការណ៍ប្រចាំឆ្នាំរបស់ NBC គិតចាប់ពីខែមករា ដល់ខែធ្នូឆ្នាំ ២០១៨ NBC បានយកប្រាក់រៀលទិញប្រាក់ដុល្លារអាមេរិក ដែលមានតម្លៃសរុប ៨៧៥ លានដុល្លារដើម្បីរក្សាស្ថិរភាពអត្រាប្តូរប្រាក់។ ទឹកប្រាក់នេះមានចំនួនតិចជាងទឹកប្រាក់កាលពីឆ្នាំ ២០១៧ ចំនួន ៩ ភាគរយ។ តាមរយៈការធ្វើអន្តរាគមន៍នេះ អត្រាប្តូរប្រាក់រៀលធៀបនឹងដុល្លារបានរក្សាស្ថិរភាពល្អប្រសើរ ដោយមានអត្រាជាមធ្យម ៤ ០៥០ រៀលក្នុង ១ ដុល្លារអាមេរិក។
យោងតាម NBC គ្រឹះស្ថានហិរញ្ញវត្ថុជាច្រើនរួមទាំង MFI នៅតែមានតម្រូវការប្រាក់រៀលច្រើនជាងមុន តែពួកគេបានថមថយសកម្មភាពនៃការទិញលក់ប្រាក់រៀលដោយផ្ទាល់ជាមួយ NBC។ នេះដោយសារប្រតិបត្តិករ MFI អាចទទួលបានប្រាក់រៀលពីឧបករណ៍គោលនយោបាយរូបិយវត្ថុថ្មីមួយទៀតរបស់ NBC នោះគឺការធ្វើប្រតិបត្តិការផ្តល់សន្ទនីយភាពប្រាក់រៀលដោយមានការធានា LPCO។
របាយការណ៍ NBC លើកឡើងថា៖ «កម្រិតខ្ពស់នៃដុល្លារូបនីយកម្មបានដាក់កំហិតលើប្រសិទ្ធភាពគោលនយោបាយរូបិយវត្ថុ និងបង្កើនភាពងាយរងគ្រោះចំពោះសេដ្ឋកិច្ច ដែលបណ្តាលមកពីការប៉ះទង្គិចនានា»។
របាយការណ៍បញ្ជាក់ថា៖ «ស្ថានភាពនេះទាមទារឲ្យកម្ពុជាមានឧបករណ៍គោលនយោបាយរូបិយវត្ថុដែលមានប្រសិទ្ធភាព ដើម្បីគាំទ្រកំណើននេះក៏ដូចជារក្សាស្ថិរភាពម៉ាក្រូសេដ្ឋកិច្ចឲ្យបានរឹងមាំ។ ក្នុងបរិការណ៍នេះ ការពង្រឹងតួនាទីប្រាក់រៀលមានសារៈសំខាន់ណាស់»។
ស្របពេលដែលទឹកប្រាក់ទិញ លក់ រៀល និងដុល្លារមានការធ្លាក់ចុះ ទឹកប្រាក់ដែល NBC បញ្ចេញទៅទីផ្សារតាមរយៈឧបករណ៍គោលនយោបាយរូបិយវត្ថុថ្មីរបស់ខ្លួនមានការកើនឡើង។
កាលពីឆ្នាំ ២០១៨ NBC បានធ្វើប្រតិបត្តិការផ្តល់សន្ទនីយភាពដោយមានការធានា (LPCO) បានផ្តល់សន្ទនីយភាពជាប្រាក់រៀលសរុបប្រមាណ ៦៩៧ ពាន់លានរៀល (១៧២ លានដុល្លារ) កើនឡើងជិត ៥ ដងធៀបនឹងឆ្នាំ ២០១៧។ គ្រឹះស្ថានដែលបានចូលរួមក្នុងប្រតិបត្តិការ LPCO របស់ធនាគារជាតិកាលពីឆ្នាំ ២០១៨ មានរហូតដល់ ១២ គ្រឹះស្ថាន គឺកើនឡើងពីត្រឹមតែ ៥ ប៉ុណ្ណោះកាលពីឆ្នាំ ២០១៧។
លោក សុខ វឿន ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ អិលអូអិលស៊ី បានលើកឡើងថា ស្ថិរភាពអត្រាប្តូរប្រាក់បានធ្វើឲ្យតម្រូវការប្រាក់រៀលមានការកើនឡើង ដែលឆ្លុះបញ្ចាំងពីការកើនឡើងទំនុកចិត្តរបស់អ្នកប្រើប្រាស់ទៅលើរូបិយប័ណ្ណជាតិ។ លោកបញ្ជាក់ថា តម្រូវការប្រាក់រៀលនៅតាមគ្រឹះស្ថានហិរញ្ញវត្ថុនៅតែបន្តកើនឡើង ហើយគ្រឹះស្ថានមីក្រូហិរញ្ញវត្ថុមានជម្រើសច្រើនជាងមុន និងល្អជាងមុនក្នុងការទទួលបានប្រភពទុនជាប្រាក់រៀល។
លោកបន្តថា ធនាគារជាតិ ចាប់ផ្តើមមានឧបករណ៍គោលនយោបាយរូបិយវត្ថុថ្មីៗ ដែលត្រូវបានប្រើប្រាស់ច្រើនជាងមុន។ លើសពីនេះ គ្រឹះស្ថានធនាគារពាណិជ្ជក្នុងស្រុក បានចាប់ផ្តើមផ្តល់កម្ចីជាប្រាក់រៀលមកឲ្យមីក្រូហិរញ្ញវត្ថុ (ដែលកាលពីមុនមិនមាន) ដោយសារធនាគារពាណិជ្ជទាំងនោះកំពុងព្យាយាមបំពេញតាមលក្ខខណ្ឌរបស់ធនាគារជាតិ ដែលត្រូវមានកម្ចីជាប្រាក់រៀលយ៉ាងហោចណាស់ ១០ ភាគរយនៃកម្ចីសរុបរបស់ពួកគេនៅត្រឹមដំណាច់ឆ្នាំ ២០១៩។
លោកថ្លែងថា៖ «និន្នាការអត្រាប្តូរប្រាក់រៀលមានស្ថិរភាព និងនិរន្តរភាពល្អខ្លាំងមែនទែន។ ស្ថិរភាពអត្រាប្តូរប្រាក់មានប្រយោជន៍ខ្លាំងណាស់សម្រាប់អ្នកវិនិយោគ ហើយកន្លងមកធនាគារជាតិអនុវត្តគោលនយោបាយរក្សាស្ថិរភាពអត្រាប្តូរប្រាក់ប្រកបដោយប្រសិទ្ធភាព»៕