.jpg)
ប្រភេទក្រដាសប្រាក់ដុល្លារដែលធនាគារជាតិកំពុងពិចារណាលែងទទួល។ ហុង មិនា
ភ្នំពេញៈ ធនាគារជាតិនៃកម្ពុជា (NBC) កំពុងពិចារណាក្នុងការឈប់ទទួលយកក្រដាសប្រាក់ដុល្លារអាមេរិកតម្លៃ ១ ដុល្លារ ២ ដុល្លារ និង ៥ ដុល្លារ ពីគ្រឹះស្ថានធនាគារ និងមីក្រូហិរញ្ញវត្ថុដោយពិនិត្យឃើញថា ក្នុងឃ្លាំងគ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជាមានការគរជន់ និងមានតម្រូវការទាបនៅលើទីផ្សារ។
អ្នកនៅក្នុងឧស្សាហកម្ម និងអ្នកជំនាញអះអាងថា ចំណាត់ការនេះនឹងជួយពង្រឹងការអនុវត្តគោលនយោបាយរូបិយវត្ថុដើម្បីជំរុញការប្រើប្រាស់រូបិយវត្ថុក្នុងស្រុក។
កាលពីម្សិលមិញធនាគារជាតិនៃកម្ពុជាបានកោះប្រជុំបណ្តាគ្រឹះស្ថានធនាគារ និងមីក្រូហិរញ្ញវត្ថុក្នុងការសិក្សា និងទទួលយកធាតុចូលនានាក្នុងការឈានទៅរកការឈប់ទទួលយក ក្រដាសប្រាក់ដុល្លារទាំងនោះ។
យោងតាមសេចក្តីប្រកាសព័ត៌មានពីធនាគារជាតិបានឲ្យដឹងថា៖ «ដោយពិនិត្យឃើញថា ទាំងនៅក្នុងឃ្លាំងគ្រឹះស្ថានធនាគារ និងហិរញ្ញវត្ថុ និង ធនាគារជាតិនៃកម្ពុជាមានការគរជន់ក្រដាសប្រាក់ដុល្លារអាមេរិកប្រភេទ $១ $២ និង $៥ ដែលនេះសបញ្ជាក់ថាតម្រូវការនៃក្រដាសប្រាក់ទាំងនេះមានកម្រិតទាបក្នុងទីផ្សារអង្គប្រជុំបានឯកភាពដាក់ចេញនូវវិធានការមួយចំនួនដូចជា៖ ធនាគារជាតិនឹងផ្តល់ពេលវេលាចំនួន ៣ ខែចាប់ពីថ្ងៃទី ១ ខែមិថុនា ឆ្នាំ ២០២០ ដល់ថ្ងៃទី ៣១ ខែសីហាឆ្នាំ ២០២០ ដល់គ្រឹះស្ថានធនាគារ និងហិរញ្ញវត្ថុដើម្បីនាំយកក្រដាសប្រាក់ដុល្លារអាមេរិកប្រភេទ $១ $២ និង $៥ មកធនាគារជាតិដើម្បីដឹកជញ្ជូនចេញទៅក្រៅប្រទេសដោយឥតគិតកម្រៃសេវា។
បន្ទាប់ពីថ្ងៃទី ៣១ ខែ សីហា ឆ្នាំ ២០២០ ធនាគារជាតិនឹងផ្ទេរការចំណាយដឹកជញ្ជូនចេញទៅក្រៅប្រទេសលើក្រដាសប្រាក់ដុល្លារប្រភេទទាំងនេះឱ្យគ្រឹះស្ថានធនាគារ និងហិរញ្ញវត្ថុជាអ្នករ៉ាប់រង។ ចំពោះការទទួលក្រដាសប្រាក់ដុល្លារអាមេរិកប្រភេទ $១០ ឡើងទៅគឺមិនមានកម្រៃសេវាទេ។
សេចក្តីប្រកាសបញ្ជាក់ថា៖ «ធនាគារជាតិនៃកម្ពុជានឹងបន្តពិភាក្សាជាមួយគ្រឹះស្ថានធនាគារ និងហិរញ្ញវត្ថុដើម្បីឈានទៅកំណត់ពេលវេលាណាមួយសមស្របដើម្បីផ្អាកការទទួលក្រដាសប្រាក់ដុល្លារអាមេរិកប្រភេទតូចទាំងស្រុងពីគ្រឹះស្ថានធនាគារ និងមីក្រូហិរញ្ញវត្ថុ។ ធនាគារជាតិនៃកម្ពុជាក៏សូមបញ្ជាក់ផងដែរថា ការអនុវត្តវិធានការខាងលើមិនមានន័យថា ជាការហាមឃាត់ចរាចរណ៍ក្រដាសប្រាក់ដុល្លារប្រភេទតូចៗទាំងនេះនៅលើទីផ្សារនោះទេ»។
លោក Shin Chang Moo ប្រធានធនាគារ PPCBank ដែលបានចូលរួមនៅក្នុងកិច្ចប្រជុំមួយកាលពីថ្ងៃព្រហស្បតិ៍ស្វាគមន៍ចំពោះវិធានការនេះដែលវាកំពុងរួមចំណែកដល់ការលើកកម្ពស់ការប្រើប្រាស់រូបិយប័ណ្ណក្នុងស្រុកកាន់តែច្រើនផងដែរ។
លោកថ្លែងថា៖ «ខ្ញុំរំពឹងថានៅក្នុងរយៈពេលវែង ការប្រើប្រាស់ប្រាក់រៀលនឹងកើនឡើងដល់កម្រិតខ្ពស់បំផុត។ យើងកំពុងអង្កេតរួចហើយក្រដាសប្រាក់រៀលមានតម្លៃស្មើ និងជំនួសយ៉ាងរហ័សលើក្រដាសប្រាក់ដុល្លារ ១ ដុល្លារ និង ៥ ដុល្លារដែលវាចាស់ៗ និងងាយរហែក។ ខ្ញុំជឿជាក់ថា គោលការណ៍ណែនាំថ្មីរបស់ NBC នឹងបង្កើនល្បឿនដំណើរការការធ្វើបដិដុល្លារនីយកម្ម»។
លោក Stephen Higgins ដៃគូគ្រប់គ្រងក្រុមហ៊ុន Mekong Strategic Partners បានឲ្យដឹងថា ទិសដៅនៃកិច្ចប្រជុំនេះគឺដើម្បីលើកកម្ពស់រូបិយប័ណ្ណក្នុងស្រុក និងជាជំហានដ៏សំខាន់មួយ ដើម្បីជំរុញឲ្យប្រជាជនប្រើប្រាស់រូបិយប័ណ្ណក្នុងស្រុក។
លោកថ្លែងថា៖ «នេះជាវិធានការដ៏ល្អរបស់ NBC ដើម្បីគាំទ្រទិសដៅរបស់ខ្លួនក្នុងការលើកកម្ពស់ប្រាក់រៀល»។
លោកបានបន្តថា៖ «នេះមិនមានន័យថា យើងបញ្ឈប់ឲ្យធនាគារ និងអាជីវកម្មមិនឲ្យទទួលយកក្រដាសប្រាក់ទាំងនោះ រួចបង្វែរវាទៅឲ្យអតិថិជននោះទេ ប៉ុន្តែវានឹងជំរុញឲ្យពួកគេចង់បានក្រដាសប្រាក់រៀលថ្មីៗ។ យើងត្រូវដឹងថា ក្រដាសប្រាក់ដុល្លារអាមេរិកគឺជារូបិយប័ណ្ណស្របច្បាប់នៅអាមេរិក ច្បាស់ណាស់គឺមិនមានលក្ខខណ្ឌតម្រូវតាមផ្លូវច្បាប់ណាមួយសម្រាប់ប្រទេសកម្ពុជាត្រូវតែចាត់ទុកថា ការចរាចរ ឬមិនចរាចរ វាខុសនោះទេ ដូច្នេះ NBC មានសិទ្ធិពេញលេញក្នុងការធ្វើដូច្នេះ»។
លោក ចាន់ សុផល នាយកមជ្ឈមណ្ឌលសិក្សាគោលនយោបាយ (CPS) ក៏យល់ស្របដែរថា វិធានការពី NBC គឺជាផ្នែកមួយនៃទិសដៅបដិដុល្លារូបនីយកម្ម ដោយពន្យល់ថា ការធ្វើដុល្លារូបនីយកម្មផ្ដល់អត្ថប្រយោជន៍មួយផ្នែក ដើម្បីពង្រឹងគោលនយោបាយរូបិយវត្ថុហើយវាមិនចាំបាច់ប្រើប្រាស់ប្រាក់ដុល្លារច្រើននៅពេលមានវិបត្តិដូចនៅពេលនេះទេ។
លោកបានថ្លែងថា៖ «ខណៈដែលសេដ្ឋកិច្ចកម្ពុជាកាន់តែធំ ការបាត់បង់នៃការចំណេញ និង ឧបករណ៍រូបិយវត្ថុមានឥទ្ធិពលដល់សេដ្ឋកិច្ច។ ការធ្វើដុល្លារូបនីយកម្មមិនគួរត្រូវបានធ្វើឡើងក្នុងរយៈពេលខ្លីនោះទេ»។
របាយការណ៍ឆ្នាំ ២០១៩ របស់ NBC ឲ្យដឹងថា ចំណែកប្រាក់រៀលក្នុងទីផ្សារកម្ពុជាបានកើនឡើងប្រហែល ៣៣ ភាគរយ កាលពីឆ្នាំ ២០១៩ ធៀបនឹង ២០១៨ ចំណែកឯប្រាក់បញ្ញើជាប្រាក់រៀលបានកើនឡើង ៣៧ ភាគរយ។ ចំពោះតម្រូវការរូបិយប័ណ្ណក្នុងស្រុកជាមួយអនុបាតដុល្លារូបនីយកម្មប្រាក់បញ្ញើបានធ្លាក់ចុះមកនៅត្រឹម ៨២,៩ ភាគរយ កាលពីឆ្នាំមុនធៀបនឹង ៨៤,៨ ភាគរយកាលពីឆ្នាំ ២០១៨។
ឆ្នាំ ២០១៩ អត្រាប្តូរប្រាក់មានស្ថិរភាពក្នុងអត្រា ៤ ០៦៥ រៀលក្នុង ១ ដុល្លារ ធៀបនឹង ៤ ០៥១ រៀលកាលពីឆ្នាំ ២០១៨។ តម្លៃប្រាក់រៀលតែងតែមានការប្រែប្រួលបន្តិចបន្តួចតាមរដូវកាល៕LA
វីដេអូ៖
