ភ្នំពេញៈ ធនាគារជាតិនៃកម្ពុជា (NBC) បានជំរុញឲ្យក្រសួងរបស់រដ្ឋាភិបាល ស្ថាប័ន គ្រឹះស្ថានហិរញ្ញវត្ថុ និងសាធារណជនត្រូវធ្វើការទូទាត់ និងផាត់ទាត់តាមរយៈប្រព័ន្ធអេឡិចត្រូនិក ដើម្បីប្រយុទ្ធប្រឆាំងនឹងការរីករាលដាលកូវីដ១៩។
សេចក្ដីប្រកាសបានពី NBC កាលពីចុងសប្ដាហ៍មុនបានឲ្យដឹងថា៖ «ដើម្បីរួមចំណែកបង្ការការរីករាលដាលកូវីដ ១៩ ដែលកំពុងរីករាលដាល និងដើម្បីធានាសុវត្ថិភាព និងហានិភ័យដែលអាចកើតឡើងដោយយថាហេតុ ធនាគារជាតិនៃកម្ពុជាជំរុញឲ្យ FI កាត់បន្ថយការប្រើប្រាស់ការចេញមូលប្បទានប័ត្រសម្រាប់ការផាត់ទាត់ និងការទូទាត់ជំនួយដោយការប្រើប្រាស់តាមរយៈប្រព័ន្ធអេឡិចត្រូនិក តាមលទ្ធភាពដែលអាចធ្វើទៅបាន»។
លោក សាយ សូនី អនុប្រធានប្រតិបត្តិប្រាសាក់បានឲ្យដឹងថា គ្រឹះស្ថានរបស់លោកបានដាក់ឲ្យដំណើរការប្រព័ន្ធនានារួចហើយ ដូចជា អ៊ីនធឺណិត និងប្រព័ន្ធធនាគារចល័តដែលអាចឲ្យអតិថិជនធ្វើប្រតិបត្តិការដូចជា ការផ្ទេរប្រាក់ ការទូទាត់ និងការត្រួតពិនិត្យទឹកប្រាក់ជាដើម។
លោកថ្លែងថា៖ «គិតមកត្រឹមពេលនេះអតិថិជនរបស់យើងអាចផ្ទេរប្រាក់ឲ្យគ្នាទៅវិញទៅមកជាមួយនឹងចំនួនអប្បបរមារហូតដល់ ១០០ ០០០ ដុល្លារ ហើយបច្ចុប្បន្នពាណិជ្ជករជាច្រើនប្រើប្រាស់មធ្យោបាយទូទាត់នៅពេលពួកគេចង់ធ្វើការទូទាត់ទៅអតិថិជនរបស់ប្រាសាក់ដែលមានគណនី»។
លោកបន្ថែមថា មានប្រព័ន្ធទូទាត់មួយចំនួនផ្សេងទៀតដាក់ឲ្យដំណើរការដូចជា ការទូទាត់រហ័ស និងប្រព័ន្ធកណ្ដាលសម្រាប់ភ្ជាប់បណ្ដាញម៉ាស៊ីនដកប្រាក់ស្វ័យប្រវត្ដិ និងម៉ាស៊ីនឆូតកាត ព្រមទាំងគំនិតផ្តួចផ្ដើមប្រព័ន្ធបាគងរបស់ NBC ដើម្បីអាចឲ្យអតិថិជន និងសាធារណជនប្រតិបត្តិការទូទាំងធនាគារដោយមិនប្រើប្រាស់សាច់ប្រាក់សុទ្ធ។
លោក សាយ សូនី បន្ថែមថា៖ «ក្នុងស្ថានការណ៍បច្ចុប្បន្នយើងចង់ជំរុញឲ្យអតិថិជនរបស់យើងប្រើប្រាស់កម្មវិធីអនឡាញដូចជាធនាគារចល័ត ធនាគារអ៊ីនធឺណិត ម៉ាស៊ីនអេធីអឹម ព្រមទាំងប្រព័ន្ធទាំងអស់របស់ NBC ដើម្បីកាត់បន្ថយការរីករាលដាលកូវីដ ១៩»។ សេចក្ដីប្រកាសរបស់ NBC បានឲ្យដឹងថា គ្រប់ក្រសួងស្ថាប័នទាំងអស់ ស្ថាប័ន និងគ្រឹះស្ថានហិរញ្ញវត្ថុ និងសាធារណជនត្រូវតែគោរពតាមសេចក្ដីប្រកាសនេះ៕LA