ភ្នំពេញៈ ធនាគារជាតិនៃកម្ពុជា (NBC) កាលពីថ្ងៃព្រហស្បតិ៍ បានដាក់ឲ្យដំណើរការយុទ្ធសាស្ដ្រជាតិស្ដីពីការប្រឆាំង ការសម្អាតប្រាក់ និងហិរញ្ញប្បទានភេរវកម្ម (ML-FT) ឆ្នាំ ២០១៩-២០២៣ ដោយផ្ដល់ដល់ភាគីពាក់ព័ន្ធនូវឯកសារ ដើម្បីបង្ហាញពីយុទ្ធសាស្ដ្រសំខាន់ៗក្នុងការប្រយុទ្ធប្រឆាំងនឹង ML-FT ក្នុងរយៈពេល ៥ ឆ្នាំបន្ទាប់។
យុទ្ធសាស្ដ្រជាតិសម្រាប់ការប្រយុទ្ធប្រឆាំង ML-FT ដែលជាកំណែថ្មីលើកទី២ ចាប់តាំងពីឆ្នាំ ២០១៣ រួមមានយុទ្ធសាស្ដ្រសំខាន់ៗចំនួន ១០ ដូចជា ការយល់ដឹង និងការគ្រប់គ្រងហានិភ័យ ការផ្ដល់អាជ្ញាប័ណ្ណ និងការត្រួតពិនិត្យគ្រឹះស្ថានហិរញ្ញវត្ថុ និងមុខរបរ និងវិជ្ជាជីវៈមិនមែនហិរញ្ញវត្ថុ និងការអនុវត្តវិធានការទប់ស្កាត់ ការស៊ើបអង្កេតនូវសំអាងបទល្មើស និងបទល្មើសសម្អាតប្រាក់ប្រកបដោយប្រសិទ្ធភាព និងគោលបំណងសំខាន់ៗចំនួន ៧ ផ្សេងទៀត។
ថ្លែងនៅក្នុងការដាក់ឲ្យដំណើរការយុទ្ធសាស្ដ្រជាតិសម្រាប់ការប្រឆាំង ML-FT ឆ្នាំ ២០១៩-២០២៣ កាលពីម្សិលមិញ លោក ជា ចាន់តូ ទេសាភិបាលធនាគារជាតិ បានឲ្យដឹងថា យុទ្ធសាស្ដ្រជាតិនេះមានបំណងបម្រើជាផែនទីតម្រង់ទិសរយៈពេលវែងដ៏ទូលំទូលាយចំពោះកម្ពុជា ដែលអាចឲ្យភាគីពាក់ព័ន្ធទាំងអស់ដូចជាក្រសួង គ្រឹះស្ថាន និងភាគីពាក់ព័ន្ធផ្សេងទៀត យល់ដឹងល្អប្រសើរពីតួនាទី និងការទទួលខុសត្រូវក្នុងការរួមចំណែកដល់ការពង្រឹង ប្រសិទ្ធភាពការប្រឆាំងនឹងការសម្អាតប្រាក់ និងហិរញ្ញប្បទានភេរវកម្មនៅកម្ពុជា។
លោកថ្លែងថា៖ «កម្ពុជាបានរៀបចំយុទ្ធសាស្រ្តជាតិឆ្នាំ ២០១៩-២០២៣ ដើម្បីផ្តល់ជាត្រីវិស័យដល់ភាគីពាក់ព័ន្ធទាំងអស់ក្នុងការធ្វើការងារស្របតាមការទទួលខុសត្រូវរៀងៗខ្លួន ដើម្បីឲ្យប្រព័ន្ធប្រឆាំងការសម្អាតប្រាក់ និងហិរញ្ញប្បទានភេរវកម្ម មានភាពរឹងមាំ និងអាចឲ្យកម្ពុជាចូលរួមចំណែកជាមួយប្រទេសនានាក្នុងការពង្រឹងប្រព័ន្ធប្រឆាំងការសម្អាតប្រាក់ និង ហិរញ្ញប្បទានប្រឆាំងភេរវកម្មរបស់ពិភពលោកផងដែរ»។
លោកបន្តថា៖ «គ្រប់ភាគីពាក់ព័ន្ធទាំងអស់ចាំបាច់ត្រូវបន្តខិតខំប្រឹងប្រែង និងសាមគ្គី អនុវត្តការងារបន្ថែមទៀត ដើម្បីអាចឲ្យកម្ពុជាចេញពីបញ្ជីប្រផេះ [របស់ស្ថាប័នឃ្លាំមើលការលាងលុយកខ្វក់] ក្នុងពេលវេលាដ៏ឆាប់បំផុត»។
យុទ្ធសាស្ដ្រជាតិឆ្នាំ ២០១៩-២០២៣ ត្រូវបានរៀបចំជាមួយនឹងធាតុចូលបានពីអ្នកចូលរួមជាង ៧០ នាក់ មកពីក្រសួង និងទីភ្នាក់ងារ ២២ ខណៈមូលនិធិរូបិយវត្ថុអន្តរជាតិ (IMF) ផ្ដល់ជំនួយបច្ចេកទេសសម្រាប់គម្រោងនេះ។
យុទ្ធសាស្ដ្រជាតិឆ្នាំ ២០១៩-២០២៣ នេះសង្កត់ធ្ងន់លើសារៈសំខាន់នៃបញ្ហាគន្លឹះមួយចំនួនដូចជា ក្រសួង ស្ថាប័នសំខាន់ៗ និងអង្គភាពទទួលខុសត្រូវអនុវត្តការងារប្រឆាំងសកម្មភាពប្រឆាំងការលាងលុយកខ្វក់ និងហិរញ្ញប្បទានប្រឆាំងភេរវកម្ម (ស.ប.ហ.ភ) ត្រូវបង្កើនធនធានបន្ថែមទៀត ដើម្បីអនុវត្តភារកិច្ចរបស់ខ្លួនឲ្យបានត្រឹមត្រូវ។ គ្រប់ភាគី ពាក់ព័ន្ធទាំងអស់ ត្រូវផ្ដល់អាទិភាពខ្ពស់លើប្រសិទ្ធភាពនៃការអនុវត្តវិធានការប្រឆាំង ស.ប.ហ.ភ។ គ្រប់ភាគីពាក់ព័ន្ធទាំងអស់ ត្រូវធ្វើកិច្ចសហប្រតិបត្តិការ និងកិច្ចសម្របសម្រួលទាំងក្នុង និងក្រៅក្រសួង ស្ថាប័ន ឲ្យមានប្រសិទ្ធភាព ដើម្បីសម្រេចគោលបំណងប្រឆាំង ស.ប.ហ.ភ។
លោក Clive Scott ទីប្រឹក្សាជាន់ខ្ពស់នៅ IMF បានឲ្យដឹងថា ការអនុវត្តយុទ្ធសាស្ដ្រប្រកបដោយប្រសិទ្ធភាព នឹងផ្ដល់ត្រីវិស័យ ដើម្បីសម្រេចបានទិសដៅរបស់កម្ពុជា ក្នុងការប្រឆាំងនឹងការលាងលុយ និងហិរញ្ញប្បទានភេរវកម្ម និងហិរញ្ញវត្ថុឧក្រិដ្ឋកម្ម ព្រមទាំងសម្រាប់ការចាកចេញឲ្យបានលឿនពីបញ្ជីប្រផេះរបស់ FATF។
លោកបន្ថែមថា យុទ្ធសាស្ដ្រជាតិ ត្រូវបានប្រើប្រាស់សម្រាប់ជាគោលការណ៍ណែនាំដល់ម្ចាស់អំណោយ ក្នុងការកំណត់អ្វីជាជំនួយដែលពួកគេអាចផ្ដល់ឲ្យ។
លោកថ្លែងថា៖ «យុទ្ធសាស្ដ្រជាតិ ដែលត្រូវបានដំណើរការនៅថ្ងៃនេះ គឺជាឧទាហរណ៍នៃការរីកចម្រើនរបស់កម្ពុជា ស្របនឹងកិច្ចខិតខំប្រឹងប្រែងរបស់ខ្លួន ក្នុងការអនុវត្តច្បាប់ និងគោលនយោបាយរបស់ AML/CFT»។
FATF ជាអង្គការឃ្លាំមើលការលាងលុយពិភពលោក កាលពីខែមុន បានដាក់ប្រទេស កម្ពុជា ក្នុងបញ្ជីប្រផេះរបស់ខ្លួន ដោយសារតែការបារម្ភរបស់ប្រទេសនេះពីងាយទទួលរងគ្រោះពីសកម្មភាពលាងលុយ៕LA