ភ្នំពេញៈ ធនាគារជាតិនៃកម្ពុជាបន្តជំរុញឲ្យគ្រឹះស្ថានហិរញ្ញវត្ថុអនុវត្តការផ្តល់កម្ចីជាប្រាក់រៀលឲ្យបាន ១០ ភាគរយ នៃការផ្តល់កម្ចីសរុបរបស់ខ្លួន ខណៈកាលបរិច្ឆេទស្តីពីការអនុវត្តនេះនឹងកំណត់ត្រឹមដំណាច់ឆ្នាំនេះ។ នេះបើយោងតាមលទ្ធផលនៃកិច្ចប្រជុំគណៈកម្មាធិការគោលនយោបាយរូបិយវត្ថុលើកទី ៤៨ របស់ធនាគារជាតិកាលពីសប្តាហ៍មុន។
ធនាគារជាតិបានកំណត់ឲ្យគ្រឹះស្ថានហិរញ្ញវត្ថុទាំងអស់នៅកម្ពុជាត្រូវផ្តល់ឥណទានជារូបិយវត្ថុជាតិយ៉ាងតិច ១០ ភាគរយ នៃទំហំឥណទានសរុបចាប់តាំងពីឆ្នាំ ២០១៦ ដោយទុកពេលឲ្យរហូតទៅដល់ដំណាច់ឆ្នាំ ២០១៩ ដែលវិធានការនេះធ្វើឡើងដើម្បីជួយលើកស្ទួយការប្រើប្រាស់ប្រាក់រៀលខ្មែរ។
លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា និងជាប្រធាននាយកប្រតិបត្តិគ្រឹះស្ថានហិរញ្ញវត្ថុ AMK បានឲ្យដឹងថា បច្ចុប្បន្នការផ្តល់កម្ចីជារូបិយវត្ថុជាតិរបស់ AMK មានបរិមាណរហូតដល់ ៧០ ភាគរយ ក្នុងចំណោមការផ្តល់កម្ចីសរុបនៅទូទាំងប្រទេស។
លោកថ្លែងថា៖ « អតិថិជនភាគច្រើនជាប្រជាកសិករនៅជនបទ កម្ចីរបស់យើងភាគច្រើនជាកម្ចីខ្នាតតូចដែលអតិថិជនភាគច្រើនត្រូវការប្រាក់រៀលសម្រាប់យកទៅប្រើប្រាស់»។
លោកអះអាងថាមានស្ថាប័នមីក្រូហិរញ្ញវត្ថុ ៣០ ភាគរយ អាចនឹងពិបាកក្នុងការសម្រេចបានតាមតម្រូវការរបស់ធនាគារជាតិដោយសារស្ថាប័នទាំងនោះមិនមានប្រតិបត្តិការច្រើននៅជនបទដែលជាទីតាំងត្រូវការប្រាក់រៀលច្រើន។ ទោះបីយ៉ាងនេះក្តីលោកថ្លែងថា៖ «ខ្ញុំគិតថា វាមិនមែនជាឧបសគ្គធំទេ ព្រោះបច្ចុប្បន្ន NBC បានជួយសម្រួលច្រើនលើការងារនេះ។ ខ្ញុំគិតថានឹងមានគ្រឹះស្ថានមីក្រូហិរញ្ញវត្ថុជាច្រើនអាចសម្រេចបានតាមការកំណត់របស់ធនាគារនៃកម្ពុជា»។
លោក ប៊ុន មុនី អគ្គនាយកគ្រឹះស្ថានមីក្រូហិរញ្ញវត្ថុ «វិថី» បាននិយាយថា សម្រាប់គ្រឹះស្ថាន «វិថី» ការផ្តល់ឥណទានជាប្រាក់រៀលសម្រេចបានជាង ១០ ភាគរយហើយ។
លោកថ្លែងថា៖ «ខ្ញុំគាំទ្រយ៉ាងខ្លាំងចំពោះយុទ្ធនាការកំណត់ការផ្តល់ឥណទានជាប្រាក់រៀលនេះ ព្រោះវានឹងជួយលើកតម្កើងការប្រើប្រាស់ប្រាក់រៀល»។
លោកបានសង្កេតឃើញមានធនាគារជាច្រើនកំពុងសម្រុកក្នុងការបញ្ចេញប្រាក់រៀលឲ្យប្រជាជនខ្ចីតាមរយៈការបញ្ចុះអត្រាការប្រាក់ផងដែរ។
ការផ្តល់កម្ចីជាប្រាក់រៀលអាចជាការលំបាកបន្តិចសម្រាប់ធនាគារបរទេស ដែលមានអតិថិជនធំៗ និងប្រើប្រាស់តែប្រាក់ដុល្លារ។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បាននិយាយថាបច្ចុប្បន្នការផ្តល់ឥណទានជាប្រាក់រៀលរបស់ អេស៊ីលីដា សម្រេចបាន ១២,៥ ភាគរយ នៅក្នុងចំណោមការកម្ចីសរុបដោយសារអេស៊ីលីដាមានសាខា និងអតិថិជនច្រើន និងមានប្រតិបត្តិការបង់ពន្ធជាប្រាក់រៀល។
លោកថ្លែងថា៖ «សម្រាប់ធនាគារ អេស៊ីលីដា ការផ្តល់ឥណទានជាប្រាក់រៀល មិនមានការលំបាកទេ ហើយការផ្តល់ឥណទានជាប្រាក់រៀលគឺមានចម្រុះទាំងក្នុងទីក្រុង និងជនបទ»។
លោក ប៊ុន យីន ប្រធាននាយកប្រតិបត្តិធនាគារ CIMB បានប្រាប់ថាធនាគារនេះនឹងសម្រេចឲ្យបានតាមតម្រូវការរបស់ធនាគារជាតិលើការផ្តល់កម្ចី ជាប្រាក់រៀល។
លោកថ្លែងថា៖ «យើងនឹងព្យាយាមធ្វើឲ្យបានសម្រេចក្នុងការផ្តល់ឥណទានជាប្រាក់រៀល ១០ ភាគរយនៅចុងឆ្នាំនេះ»។ លោកបន្តថាបច្ចុប្បន្នការផ្តល់ឥណទានជាប្រាក់រៀលរបស់ធនាគារ CIMB មានប្រមាណ ៧ ភាគរយ៕ LA