ភ្នំពេញៈ ធនាគារជាតិនៃកម្ពុជា (NBC) បានចេញផ្សាយមូលបត្រអាចជួញដូរបាន (NCD) មានតម្លៃប្រហែល ៣៣,៤ ពាន់លានដុល្លារ ដល់គ្រឹះស្ថានហិរញ្ញវត្ថុកាលពីឆ្នាំមុនដែលកើនឡើងជាង ៤០ ភាគរយធៀបនឹងរយៈពេលដូចគ្នាកាលពីឆ្នាំ ២០១៩ ដែលអាចឱ្យធនាគារ និងគ្រឹះស្ថានហិរញ្ញវត្ថុអាចវិនិយោគលើសន្ទនីយភាពរយៈពេល ខ្លីរបស់ខ្លួន ដើម្បីជួយដល់សេដ្ឋកិច្ចអំឡុងពេលនៃការរីករាលដាលជំងឺកូវីដ ១៩។
យោងតាមរបាយការណ៍ប្រចាំឆ្នាំបានពី NBC សម្រាប់ចំនួនទឹកប្រាក់ NCD សរុបក្នុងនោះការចេញផ្សាយ NCD ចារឹកជាប្រាក់ដុល្លារមានចំនួន ៣០,៨ ប៊ីលានដុល្លារអាមេរិក កើនឡើង ៤៥,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ដោយតម្រូវការភាគច្រើនពីធនាគារពាណិជ្ជ ខណៈការចេញផ្សាយ NCD ចារឹក ជាប្រាក់រៀលមានចំនួន ១០,៩ ពាន់ពាន់លានរៀល ដោយបានកើនឡើងត្រឹម ៤ ភាគរយ។
កាលពីខែមីនា ឆ្នាំ ២០២០ NBC បានចេញឧបករណ៍ហិរញ្ញវត្ថុចំនួន ៥ ដែលរួមទាំង NCD ដើម្បីអាចឱ្យធនាគារ និងគ្រឹះស្ថាន ហិរញ្ញវត្ថុទទួលបានសន្ទនីយភាពគ្រប់គ្រាន់ សម្រាប់ការផ្ដល់កម្ចីដើម្បីគាំទ្រក្រុមហ៊ុន ក្នុងអំឡុងពេលការរីករាលដាលជំងឺកូវីដ១៩។
លោកស្រី ជា សិរី អគ្គនាយិកា NBC តាមរយៈវីដេអូក្នុងអំឡុងពេលដាក់ឱ្យដំណើរការឧបករណ៍ហិរញ្ញវត្ថុកាលពីខែមីនា បានឱ្យដឹងថា ទិសដៅគោលនយោបាយថ្មីនេះគឺដើម្បីគាំទ្រវិស័យហិរញ្ញវត្ថុដើម្បីជួយដល់ក្រុមហ៊ុន ខណៈពួកគេប្រយុទ្ធប្រឆាំងនឹងផលប៉ះពាល់លើសេដ្ឋកិច្ចដោយសារតែការរីករាលដាលជំងឺកូវីដ ១៩។
លោកស្រីថ្លែងថា៖ «គោលបំណងនៃគោលនយោបាយទាំងនេះ គឺដើម្បីគាំទ្រកំណើនសេដ្ឋកិច្ច ខណៈដែលប្រទេសនេះប្រឈមនឹងការគំរាមពីជំងឺកូវីដ ១៩។ NBC បន្តក្នុងការត្រួតពិនិត្យដោយយកចិត្តទុកដាក់បំផុតលើវឌ្ឍនភាពនៃស្ថានការណ៍ខាងក្នុង និងខាងក្រៅប្រទេសកម្ពុជា»។
លោក Shin Chang Moo ប្រធានធនាគារ Phnom Penh Commercial Bank (PPCBank) បានប្រាប់ភ្នំពេញប៉ុស្ដិ៍កាលពីថ្ងៃចន្ទថា NCD គឺឧបករណ៍ហិរញ្ញវត្ថុមួយដែលរួមចំណែកដល់ការអភិវឌ្ឍវិស័យហិរញ្ញវត្ថុ។
លោកថ្លែងថា៖ «NCD គឺជាឧបករណ៍ទីផ្សារប្រាក់រយៈពេលខ្លីដល់រយៈពេលមធ្យមដ៏សំខាន់មួយដែលអាចរកបានតែ ១ គត់នៅលើទីផ្សារ។ ធនាគារជាច្រើនមានតម្រូវការខ្ពស់លើ NCD ដើម្បីគ្រប់គ្រងសន្ទនីយភាពលើសរបស់ពួកគេ និងផ្ដល់ការធានាសម្រាប់ការផ្ដល់មូលនិធិជាប្រាក់រៀល។ NCD ក៏ដើរតួជាបង្គោលនៃអត្រាការប្រាក់ផងដែរ ដោយសារតែវាមិនគិតអត្រាការប្រាក់ហានិភ័យតែ ១ គត់នៅលើទីផ្សារក្នុងស្រុក»។
លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានប្រាប់ភ្នំពេញប៉ុស្ដិ៍កាលពីថ្ងៃចន្ទថា អត្ថប្រយោជន៍របស់ NCD រួមមានទ្រព្យសកម្មសន្ទនីយភាពគុណភាពខ្ពស់ អនុបាតសធនភាពលើទ្រព្យសកម្ម គ្មានសំវិធានធនសម្រាប់ឥណទានរំពឹងទុកនឹងបាត់បង់អត្ថប្រយោជន៍ប្រាក់ចំណេញ និងជាវត្ថុបញ្ជាំសម្រាប់ការធានាសម្រាប់សេវា Overdraft។
លោកលើកឡើងថា៖ «មូលហេតុមួយចំនួនដែលជំរុញឱ្យមានកំណើនតម្រូវការ NCD កាលពីឆ្នាំមុននោះគឺដោយសារតែធនាគារ ឬគ្រឹះស្ថានហិរញ្ញវត្ថុមួយចំនួនអាចប្រើប្រាស់ NCD ដើម្បីគ្រប់គ្រងអតិរេករយៈពេលខ្លីរបស់ពួកគេក្នុងរយៈពេលពី ១ ខែ ដល់ ៣ ខែ ពួកគេអាចប្រើប្រាស់វាជាទ្រព្យបញ្ចាំ សម្រាប់កម្ចីជាប្រាក់រៀលពីធនាគារជាតិនៃកម្ពុជា»។
លោកក៏បានអះអាងដែរថា កាលពីឆ្នាំ ២០១៩ NCD របស់ធនាគារអេស៊ីលីដា ភីអិលស៊ី មានប្រហែល ៥២៧ លានដុល្លារ និងកាលពីឆ្នាំ ២០២០ មានចំនួនប្រហែល ៥៦៧ លានដុល្លារ កើនឡើងប្រហែល ៨ ភាគរយ។
NCD ជាមូលបត្របំណុលមានអត្រាការប្រាក់រយៈពេលខ្លីដែលចេញដោយធនាគារជាតិនៃកម្ពុជា។
មូលបត្រនេះគឺចេញផ្សាយជាប្រាក់រៀល និងប្រាក់ដុល្លារ ដើម្បីជួយធនាគារពាណិជ្ជ និងគ្រឹះស្ថានមីក្រូហិរញ្ញវត្ថុវិនិយោគលើសន្ទនីយភាពរយៈពេលខ្លីរបស់ពួកគេ។
តម្លៃអប្បបរមាសម្រាប់ការវិនិយោគមានចំនួន ២០០ ០០០ ០០០ ប្រាក់រៀល ឬ ៥០ ០០០ ដុល្លារអាមេរិក។ សុពលភាពរបស់ NCD ជាប្រាក់រៀលគឹចាប់ពី ២ សប្ដាហ៍ដល់ ១ ឆ្នាំ ចំណែកសុពលភាព NCD ជាប្រាក់ដុល្លារគឺចាប់ពី ២ សប្ដាហ៍ដល់ ៦ ខែ។ អត្រាការប្រាក់របស់ NCD ត្រូវបានកំណត់ដោយធនាគារជាតិនៃកម្ពុជា និងប្រែប្រួលជារៀងរាល់ថ្ងៃ ទៅតាមលក្ខខណ្ឌទីផ្សារ។ នេះបើតាម NBC។
លោកស្រី ជា សិរី បានឱ្យដឹងថា NCD ត្រូវបានដាក់ឱ្យប្រើប្រាស់កាលពីចុងឆ្នាំ ២០១៣ ក្នុងគោលបំណងផ្ដល់ដល់ធនាគារ និងគ្រឹះស្ថានហិរញ្ញវត្ថុនូវឧបករណ៍មួយ ដើម្បីកែលម្អការគ្រប់គ្រងសន្ទនីយភាពរបស់ពួកគេ។ ដូចនេះពួកគេអាចទិញតាមពេលវេលាទៀងទាត់ និងជាក់លាក់ណាមួយដែលសមស្របសម្រាប់ពួកគេ៕LA