ភ្នំពេញៈ SmartLuy PLC ជាក្រុមហ៊ុនបុត្រសម្ព័ន្ធរបស់ក្រុមហ៊ុន Smart Axiata ដែលជាប្រតិបត្តិករទូរស័ព្ទចល័តក្នុងស្រុកឈានមុខគេនៅកម្ពុជា និងក្រុមហ៊ុន Pi Pay កាលពីថ្ងៃចន្ទទទួលបានការយល់ព្រមពីធនាគារជាតិនៃកម្ពុជា (NBC) ក្នុងការច្របាច់បញ្ចូលគ្នាដើម្បីធ្វើការអភិវឌ្ឍការទូទាត់បែបឌីជីថលក្នុងប្រទេសកម្ពុជា។
ជាផ្នែកមួយនៃការធ្វើសមាហរណកម្មពេញលេញរបស់ក្រុមហ៊ុនទាំង ២ បុគ្គលិករបស់ SmartLuy នឹងចូលរួមជាមួយ Pi Pay ហើយអតិថិជន ភ្នាក់ងារ ព្រមទាំងអាជីវកររបស់ SmartLuy នឹងផ្លាស់ទៅ Pi Pay។ អតិថិជន SmartLuy អាចនឹងផ្ទេរប្រាក់របស់គេទៅគណនីថ្មីរបស់ Pi Pay មុនពេលដំណើរការច្របាច់បញ្ចូលគ្នានេះត្រូវបានបញ្ចប់។
អគ្គនាយក Pi Pay លោក Tomas Pokorny បានឲ្យដឹងថា ការច្របាច់បញ្ចូលគ្នានេះគឺនឹងផ្ដល់ដល់ Pi Pay នូវឱកាសថ្មីៗ និងធនធានជាច្រើនដើម្បីបង្កើនឥទ្ធិពលរបស់ខ្លួននៅលើទីផ្សារ។
លោកថ្លែងថា៖ «ជាមួយនឹងក្រុមហ៊ុន Smart, Pi Pay នឹងបំពាក់ឧបករណ៍កាន់តែប្រសើរដើម្បីគាំទ្រដល់គោលការណ៍របស់រដ្ឋាភិបាលក្នុងការធ្វើឲ្យទៅជាលក្ខណៈឌីជីថល និងបង្កើនការទទួលយកការទូទាត់ឌីជីថលក្នុងចំណោមអតិថិជន ព្រមទាំងពាណិជ្ជករដែលរួមទាំងក្នុងក្រុមហ៊ុនលក់រាយតូចៗជាច្រើនទៀត»។
លោក Thomas Hundt អគ្គនាយកក្រុមហ៊ុន Smart Axiata បានឲ្យដឹងថា អតិថិជន ភ្នាក់ងារ និងអាជីវកររបស់ក្រុមហ៊ុន SmartLuy ទាំងអស់នឹងត្រូវបានរក្សាការជូនដំណឹងក្នុងអំឡុងពេលអន្តរកាលនេះ។
លោកថា ក្រុមហ៊ុនរំពឹងថាការច្របាច់បញ្ចូលគ្នានេះនឹងត្រូវបានបញ្ចប់ប្រកបដោយជោគជ័យក្នុងពេលឆាប់ៗខាងមុខ។ វានឹងក្លាយជាក្រុមហ៊ុនដ៏ធំនៅក្នុងការលើកកម្ពស់លទ្ធភាពទទួលបានហិរញ្ញវត្ថុគ្រប់ៗគ្នា ព្រមទាំងយុគសម័យឌីជីថលនៅកម្ពុជាផងដែរ។
មកទល់ពេលនេះក្រុមហ៊ុន Smart មានអតិថិជនប្រមាណ ៨ លាននាក់ ខណៈ Pi Pay មានអ្នកប្រើប្រាស់ជិត ៣០ ម៉ឺននាក់ តម្លៃប្រតិបត្តិការជាង ៣៥០ លានដុល្លារ៕ LA