ភ្នំពេញៈ វិស័យធនាគារនៅកម្ពុជាក្នុងឆ្នាំ ២០១៩ បានបន្តភាពរឹងមាំរបស់ខ្លួនដ៏ល្អ ទោះបី ជាស្ថានភាពភូមិសាស្ត្រនយោបាយ និងសកម្មភាពពាណិជ្ជកម្មជាអន្តរជាតិរបស់តំបន់ និងប្រទេសធំៗនៅលើពិភពលោក ជួបប្រទះនឹងភាពតានតឹងក៏ដោយ។ នេះបើតាមទេសាភិបាលធនាគារជាតិនៃកម្ពុជា។
ថ្លែងក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ ២០១៩ និងលើកទិសដៅការងារឆ្នាំ ២០២០ របស់ធនាគារជាតិនៃកម្ពុជា (NBC) កាលពីថ្ងៃព្រហស្បតិ៍ លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើង ថា ឆ្នាំ ២០១៩ គឺជាឆ្នាំដែលពិភពលោកបានជួបប្រទះនឹងបាតុភាពតវ៉ា និងភាពតានតឹងផ្នែកភូមិសាស្ត្រនយោបាយជាច្រើនដូចជា តំបន់អឺរ៉ុប អាមេរិកឡាទីន អាស៊ី និងមជ្ឈិមបូព៌ា ដែលធ្វើឲ្យវិស័យសេដ្ឋកិច្ចមានភាពមិនច្បាស់លាស់។
លោកបន្តថា ទន្ទឹមនឹងនេះភាពតានតឹងផ្នែកពាណិជ្ជកម្មរវាងមហាយក្សសេដ្ឋកិច្ចពិភពលោកទាំង ២ គឺប្រទេសអាមេរិក និងចិនក៏បានបន្តអូសបន្លាយពេលយ៉ាងយូរព្រមជាមួយនឹងផែនការនៃការចាកចេញរបស់អង់គ្លេសពីសហភាពអឺរ៉ុប (Brexit) ដែលមិនទាន់ត្រូវបានដោះស្រាយរួចរាល់ផងដែរ។
លោកលើកឡើងថា បញ្ហាទាំងអស់នេះបានធ្វើឲ្យប៉ះពាល់យ៉ាងខ្លាំងទៅដល់គ្រប់សកម្មភាពពាណិជ្ជកម្មអន្តរជាតិ និងការវិនិយោគនៅទូទាំងពិភពលោក។ ទោះយ៉ាងណា វិស័យធនាគារនៅកម្ពុជានៅតែអាចរក្សាបាននូវភាពរឹងមាំរបស់ខ្លួនបានដដែល ខណៈកំណើនសេដ្ឋកិច្ចកម្ពុជាឆ្នាំ ២០១៩ រំពឹងនឹងសម្រេចបានក្នុងអត្រា ៧,១ ភាគរយ ដែលជាអត្រាកំណើនខ្ពស់ជាងគេក្នុងបណ្តាប្រទេសក្នុងតំបន់អាស៊ាន។
លោកថ្លែងថា៖ «វិស័យធនាគារនៅកម្ពុជាមានសុខភាពល្អ ហើយបានរួមចំណែកយ៉ាងសកម្មក្នុងការជំរុញបរិយាប័ន្នហិរញ្ញវត្ថុ លើកស្ទួយជីវភាពរស់នៅ និងបានចូលរួមចំណែកក្នុងការកាត់បន្ថយភាពក្រីក្ររបស់ប្រជាជន»។
លោកបន្តទៀតថា ដើម្បីរក្សាបាននូវភាពល្អប្រសើររបស់ខ្លួន បច្ចុប្បន្នប្រព័ន្ធធនាគារនៅកម្ពុជាក៏បាននិងកំពុងធ្វើទំនើបកម្មផ្នែកបច្ចេកវិទ្យាដែលជាការឆ្លើយតបទៅនឹងការវិវឌ្ឍរបស់សង្គមផងដែរ។
របាយការណ៍របស់ NBC បានឲ្យដឹងថា វិស័យធនាគារនៅកម្ពុជាមានសម្ទុះយ៉ាងលឿនក្នុងរយៈពេលជិត ២ ទសវត្សរ៍មកនេះដោយកាលពីឆ្នាំ ២០០២ ចំនួនទ្រព្យសកម្មធៀបនឹង ផ.ស.ស ដែលមានត្រឹម ២០ ភាគរយបានហក់ឡើងដល់ ១៨៩ ភាគរយក្នុងឆ្នាំ ២០១៩ ស្មើនឹងតម្លៃ ៥១,០៧ ពាន់លានដុល្លារ។
ចំណែកឥណទានធៀបនឹង ផ.ស.ស មាន ៦ ភាគរយ កាលពីឆ្នាំ ២០០២ បានឡើងដល់ ១១៩ ភាគរយ ក្នុងឆ្នាំ ២០១៩ ស្មើនឹងប្រហែល ២៨,៩១ ពាន់លានដុល្លារ និងប្រាក់បញ្ជីធៀបនឹង ផ.ស.ស កើនពីចំនួន ១២ ភាគរយ ដល់ ១១៣ ភាគរយ ស្មើនឹង ៣០,៦២ ពាន់លានដុល្លារ។
ភាពល្អប្រសើររបស់វិស័យហិរញ្ញវត្ថុកម្ពុជាក្នុងឆ្នាំ ២០១៩ ក៏ត្រូវបានបង្ហាញថា ទទួលបានការគាំទ្រដោយកំណើននៃតម្រូវការក្នុងស្រុក និងការនាំចេញផងដែរ។
របាយការណ៍ខាងលើបានឲ្យដឹងថា ក្នុងរយៈពេល ៣ ត្រីមាសដំបូងក្នុងឆ្នាំ ២០១៩ ការនាំចេញទំនិញកម្ពុជាទៅកាន់ទីផ្សារអន្តរជាតិមានតម្លៃសរុប ១០,៩ ពាន់លានដុល្លារ ខណៈការនាំចូលមានតម្លៃ ១៦,៥ ពាន់លានដុល្លារ។
គិតត្រឹមចុងឆ្នាំ ២០១៩ ទុនបម្រុងអន្តរជាតិរបស់កម្ពុជាបានកើនដល់ប្រមាណ ១៨ ពាន់លានដុល្លារ និងអាចធានាការនាំចូលទំនិញ និងសេវាបានប្រមាណ ៧ ខែ។ នេះបើតាមរបាយការណ៍៕LA