ភ្នំពេញៈ កម្ពុជានឹងរៀបចំសន្និសីទម៉ាក្រូសេដ្ឋកិច្ចប្រចាំឆ្នាំលើកទី៨ ឆ្នាំ ២០២១ ស្តីពី «បញ្ហាប្រឈម និងគោលនយោបាយអភិវឌ្ឍន៍សហគ្រាសធុនតូច និងមធ្យម (SME) នៅកម្ពុជា (Challenges for Cambodian SMEs Development and Policy Options)» នៅខែធ្នូ ឆ្នាំនេះ ដើម្បីបម្រើជាធាតុចូលក្នុងការរៀបចំគោលនយោបាយ បន្ទាប់ពីមើលឃើញថា SME បានដើរតួនាទីយ៉ាងសំខាន់ក្នុងសកម្មភាពសេដ្ឋកិច្ច និងក៏រងផលប៉ះពាល់ច្រើនអំឡុងវិបត្តិកូវីដ ១៩។
សន្និសីទម៉ាក្រូសេដ្ឋកិច្ចប្រចាំឆ្នាំ គឺជាគំនិតផ្តួចផ្តើមឡើងដោយធនាគារជាតិនៃកម្ពុជា (NBC) លើប្រធានបទនានាដើម្បីប្រមូលជាធាតុចូលក្នុងការរៀបចំគោលនយោបាយជំរុញកំណើនសេដ្ឋកិច្ចជាតិ។
នៅកម្ពុជា សហគ្រាសធុនតូច និងមធ្យមមានប្រមាណលើសពី ៩០ ភាគរយនៃសហគ្រាសសរុប ដែលបានរួមចំណែកជិត ៦០ ភាគរយនៃផលិតផលក្នុងស្រុកសរុប និងបង្កើតការងារជាង ៧០ ភាគរយនៃការងារសរុប។
កន្លងមកសហគ្រាសធុនតូច និងមធ្យមបានរួមចំណែកដល់ការលើកកម្ពស់ជីវភាព និងកាត់បន្ថយភាពក្រីក្រ ជាពិសេសក្នុងចំណោមប្រជាពលរដ្ឋរស់នៅតាមទីជនបទ។ នេះតាមសេចក្តីប្រកាសព័ត៌មានរបស់ NBC កាលពីថ្ងៃចន្ទ។
NBC បានលើកឡើងថា ទោះបីជាបានដើរតួនាទីយ៉ាងសំខាន់ក្នុងការគាំទ្រកំណើនសេដ្ឋកិច្ច និងកាត់បន្ថយភាពក្រីក្រយ៉ាងណាក្តី ក៏ការសិក្សាពីស្ថានភាពសហគ្រាសធុនតូច និងមធ្យមនៅកម្ពុជាបានបង្ហាញថា សហគ្រាសធុនតូច និងមធ្យម មានបញ្ហាប្រឈមច្រើនក្នុងអាជីវកម្ម ហើយមានឧបសគ្គក្នុងការអភិវឌ្ឍខ្លួនប្រកបដោយចីរភាព។
NBC បញ្ជាក់ថា៖ «ការរីករាលដាលជំងឺកូវីដ ១៩ បានបង្កផលប៉ះពាល់ខ្លាំងបន្ថែមទៀតដល់ការធ្វើអាជីវកម្មរបស់សហគ្រាសធុនតូច និងមធ្យម ដែលមានភាពងាយរងគ្រោះទៅនឹងការប៉ះទង្គិចស្រាប់។
ក្នុងបរិការណ៍នេះ ដើម្បីចូលរួមចំណែកក្នុងការបង្កើនការសិក្សាស្រាវជ្រាវដែលនៅមានតិចអំពីការអភិវឌ្ឍ និងពង្រឹងភាពធន់នៃសហគ្រាសធុនតូច និងមធ្យម ធនាគារជាតិនៃកម្ពុជាបានជ្រើសរើសប្រធានបទស្រាវជ្រាវរបស់សន្និសីទម៉ាក្រូសេដ្ឋកិច្ចលើកទី៨ នាឆ្នាំ ២០២១ ស្តីពី «បញ្ហាប្រឈម និងគោលនយោបាយអភិវឌ្ឍន៍សហគ្រាសធុនតូច និងមធ្យមនៅកម្ពុជា»។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លោក តែ តាំងប៉ បានប្រាប់ ភ្នំពេញ ប៉ុស្ដិ៍ថា បញ្ហាចម្បងរបស់ SME ក្នុងស្រុក គឺទាក់ទងនឹងលទ្ធភាពទទួលបានហិរញ្ញប្បទាន ដោយសារតែគ្រឹះស្ថានហិរញ្ញវត្ថុភាគច្រើនផ្ដោតទៅលើទ្រព្យដាក់ធានា ដែលវាបានក្លាយទៅជាឧបសគ្គរារាំងលទ្ធភាពពួកគេក្នុងការទទួលបានមូលនិធិកាន់តែច្រើនសម្រាប់ការពង្រីកអាជីវកម្ម។
លោកថ្លែងថា៖ «យើងស្វាគមន៍ដៃគូអភិវឌ្ឍន៍ និងអង្គការអន្តរជាតិណាមួយដែលជួយ SME ក្នុងស្រុកយើង ជាពិសេសទាក់ទងនឹងការផ្ដល់មូលនិធិ ដោយសារ SMEs ភាគច្រើនរបស់យើងទទួលបានថវិកានៅមានកម្រិតតិចតួច ដែលតម្រូវឱ្យមានទ្រព្យធានា ដើម្បីទទួលបានមូលនិធិកាន់តែច្រើនពីធនាគារ ឬគ្រឹះស្ថានមីក្រូហិរញ្ញវត្ថុ»។
បច្ចុប្បន្នរដ្ឋាភិបាលកំពុងខំប្រឹងប្រែងដើម្បីគាំទ្រ SMEs នៅក្នុងប្រទេសតាមរយៈធនាគារសហគ្រាសធុនតូច និងមធ្យមកម្ពុជា (SME Bank) ដោយមានដើមទុនវិនិយោគ ១៥០ លានដុល្លារ ដើម្បីផ្ដល់កម្ចីអត្រាការប្រាក់ទាបដល់វិស័យ SME។
ទោះបីយ៉ាងណា លោក តែ តាំងប៉ បញ្ជាក់ថា ការផ្ដោតការយកចិត្តទុកដាក់ដែលមានមូលដ្ឋានលើទ្រព្យដាក់ធានានៅតែជាឧបសគ្គសម្រាប់ SME ក្នុងការទទួលបានមូលនិធិ។ លោកបន្ថែមថា៖ «SME របស់យើងនៅតែមានការពិបាកក្នុងការទទួលបានកម្ចីពីធនាគារ SME Bank ដោយសារតែពួកគេទាមទារទ្រព្យដាក់ធានាសម្រាប់ការវាយតម្លៃកម្ចីរបស់ពួកគេ»។
ឆ្នាំ ២០២១ នេះជាលើកទី៨ ហើយដែល NBC បានរៀបចំសន្និសីទម៉ាក្រូសេដ្ឋកិច្ចបែបនេះ ដោយមានបំណងលើកកម្ពស់ការស្រាវជ្រាវលើប្រធានបទខាងលើ និងផ្តល់ជាវេទិកាពិភាក្សាជុំវិញបញ្ហាប្រឈម និងការអភិវឌ្ឍសហគ្រាសធុនតូច និងមធ្យមកម្ពុជា ដែលអាចក្លាយជាធាតុចូលក្នុងការរៀបចំគោលនយោបាយអភិវឌ្ឍន៍សេដ្ឋកិច្ចជាតិឱ្យកាន់តែមានភាពធន់ និងប្រកបដោយបរិយាប័ន្ន។ សន្និសីទនេះក៏មានការចូលរួមពីអ្នកជំនាញ អ្នកស្រាវជ្រាវ និងភាគីពាក់ព័ន្ធជាតិ និងអន្តរជាតិផងដែរ៕