ភ្នំពេញៈ ធនាគារជាតិនៃកម្ពុជា (NBC) ជាថ្មីម្តងទៀតបានរំឭកដល់គ្រឹះស្ថានផ្តល់កម្ចីពីការហាមឃាត់ការទទួលយកអត្តសញ្ញាណប័ណ្ណ ឬសៀវភៅគ្រួសារ និងសៀវភៅស្នាក់នៅសម្រាប់ជាការធានាលើការផ្តល់ឥណទាន។ នេះបើយោងតាមសេចក្តីប្រកាសកាលពីថ្ងៃម្សិលមិញ។
ក្នុងសេចក្តីប្រកាស NBC បានក្រើនរំឭកជាថ្មីម្តងទៀតថា គ្រឹះស្ថានទាំងអស់ត្រូវយកចិត្តទុកដាក់អនុវត្តតាមខ្លឹមសារនៃសេចក្តីជូនដំណឹងរបស់ NBC ចុះថ្ងៃទី ១១ ខែមីនា ឆ្នាំ ២០១៦ ឲ្យបានពេញលេញ និងម៉ឺងម៉ាត់បំផុត។
NBC បានព្រមានចាត់វិធានការក្នុងករណីគ្រឹះស្ថានធនាគារ និងហិរញ្ញវត្ថុ និងគ្រឹះស្ថានឥណទានជនបទណានៅតែបន្តសកម្មភាព និងមិនយកចិត្តទុកដាក់អនុវត្តតាមសេចក្តីជូនដំណឹងនេះដោយនឹងត្រូវទទួលរងទណ្ឌកម្មខាងវិន័យធ្ងន់ធ្ងររហូតដល់ការដកហូតអាជ្ញាប័ណ្ណអាជីវកម្ម។
គណបក្សប្រជាជនកម្ពុជាកាលពីថ្ងៃទី ១៦ កក្កដាក៏បានចេញសេចក្តីជូនដំណឹងឲ្យប្រធានក្រុមការងារ និងប្រធានគណៈកម្មាធិការគណបក្សរាជធានី-ខេត្ត ស្រាវជ្រាវឲ្យឃើញនូវប្រជាពលរដ្ឋដែលយកឯកសារទាំងនេះទៅដាក់ជាវត្ថុបញ្ចាំហើយជួយឲ្យសម្រួលដើម្បីស្នើសុំ អត្តសញ្ញាណប័ណ្ណ ឬសៀវភៅគ្រួសារពីម្ចាស់បំណុលឲ្យប្រជាពលរដ្ឋមកប្រើប្រាស់ក្នុងការបោះឆ្នោតសិន។
សេចក្តីជូនដំណឹងបន្តថាកន្លងមកមានប្រជាពលរដ្ឋមួយចំនួនយកអត្តសញ្ញាណប័ណ្ណទៅដាក់បញ្ចាំដើម្បីសុំខ្ចីប្រាក់ពីម្ចាស់បំណុល ឬពីមីក្រូហិរញ្ញវត្ថុជាហេតុធ្វើឲ្យគាត់ពុំមានអត្តសញ្ញាណប័ណ្ណសម្រាប់ប្រើពេលទៅបោះឆ្នោតខាងមុខ៕LA