ភ្នំពេញៈ មូលនិធិ Pioneer Facility របស់ក្រុមហ៊ុន Nexus for Development បានចុះកិច្ចព្រមព្រៀងមានតម្លៃកន្លះលានដុល្លារអាមេរិក ជាមួយក្រុមហ៊ុន Khmer Water Supply Holding (KWSH ) ដើម្បីគាំទ្រដល់លទ្ធភាពទទួលបានទឹកស្អាតនៅជនបទក្នុងប្រទេស កម្ពុជា។ នេះបើយោងតាមសេចក្ដីប្រកាសព័ត៌មានកាលពីម្សិលមិញ។
សេចក្ដីប្រកាសព័ត៌មានឲ្យដឹងថា Pioneer Facility បានចុះកិច្ចព្រមព្រៀងផ្ដល់ហិរញ្ញប្បទានកម្ចី ៥០ ម៉ឺន ដុល្លារដល់ KWSH ជាសហគ្រាសសង្គមមួយ ដែលធ្វើការក្នុងការបង្កើនលទ្ធភាពទទួលបានទឹកស្អាត សម្រាប់ប្រជាជននៅតាមជនបទរបស់កម្ពុជា។
ការសម្រេចចិត្តរបស់ក្រុមហ៊ុន Nexus ក្នុងការវិនិយោគត្រូវបានជំរុញដោយកំណត់ត្រារបស់ក្រុមហ៊ុន KWSH ក្នុងការផ្ដល់ទឹកស្អាតដល់ប្រជាជនជនបទកម្ពុជា ដែលមានតែ ៨,៥ ភាគរយប៉ុណ្ណោះនៅជនបទត្រូវបានតភ្ជាប់ទឹកស្អាត។
ក្រុមហ៊ុននេះបានតភ្ជាប់ទឹកស្អាតដល់គ្រួសារជាង ១៣ ០០០ រួចហើយ និងមានផែនការរយៈពេលវែង ក្នុងការផ្គត់ផ្គង់ទឹកស្អាត ដល់គ្រួសារជាង ៦០ ០០០ គ្រួសារ។
ជាមួយនឹងកិច្ចព្រមព្រៀងនេះ The Pioneer Facility និងធ្វើការងារជាមួយក្រុមហ៊ុន KWSH ក្នុងការផ្ដល់ហិរញ្ញប្បទានដោយផ្ទាល់ក្នុងការទិញស្ថានីយទឹកស្អាត ២ បន្ថែមទៀត ជាមួយនឹងសក្ដានុពលការតភ្ជាប់រួមប្រហែល ១២ ៥០០ គ្រួសារ។
មូលនិធិនេះនឹងត្រូវបានប្រើប្រាស់ ដើម្បីសាងសង់រោងចក្រទឹកស្អាត ការជួលកម្មករ ការទិញប្រភពទឹកស្អាត និងការទិញ និងឧបករណ៍ដំឡើង ដូចជា បំពង់ទីបបង្ហូរទឹក។ នេះបើយោងតាមសេចក្ដីប្រកាសព័ត៌មាន។
លោក Shivam Tripathi ប្រធានគម្រោងក្រុមហ៊ុន KWSH បានឲ្យដឹងថា៖ «ការវិនិយោគនេះអាចជួយគាំទ្រតម្រូវការមូលធនចាំបាច់របស់យើង ក្នុងការពង្រីកសកម្មភាពបណ្ដាញទឹកស្អាតរបស់យើង និងបង្កើនជាបន្តបន្ទាប់នូវលទ្ធភាពទទួលបានទឹកស្អាតតម្លៃទាប និងទឹកម៉ាស៊ីនសម្រាប់ប្រជាជនកម្ពុជានៅតាមជនបទ»។
Nexus for Development ធ្វើការជាមជ្ឈមណ្ឌលសម្រាប់ការតភ្ជាប់ប្រភពមូលនិធិ និងបច្ចេកវិទ្យា ដល់សហគ្រាសសង្គម SME និង NGO ដើម្បីផ្ដល់ថាមពលស្អាត ទឹកស្អាត និងដំណោះស្រាយអនាម័យ៕LA