.jpg)
កសិករកំពុងប្រើទុយោស្រោចទឹកបន្លែរបស់ខ្លួនដែលធ្វើជាលក្ខណៈគ្រួសារនៅខេត្តកណ្តាលកន្លងមក។ ហេង ជីវ័ន
ភ្នំពេញៈ ខណៈច្បាប់ស្តីពីផលិតផលសរីរាង្គជាតិកំពុងស្ថិតក្នុងសេចក្តីព្រាងនៅឡើយ អង្គការមិនមែនរដ្ឋាភិបាលបានជំរុញឲ្យរដ្ឋាភិបាលគួរតែបង្កើនល្បឿនបញ្ចេញច្បាប់នេះឲ្យបានឆាប់ដើម្បីបង្កើនទំនុកចិត្តលើទីផ្សារសរីរាង្គ និងការលើកកម្ពស់កសិករ។
លោក តេន រ៉ា ទីប្រឹក្សាបច្ចេកទេសស្ដីពីការជួយសម្រួលពាណិជ្ជកម្ម និងស្ដង់ដារនៅអង្គការ GIZ បានថ្លែងថាច្បាប់សរីរាង្គជាតិគឺជាគន្លឹះដ៏សំខាន់ក្នុងការបង្កើនទំនុកចិត្តលើទីផ្សារ ខណៈការធ្វើកសិកម្ម និងការផលិតដំណាំសរីរាង្គកំពុងរីកចម្រើនលើទីផ្សារ ប៉ុន្តែអតិថិជននៅតែស្ទាក់ស្ទើរអំពីគុណភាព និងសុវត្ថិភាពទំនិញ។
លោកបានថ្លែងថា៖ «ប្រទេសកម្ពុជាមិនមានច្បាប់ផលិតផលសរីរាង្គ ដើម្បីបញ្ជាក់ផលិតផលរបស់ខ្លួននោះទេ វាពិបាកក្នុងការបង្កើនទំនុកចិត្តអតិថិជន»។
លោកបន្តថា៖ «គ្រប់គ្នាតែងតែអះអាងពីគុណភាព និងសុវត្ថិភាពស្បៀងអាហាររបស់ពួកគេ ប៉ុន្តែអតិថិជននៅតែមិនមានទំនុកចិត្តគ្រប់គ្រាន់»។ លោកបន្ថែមថាក្រុមហ៊ុនផលិតផលិតផលសរីរាង្គមួយចំនួនបានចំណាយប្រាក់ច្រើនសម្រាប់ទទួលបានការបញ្ជាក់ពីអង្គការក្រៅប្រទេសលើផលិតផលរបស់ពួកគេ។
លោក តេន រ៉ា ថ្លែងថា៖ «ប្រសិនបើយើងមានច្បាប់សរីរាង្គរបស់យើង គឺប្រសើរជាងការបញ្ជាក់ពីខាងក្រៅ»។ លោកបន្តថា៖ «រដ្ឋាភិបាលគួរតែពិចារណាក្នុងការបង្កើនល្បឿនច្បាប់នេះ ដើម្បីគ្រប់គ្រងលើផលិតផលសរីរាង្គ ដែលនឹងលើកកម្ពស់ផលិតផលក្នុងស្រុកឲ្យកាន់តែទូលំទូលាយ»។
លោក គៀន សុភា អនុប្រធាន នាយកដ្ឋានសាកវប្បកម្ម និងដំណាំរួមផ្សំនៅក្រសួងកសិកម្មបានថ្លែងថាសេចក្តីព្រាងច្បាប់ដែលមាន ៦០ មាត្រា ត្រូវបានបញ្ចប់ហើយ ហើយពេលនេះវាកំពុងស្ថិតក្រោមការត្រួតពិនិត្យរបស់គណៈកម្មាធិការនៃក្រសួងកសិកម្ម។
លោកថ្លែងថា៖ «ប៉ុន្តែយើងត្រូវការពេលវេលាបន្ថែមទៀតក្នុងការត្រួតពិនិត្យ និងវិភាគដោយគណៈកម្មាធិការនៅក្នុងក្រសួងមុនពេលអនុវត្តជាសាធារណៈ»។
លោកបានបន្តទៀតថាច្បាប់នេះដើរតួនាទីដ៏សំខាន់ក្នុងការអនុវត្ត និងត្រួតពិនិត្យគុណភាព និងស្ដង់ដារ។ លោកបញ្ជាក់ថា៖ «យើងមានយន្តការក្នុងការគ្រប់គ្រងគុណភាពសរីរាង្គ ដើម្បីបង្កើនទំនុកចិត្តចំពោះទីផ្សារ និងអតិថិជន»។
លោកបន្តថាក្រសួងនឹងព្យាយាមជំរុញឲ្យកសិករ ផលិតផលិតផលសរីរាង្គដោយប្រើប្រាស់បច្ចេកវិទ្យាត្រឹមត្រូវ។
លោក សំ វិទូ ទីប្រឹក្សាអង្គការកសិកម្ម សេដាក ដែលជាស្ថាប័នក្រៅរដ្ឋាភិបាលមួយធ្វើការលើការផលិតដំណាំ សរីរាង្គ និងដែលចូលរួមកិច្ចប្រជុំលើកដំបូងជាមួយក្រសួងកសិកម្មអំពីច្បាប់សរីរាង្គជាតិនេះកាលពីឆ្នាំមុនបាននិយាយថា ការមានច្បាប់នេះនឹងជួយលើកកម្ពស់ និងជំរុញក្រុមហ៊ុនផលិតសរីរាង្គក្នុងស្រុក។
លោកបញ្ជាក់ថា៖ «ច្បាប់នេះនឹងធានាគុណភាព និងសុវត្ថិភាពស្បៀងអាហារសម្រាប់កសិករ វានឹងផ្ដល់ចំណាប់អារម្មណ៍សម្រាប់ក្រុមហ៊ុនផលិតក្នុងការពង្រីកកសិដ្ឋានសរីរាង្គរបស់ពួកគេ ខណៈវានឹងបន្ថែមតម្លៃថែមទៀតដល់កសិករ»។ បច្ចុប្បន្នប្រទេសកម្ពុជាមានតម្រូវការបន្លែ ៥០០ តោនក្នុងមួយថ្ងៃដែលមានតម្លៃ ២០០ លានដុល្លារទៅ ៣០០ លានដុល្លាររៀងរាល់ឆ្នាំ។
ប្រទេសកម្ពុជា ពេលនេះកំពុងប្រឈមនឹងបញ្ហាផែ្លឈើ និងបន្លែមានសារធាតុគីមីដែលនាំចូលពីប្រទេសជិតខាងដូចជាវៀតណាម៕LA
