ភ្នំពេញ: រោងចក្រផលិតវាំងនន Nien Made Enterprise ដែលមានមូលដ្ឋាននៅប្រទេសចិនបានប្រកាសពីគម្រោងមកពង្រីករោងចក្រនៅក្នុងប្រទេសកម្ពុជាដើម្បីគេចពីសង្គ្រាមពាណិជ្ជកម្មរវាងចិន និងអាមេរិក។ នេះបើយោងតាមសេចក្តីរាយការណ៍របស់ Taipei Times។
មន្ត្រីទំនាក់ទំនងសាធារណៈរបស់ក្រុមហ៊ុន Nien Made Enterprise បានប្រាប់កាសែត Taipei Times ថា ការពង្រីកចង្វាក់ផលិតកម្មរបស់ខ្លួននៅតំបន់អាស៊ីអាគ្នេយ៍គឺដើម្បីកាត់បន្ថយផលប៉ះពាល់ការបង់ពន្ធខ្ពស់ទៅអាមេរិក។
មន្ត្រីរូបនោះបានឲ្យដឹងទៀតថា ក្រុមហ៊ុននឹងបង្វែរការបញ្ជាទិញផលិតផលសម្រេចពីប្រទេសចិនទៅប្រទេសកម្ពុជាវិញ ដើម្បីចៀសវាងហានិភ័យការយកពន្ធពីអាមេរិក។
លោកប្រាប់ Taipei Times ថា៖ «ជម្លោះពាណិជ្ជកម្មអាមេរិក និងចិនបានបង្ខំឲ្យយើងពង្រីកការផលិតនៅតំបន់អាស៊ីអាគ្នេយ៍»។ លោកបន្តថា ក្រុមហ៊ុននេះបានបង្កើនការផលិតរបស់ខ្លួននៅប្រទេសកម្ពុជា គឺដើម្បីបំពេញកង្វះកម្លាំងពលកម្មនៅប្រទេសចិនផងដែរ។
បច្ចុប្បន្នប្រហែល ១ ភាគ ៣ នៃផលិតផលសម្រេចរបស់ក្រុមហ៊ុននេះដូចជា វាំងននត្រូវបានផលិតនៅក្នុងប្រទេសចិន ប៉ុន្តែក្រុមហ៊ុនមានផែនការផ្លាស់មកកម្ពុជានៅក្នុងរយៈពេល ២ ទៅ ៣ ឆ្នាំខាងមុខ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា (GMAC) បានស្វាគមន៍ចំពោះផែនការពង្រីកមួយនេះ។ លោកបានបន្តថា ប្រទេសកម្ពុជាត្រូវការចាំបាច់ការអភិវឌ្ឍវិស័យឯកជនប្រកបដោយនិរន្តរភាព ដើម្បីសម្រេចបានគោលដៅសេដ្ឋកិច្ចនៅឆ្នាំ ២០៣០ និងឆ្នាំ ២០៥០។
លោកថ្លែងថា៖ «ជាដំណឹងល្អមួយសម្រាប់កម្ពុជាដែលមានការកើនឡើងការវិនិយោគណាមួយក្នុងវិស័យឧស្សាហកម្មដែលមានវត្តមានផលិតផល និងវិនិយោគិនថ្មីក្នុងការអាចជួយឲ្យមានកំណើនសេដ្ឋកិច្ចកម្ពុជាកាន់តែល្អប្រសើរ»។
ទោះបីយ៉ាងនេះក្តីលោកថ្លែងថា កម្ពុជាត្រូវតែខិតខំធ្វើការបន្ថែមទៀតក្នុងបរិយាកាសប្រកួតប្រជែង និងការផ្លាស់ប្តូរយ៉ាងឆាប់រហ័សនៃបរិយាកាសពិភពលោក។ លោកបន្តថា៖ «យើងនៅតែមានឱកាសធ្វើឲ្យប្រសើរឡើងទាក់ទងនឹងការចំណាយក្នុងការធ្វើជំនួញ ដូចជា តម្លៃបង្កើតការវិនិយោគថ្មីតម្លៃដឹកជញ្ជូន និងឯកសារ និងប្រាក់ឈ្នួលអប្បបរមាខ្ពស់»។
បច្ចុប្បន្ន Nien Made Enterprise បាននិងកំពុងប្រតិបត្តិការរោងចក្រផលិតវាំងននបង្អួចនៅកម្ពុជារួចទៅហើយ។
កាលពីខែកក្កដាក្រុមហ៊ុនវាយនភណ្ឌ Eclat Textile Co មានមូលដ្ឋាននៅតៃវ៉ាន់ដែលផ្គត់ផ្គង់សម្លៀកបំពាក់ និងស្បែកជើងកីឡាដល់ក្រុមហ៊ុន Nike Inc និង Lululemon Athletica Inc នឹងវិនិយោគលើរោងចក្រថ្មីនៅប្រទេសអាស៊ីអាគ្នេយ៍ ដែលរួមមានកម្ពុជាដោយសារក្រុមហ៊ុននេះយល់ថា ខ្លួនកំពុងប្រឈមនឹងការលំបាកដែលចាំបាច់ត្រូវពង្រីកក្រៅពីប្រទេសវៀតណាម។
ក្នុងឆមាសទី ១ ឆ្នាំ ២០១៩ នេះក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគមានទុនតម្លៃ ៥,២ ពាន់លានដុល្លារស្មើ ១៥៣ គម្រោង។ គម្រោងនេះបានកើនឡើង ៤៨ គម្រោង បើធៀបនឹងរយៈពេលដូចគ្នាកាលពីឆ្នាំ ២០១៨។
បើតាម GMAC នៅឆមាសទី ១ ឆ្នាំនេះមានរោងចក្រថ្មី ៣៤ បានបើកដំណើរការក្នុងនោះរោងចក្រស្បែកជើងចំនួន ២ និងរោងចក្រផលិតផលិតផលធ្វើដំណើរ ៣២៕ LA