ភ្នំពេញៈ យោងតាមការអង្កេតចន្លោះជំរឿនកសិកម្មកម្ពុជាឆ្នាំ ២០១៩ (CIAS 2019) ចុងក្រោយបានបង្ហាញថាមានការកាន់កាប់កសិកម្មលក្ខណៈគ្រួសារសរុប ១ ៧២៦ ០០០ នៅក្នុងប្រទេសកម្ពុជា ឬស្មើនឹង ៥០ ភាគរយនៃគ្រួសារទាំងអស់នៅក្នុងប្រទេស (៣ ៤៣៨ ០០០ គ្រួសារ តាមការអង្កេតសេដ្ឋកិច្ចសង្គមកម្ពុជាឆ្នាំ ២០១៧) ខណៈដែលសកម្មភាពដំណាំត្រូវបានរាយការណ៍ថា មានចំនួន ៨៨ ភាគរយនៃការកាន់កាប់កសិកម្មគ្រួសារទាំងអស់នៅកម្ពុជា និង ៧៥ ភាគរយ នៃការកាន់កាប់កសិកម្មលក្ខណៈគ្រួសារ បានរាយការណ៍ពីការចិញ្ចឹមបសុសត្វ បសុបក្សី ឬសត្វល្អិត។ នេះបើយោងតាមអង្គការ ស្បៀង និងកសិកម្មនៃអង្គការសហប្រជាជាតិ (FAO)។
អង្គការ FAO បានឱ្យដឹងថា ការអង្កេតចន្លោះជំរឿនកសិកម្មឆ្នាំ ២០១៩ (CIAS 2019) នេះគឺជាការអង្កេតទ្រង់ទ្រាយធំលើកទី ១ នៅកម្ពុជា បន្ទាប់ពីការធ្វើជំរឿនកសិកម្មឆ្នាំ ២០១៣។ ការអង្កេតចន្លោះជំរឿនកសិកម្មឆ្នាំ ២០១៩ ធ្វើឡើងក្រោមការជួយឧបត្ថម្ភពីរាជរដ្ឋាភិបាលទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) អង្គការ FAO និងមូលនិធិបៀល និងមីលីនដាហ្គេត (Bill and Melinda Gates Foundation)។
របាយការណ៍នេះនឹងត្រូវចេញផ្សាយជាផ្លូវការនៅថ្ងៃទី ៩ ខែកុម្ភៈ ខណៈដែលវិទ្យាស្ថានជាតិស្ថិតិ (NIS) នៃក្រសួងផែនការ (MoP) សហការជាមួយក្រសួងកសិកម្ម រុក្ខាប្រមាញ់ និងនេសាទ (MAFF) និងមានការគាំទ្រពីអង្គការFAO រួមគ្នាធ្វើការអង្កេតនេះ ដោយប្រមូលព័ត៌មានស្ដីពីការដាំដុះដំណាំ ការចិញ្ចឹមបសុសត្វ បសុបក្សី វារីវប្បកម្ម និងនេសាទ។
CIAS2019 បានបង្ហាញថា គ្រួសារកាន់កាប់កសិកម្មចំនួន ២៣៤ ០០០ គ្រួសារ បានចូលរួមក្នុងសកម្មភាពនេសាទ ដោយមាន ៦៣ ភាគរយ នៃអ្នកកាន់កាប់បានរាយការណ៍ពីផលនេសាទរបស់ពួកគេគឺទាបជាងឆ្នាំមុន ហើយមានតែ ៩ ភាគរយប៉ុណ្ណោះ ដែលរាយការណ៍ថា បានផលច្រើនជាងឆ្នាំមុន។
ការអង្កេតនេះបានវាយតម្លៃថា ៣១ ភាគរយ នៃការកាន់កាប់កសិកម្មគ្រួសារ បានរាយការណ៍ថា ប្រាក់ចំណូលបានពីវិស័យកសិកម្មគឺទាបជាងឆ្នាំមុន។ អ្នកកាន់កាប់កសិកម្មគ្រួសារក៏ត្រូវបានស្នើឱ្យធ្វើការប៉ាន់ស្មានពីចំណែកនៃប្រាក់ចំណូលដែលបានមកពីសកម្មភាពកសិកម្មនៅក្នុងប្រាក់ចំណូលសរុបរបស់គ្រួសាររបស់ពួកគេផងដែរ។
ប្រមាណ ៣២ ភាគរយនៃអ្នកកាន់កាប់កសិកម្មគ្រួសារបានរាយការណ៍ថា ចំណូលពាក់កណ្ដាលរបស់ពួកគាត់បានមកពីសកម្មភាពកសិកម្ម ហើយប្រមាណ ១៧ ភាគរយមានចំណូលស្ទើរតែទាំងអស់ក្នុងគ្រួសារបានមកពី សកម្មភាពកសិកម្ម និងប្រមាណ ៤ ភាគរយបានរាយការណ៍ថា ប្រាក់ចំណូលគ្រួសារសរុបទាំងអស់របស់ពួកគេ គឺទទួលបានពីសកម្មភាពកសិកម្ម។
លោក Alexandre Huynh តំណាងអង្គការ FAO ប្រចាំនៅកម្ពុជាបានឱ្យដឹងថា អង្កេតចន្លោះជំរឿនកសិកម្មកម្ពុជាឆ្នាំ ២០១៩ ជួយបញ្ចប់នូវគម្លាតទិន្នន័យកសិកម្ម ព្រមទាំងរួមចំណែកដល់ការធ្វើផែនការ ការរៀបចំហិរញ្ញប្បទាន និងការអនុវត្តផែនការយុទ្ធសាស្ដ្រអភិវឌ្ឍន៍កសិកម្មនានាប្រកបដោយប្រសិទ្ធភាព។
លោកបន្តថា៖ «ការដែលមានទិន្នន័យទាន់ពេលវេលា និងមានគុណភាពនឹងគាំទ្រដល់រាជរដ្ឋាភិបាលកម្ពុជាក្នុងការធានាបាននូវសន្ដិសុខស្បៀង និងកាត់បន្ថយផលប៉ះពាល់សេដ្ឋកិច្ចពីជំងឺកូវីដ១៩ ដែលកំពុងរាតត្បាតពេញពិភពលោក»។
លោកស្រី Hang Lina ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកវិទ្យាស្ថានជាតិស្ថិតិបានឱ្យដឹងថា ការគាំទ្រពី FAO បានធ្វើឱ្យ NIS មានលទ្ធភាពប្រើប្រាស់បច្ចេកវិទ្យាថ្មីៗក្នុងការប្រមូលទិន្នន័យនេះ ខណៈUSAID បានផ្តល់ការគាំទ្រផ្នែកហិរញ្ញវត្ថុដើម្បីជាមូលដ្ឋានបញ្ចប់កិច្ចការប្រមូលទិន្នន័យនេះ។
CIAS2019 គឺជាផ្នែកមួយនៃ AGRI-Survey ដែលជាកម្មវិធីមានរយៈពេលជាច្រើនឆ្នាំក្នុងគោលបំណងផ្ដល់ព័ត៌មានប្រកបដោយគុណភាពដល់អ្នករៀបចំផែនការ អ្នករៀបចំគោលនយោបាយ និងកសាងសមត្ថភាពប្រទេសក្នុងការអនុវត្ត ការអង្កេតកសិកម្មឱ្យបានល្អ។
នៅឆ្នាំ ២០២១ AGRISurvey នឹងត្រូវបញ្ចូលទៅក្នុងគម្រោង «គំនិតផ្តួចផ្ដើម ៥០X២០៣០» ដែលជាកម្មវិធីសកលរយៈពេល ១០ ឆ្នាំដឹកនាំដោយភាពជាដៃគូរវាងធនាគារពិភពលោក (WB) អង្គការ FAO និងមូលនិធិអន្តរជាតិសម្រាប់ការអភិវឌ្ឍកសិកម្ម (IFAD)៕LA