.jpg)
បន្ទះថាមពលពន្លឺព្រះអាទិត្យ(សូឡា) ដែលដាក់នៅលើដំបូលអគារក្រុមហ៊ុនមួយក្នុងរាជធានីភ្នំពេញកន្លងមក។ រូបថត ភ្នំពេញ ប៉ុស្តិ៍
ភ្នំពេញៈ ក្រុមហ៊ុនអាមេរិក Omni Navitas ដែលផលិតអគ្គិសនីពីកសិដ្ឋានសូឡា កាលពីម្សិលមិញបានបង្ហាញពីគម្រោងវិនិយោគធំមួយនៅកម្ពុជាដោយគ្រោងចំណាយទឹកប្រាក់ ៥០០ លានដុល្លារដើម្បីផលិតអគ្គិសនីពីបន្ទះសូឡាមានអនុភាពផលិតថាមពល១៥០ មេហ្កាវ៉ាត់។ នេះបើយោងតាមការអះអាងពីតំណាងក្រុមហ៊ុន។
តំណាងក្រុមហ៊ុនបានជួបជាមួយមន្ត្រីជាន់ខ្ពស់ក្រសួងពាណិជ្ជកម្មកម្ពុជា កាលពីម្សិលមិញ ដើម្បីស្វែងយល់ពីនីតិវិធីវិនិយោគនៅកម្ពុជា និង ដើម្បីទទួលបានការគាំទ្រពីស្ថាប័នរដ្ឋាភិបាល ខណៈប្រធានក្រុមហ៊ុនបានបញ្ជាក់ថា នៅពេលដែលគម្រោងនេះចេញជារូបរាងវានឹងក្លាយជាកសិដ្ឋានផលិតអគ្គិសនីពីបន្ទះសូឡាធំជាងគេនៅក្នុងតំបន់អាស៊ីអាគ្នេយ៍។
ថ្លែងទៅកាន់អ្នកយកព័ត៌មានកាលពីម្សិលមិញ បន្ទាប់ពីកិច្ចប្រជុំជាមួយលោក ឈួន ដារ៉ា អនុរដ្ឋលេខាធិការក្រសួងពាណិជ្ជកម្ម លោក Jim McAuliffe អគ្គនាយកក្រុមហ៊ុន Omni Navitas បានថ្លែងថា ក្រុមហ៊ុនរបស់លោកកំពុងធ្វើការងារក្នុងការទទួលបានការគាំទ្រពីរដ្ឋាភិបាលកម្ពុជា ហើយគ្រោងនឹងសាងសង់កសិដ្ឋានថាមពលបន្ទះសូឡា ដែលនឹងជាកសិដ្ឋានដ៏ធំមួយនៅក្នុងតំបន់នេះ។
លោក Jim McAuliffe បានថ្លែងកាលពីថ្ងៃម្សិលមិញថា៖ «យើងនៅទីនេះ ដើម្បីស្នើគម្រោងមួយក្នុងចំណោមគម្រោងសូឡាឈានមុខគេនៅក្នុងតំបន់អាស៊ីអាគ្នេយ៍ សម្រាប់ប្រទេសកម្ពុជា។ យើងចង់នាំយកការវិនិយោគផ្ទាល់ពីបរទេស ៥០០ លានដុល្លារមកក្នុងប្រទេសកម្ពុជា»។
លោកបានបន្តថា៖ «យើងសង្ឃឹមថា យើងនឹងបើកចំហទ្វារសម្រាប់ការវិនិយោគរបស់អាមេរិកកាន់តែច្រើននៅក្នុងប្រទេសកម្ពុជា»។
តាមលោក Jim គម្រោងនេះត្រូវការផ្ទៃដីប្រហែល ៥០០ហិកតាដើម្បីដំឡើងបន្ទះសូឡា ហើយនៅពេលកសិដ្ឋាននេះប្រតិបត្តិការនឹងផលិតថាមពលបានប្រហែល២៧៥ គីឡូវ៉ាត់ម៉ោងប្រចាំឆ្នាំ។ ការសាងសង់ដំបូងនឹងបង្កើតការងារ ៣០០០នាក់ សម្រាប់ប្រជាជនកម្ពុជា។
គម្រោងវិនិយោគនេះ គឺនៅតែស្ថិតក្នុងដំណាក់កាលដំបូង ខណៈក្រុមហ៊ុនកំពុងស្វែងរកការគាំទ្រពីក្រសួងពាក់ព័ន្ធដែលចូលរួមនៅក្នុងវិស័យនេះ។ ខណៈក្រុមនេះបានពិភាក្សាជាមួយ អគ្គិសនីកម្ពុជា (EdC) លើតម្លៃ ដែលខ្លួនអាចលក់អគ្គិសនីឲ្យ EDC មិនមានកិច្ចព្រមព្រៀងត្រូវបានធ្វើឡើងនៅឡើយទេ។ តំណាងរបស់ក្រុមហ៊ុន នឹងជួបជាមួយមន្ដ្រីមកពីក្រុមប្រឹក្សាអភិវឌ្ឍន៍កម្ពុជា (CDC) បន្តទៀត។
ក្រសួងរ៉ែ និងថាមពល អគ្គិសនីកម្ពុជា និង CDC មិនអាចទាក់ទងសុំការអត្ថាធិប្បាយបានទេកាលពីម្សិលមិញ។
លោក ឈួន ដារ៉ា បានថ្លែងកាលពីម្សិលមិញថា លោកស្វាគមន៍គម្រោងវិនិយោគមកពីក្រុមហ៊ុននេះ ដោយសង្ឃឹមថា វានឹងបង្កើតថាមពលស្អាតកាន់តែច្រើនសម្រាប់ប្រទេសកម្ពុជាព្រមទាំងជួយបំពេញគម្លាតលើតម្រូវការ និងការផ្គត់ផ្គង់អគ្គិសនីនៅក្នុងប្រទេសកម្ពុជាផងដែរ។
លោកថ្លែងថា៖ «យើងគាំទ្រគំនិតផ្ដួចផ្ដើមនេះ ហើយនឹងផ្ដល់ការជួយសម្រួលលើគម្រោងវិនិយោគនេះ ជាពិសេសថាមពលស្អាតដូចជាគម្រោងនេះ»។
លោកបន្តថា៖ «បើពួកគេអាចលក់អគ្គិសនីឲ្យរដ្ឋាភិបាលនៅក្នុងតម្លៃដូចគ្នានឹងរោងចក្រថាមពលដែលមានស្រាប់ [ធ្យូងថ្ម និងទំនប់វារីអគ្គិសនី]ឲ្យរដ្ឋាភិបាល វានឹងជួយបានយ៉ាងច្រើន»។
យោងតាមរបាយការណ៍អាជ្ញាធរអគ្គិសនីកម្ពុជា EAC ក្នុងឆ្នាំ ២០១៧ អនុភាពនៃអគ្គិសនីសរុបរបស់កម្ពុជាបានកើនឡើងពី ២១១៥ មេហ្គាវ៉ាត់នៅឆ្នាំ ២០១៦ ដល់ ២ ២៨៣ មេហ្គាវ៉ាត់។ បរិមាណថាមពលអគ្គិសនីដែលកម្ពុជាបានប្រើប្រាស់បានកើនឡើងពី ៧ ១៧៥ លានគីឡូវ៉ាត់ម៉ោងនៅឆ្នាំ ២០១៦ មក ៧ ៩៦៦ លានគីឡូវ៉ាត់ម៉ោងនៅឆ្នាំ ២០១៧។
ក្នុងនោះបរិមាណអគ្គិសនីដែលបានមកពីការផលិតក្នុងស្រុកបានកើនឡើងពី ៧៧,៩ ភាគរយ កាលពីឆ្នាំ ២០១៦ ដល់ ៨១,៤ ភាគរយនៅឆ្នាំ ២០១៧ ឯបរិមាណថាមពលអគ្គិសនីដែលនាំចូលពីប្រទេសជិតខាងបានថយចុះពី២២ ភាគរយ កាលពីឆ្នាំ ២០១៦ មកដល់ ១៨,៦ ភាគរយនៅឆ្នាំ ២០១៧៕ LA
