ទីក្រុងវីយ៉ែន៖ ក្រុមប្រទេសផលិតប្រេងឥន្ធនៈនៃសមាគមនាំចេញប្រេង OPEC និងសម័្ពន្ធមិត្តរបស់ខ្លួននឹងជួបប្រជុំតាមអនឡាញនៅថ្ងៃចន្ទ នេះ និងថ្ងៃអង្គារ ដើម្បីបញ្ចប់នូវផែនការពង្រីកការកាត់បន្ថយផលិតកម្មដែលបានគ្រោងពេលការរីករាលដាលវីរុសកូរ៉ូណាបន្តវាយលុកតម្រូវការទីផ្សារប្រេងក្នុងពិភពលោក។
កិច្ចប្រជុំកើតមានឡើងចំពេលដែលឧស្សាហកម្មប្រេងឥន្ធនៈសង្ឃឹមបើកទំព័រថ្មីក្នុងឆ្នាំប្រកបដោយគ្រោះអាសន្ន ដែលមើលឃើញក្រុមប្រទេសផលិតប្រេងបង្ខំចិត្តសម្របខ្លួនចំពោះការកាត់បន្ថយដ៏សម្បើមនេះ ជាការឆ្លើយតបចំពោះការធ្លាក់ចុះនៃតម្រូវការបណ្តាលមកពីការរីករាលដាលវីរុស។ រដ្ឋជាសមាជិកចង់គេចពីការជាន់ដានឡើងវិញនៃការធ្លាក់ចុះតម្លៃ ដែលពួកគេបានជួបប្រទះក្នុងខែមេសា កន្លងមក។
យោងតាមកិច្ចព្រមព្រៀងដែលបានឯកភាពគ្នាក្នុងខែនោះ ការកាត់បន្ថយបចុ្ចប្បន្នមានចំនួន ៧,៧ លានបារ៉ែល ក្នុង ១ ថ្ងៃ ដែលមានន័យថា នឹងត្រូវបានបន្ថយដល់ ៥,៨ លានបារ៉ែល ក្នុង ១ ថ្ងៃ ចាប់ពីខែមករា ឆ្នាំ ២០២១។
ប្រទេសផលិតប្រេងសំខាន់ៗក្នុងក្រុមនេះបានព្រលយក្នុងសប្តាហ៍ថ្មីៗនេះថា ការកាត់បន្ថយបែបនេះ ប្រហែលជាកើតមានទោះបីជាមានដំណឹងវិជ្ជមានស្តីពីការអភិវឌ្ឍនៃវ៉ាក់សាំងប្រឆាំងវីរុសកូរ៉ូណា ដោយក្រុមហ៊ុនផលិតឱសថជាច្រើនក្តី។
ក្រុមហ៊ុនផលិតវ៉ាក់សាំងដូចជា AstraZeneca, Pfizer/BioNTech និង Moderna ដែលទាំងអស់គ្នាបានបង្ហាញពីលទ្ធផលសាកល្បងគួរជាទីពេញចិត្តពីវ៉ាក់សាំងរបស់ពួកគេក្នុងសប្តាហ៍ថ្មីៗនេះ ដែលផ្តល់នូវឱកាសរស់ឡើងវិញសម្រាប់តម្រូវការប្រេង ឥនន្ធៈ។
ទោះបីយ៉ាងណា ខណៈពេលដែលប្រសិទ្ធភាពនៃវ៉ាក់សាំងនឹងប្រើរយៈពេលយូរអង្វែង OPEC និងសម្ព័ន្ធមិត្តរបស់ខ្លួននឹងផ្តោតលើការគាំទ្រតម្លៃនៅក្នុងត្រីមាសទី១ និងប្រហែលជាត្រីមាសទី២ ឆ្នាំ ២០២១។ ខណៈពេលដែលការពង្រីកការកាត់បន្ថយជាសេណារីយោដែលទំនងជាកើតឡើងបំផុតក៏មានលទ្ធភាពនៃការមិនចុះសម្រុងគ្នាកើតឡើងក្នុងចំណោមប្រទេសទាំង ២៣ ដែលពាក់ព័ន្ធក្នុងផលិតកម្មប្រេងឥន្ធនៈ។
ការចងចាំអំពីមហន្តរាយនៃការប្រជុំមួយនៅខែមីនា ឆ្នាំនេះ គឺនៅតែថ្មីៗនៅឡើយនៅពេលដែលប្រទេស អារ៉ាប៊ី សាអ៊ូឌីត និងសម្ព័ន្ធមិត្តសំខាន់របស់រុស្ស៊ីមិនបានឈានដល់កិច្ចព្រមព្រៀង ហើយបានចំណាយពេល ១ ខែទៀតក្នុងការធ្វើសង្គ្រាមតម្លៃក្លែងក្លាយ។
នៅពាក់កណ្តាលខែវិច្ឆិកា ប្រទេសអារ៉ាប់រួម បានបង្ហាញការស្ទាក់ស្ទើរចំពោះក្តីសង្ឃឹមនៃការអនុវត្តការកាត់ផ្តាច់ឱ្យបានពេញលេញនៅចុងឆ្នាំនេះ។ បន្ទាប់មកក៏មានប្រធានបទរសើបថា តើសមាជកិទាងំអស់បច្ចុប្បន្នប្រកាន់ខ្ជាប់នឹងកូតាផលិតកម្មដែលបានប្រគល់ទៅឱ្យពួកគេហើយ ឬនៅ?
អ្នកដែលមានទិន្នផលខ្ពស់លើសគេក្នុងចំណោមប្រទេសអ៊ីរ៉ាក់ និងនីហ្សេរីយ៉ា តែងតែមករកការស្ដីបន្ទោសពីព្រះអង្គម្ចាស់ Abdelaziz bin Salman ដែលជារដ្ឋមន្រ្តីថាមពលរបស់អារ៉ាប៊ី សាអ៊ូឌីត និងជាប្រធាននៅ OPEC។
ការផ្តោតសំខាន់របស់ក្រុមផលិតប្រេង គឺទៅលើតម្លៃប្រេងឆៅ ដែលបានវិលត្រឡប់មករកកម្រិតមុននៃការរាតត្បាតរបស់ខ្លួនក្នុងចន្លោះពី ៤៥ ទៅ ៥០ ដុល្លារ ក្នុង ១ បារ៉ែល សម្រាប់ទាំងស្តង់ដាអាមេរិក (WTI) និងម៉ាក Brent ដែលប្រើប្រាស់នៅទីផ្សារអឺរ៉ុប។
ប៉ុន្តែសមាជិកក៏ត្រូវយកចិត្តទុកដាក់លើតួលេខផលិតកម្មនៅខាងក្រៅប្លុកក៏ដូចជាចំនួនប្រេងដែលកំពុងត្រូវបានរក្សាទុកក្នុងពេលតែមួយផងដែរ។
អាមេរិកដែលមិនមែនជាសមាជិករបស់ OPEC និងផលិតប្រេងធំបំផុតរបស់ពិភពលោកបានធ្លាក់ពីកម្រិតខ្ពស់ជាប្រវត្តិសាស្រ្តនៅដើមឆ្នាំដល់ ១១ លានបារ៉ែល ក្នុង ១ ថ្ងៃនៅពេលនេះ៕ AFP/RR__