ក្រុងតូក្យូៈ ក្រុមហ៊ុនអេឡិចត្រូនិក Panasonic របស់ប្រទេស ជប៉ុន បានឲ្យដឹងកាលពីថ្ងៃព្រហស្បតិ៍ថា ក្រុមហ៊ុនកំពុងផ្អាកធ្វើអាជីវកម្មជាមួយក្រុមហ៊ុន Huawei បន្ទាប់ពីសហរដ្ឋអាមេរិកហាមឃាត់ក្រុមហ៊ុនអាមេរិកមិនឲ្យធ្វើពាណិជ្ជកម្មជាមួយក្រុមហ៊ុនចិននេះដោយសារក្តីបារម្ភពីបញ្ហាសន្តិសុខជាតិ។
លោក Joe Flynn អ្នកនាំពាក្យក្រុមហ៊ុន Panasonic បានប្រាប់ទីភ្នាក់ងារព័ត៌មាន AFP ថា៖ «យើងបានបញ្ឈប់ប្រតិបត្តិការអាជីវកម្មទាំងអស់ជាមួយក្រុមហ៊ុន Huawei និងក្រុមហ៊ុនចំនួន ៦៨ ផ្សេងទៀតក្នុងសម្ព័ន្ធរបស់ក្រុមហ៊ុននេះ ដែលជាកម្មវត្ថុចំពោះការហាមឃាត់របស់រដ្ឋាភិបាលអាមេរិក»។ លោកបន្ថែមថា៖ «កាលពីម្សិលមិញ មានការចេញផ្សាយសេចក្តីណែនាំផ្ទៃក្នុងមួយឲ្យអនុវត្តពេញលេញនូវវិធាននោះ»។
លោក Flynn ឲ្យដឹងថា អាជីវកម្មរបស់ក្រុមហ៊ុន Panasonic ជាមួយក្រុមហ៊ុន Huawei មានការពាក់ព័ន្ធនឹងការផ្គត់ផ្គង់ «គ្រឿងបន្លាស់អេឡិចត្រូនិក» ប៉ុន្តែលោកបានបដិសេធមិនផ្តល់ព័ត៌មានលម្អិត។
សេចក្តីប្រកាសនេះកើតមានឡើងបន្ទាប់ពីក្រុមហ៊ុនទូរស័ព្ទចល័តក្នុងប្រទេស ជប៉ុន និងចក្រភពអង់គ្លេសបានប្រកាសថា ពួកខ្លួននឹងពន្យារពេលចេញលក់ទូរស័ព្ទដៃទំនើបរបស់ក្រុមហ៊ុន Huawei។
ក្រុមហ៊ុនទូរគមនាគមន៍ EE របស់ចក្រភពអង់គ្លេស ដែលគ្រប់គ្រងដោយក្រុមហ៊ុន BT ក៏បានឲ្យដឹងផងដែរថា ខ្លួននឹងកាត់បន្ថយការប្រើប្រាស់ឧបករណ៍ទូរគមនាគមន៍របស់ក្រុមហ៊ុន Huawei ជាបណ្តើរៗចំពោះសមាសធាតុ «ស្នូល» ដែលមានភាពរសើបបំផុតនៃហេដ្ឋារចនាសម្ព័ន្ធបណ្តាញរបស់ខ្លួន។
ក្រុមហ៊ុន ARM Holdings របស់ចក្រភពអង់គ្លេស ដែលផលិតបន្ទះឈីបសម្រាប់ទូរស័ព្ទ iPhones របស់ក្រុមហ៊ុន Apple បានឲ្យដឹងកាលពីថ្ងៃពុធថា ក្រុមហ៊ុននេះក៏បានផ្អាកទំនាក់ទំនងជាមួយក្រុមហ៊ុន Huawei ផងដែរ ដើម្បីអនុលោមតាមការហាមឃាត់របស់អាមេរិក។
ទីក្រុងវ៉ាស៊ីនតោន បានដាក់សម្ពាធឲ្យក្រុមហ៊ុនក្នុងប្រទេសជាមិត្តផ្សេងៗឲ្យអនុវត្តតាមការហាមឃាត់នេះ។ កាលពីថ្ងៃម្សិលមិញ មានសេចក្តីរាយការណ៍ថា រដ្ឋាភិបាលអាមេរិកកំពុងបញ្ចុះបញ្ចូលកូរ៉េខាងត្បូងមិនឲ្យប្រើប្រាស់ផលិតផលរបស់ក្រុមហ៊ុន Huawei។ នេះបើយោងតាមកាសែតមួយដែលបានរាយការណ៍កាលពីម្សិលមិញ។
នៅសប្តាហ៍នេះ លោកប្រធានាធិបតីអាមេរិក ដូណាល់ ត្រាំ ចេញបញ្ជាហាមឃាត់ក្រុមហ៊ុនអាមេរិកមិនផ្គត់ផ្គង់គ្រឿងផ្គុំសំខាន់ៗឲ្យក្រុមហ៊ុន Huawei និងក្រុមហ៊ុនបុត្រសម្ព័ន្ធរបស់ក្រុមហ៊ុននេះ ដោយលើកឡើងពីក្តីបារម្ភផ្នែកសន្តិសុខ តែក្រោយមកមានការពន្យារពេលការអនុវត្តនេះចំនួន ៩០ ថ្ងៃ៕ AFP/KC