.jpg)
ភ្នំពេញ: ក្រុមហ៊ុន Parkson Cambodia ដែលស្ថិតនៅក្រោមក្រុមហ៊ុន Parkson Retail Asia Ltd''s (PRA) ជាក្រុមហ៊ុនចុះបញ្ជីនៅផ្សារមូលបត្រប្រទេសសិង្ហបុរីត្រូវតម្រូវឲ្យបង់ប្រាក់ ១៤៤,៥០ លានដុល្លារ ទៅលើការខូចខាតដល់ក្រុមហ៊ុន Hassan (Cambodia)Development Co., Ltd ជាតម្លៃជួលនៅអំឡុងពេលនៃការជួលស្ថិតក្រោមកិច្ចព្រមព្រៀង។
ការតម្រូវឲ្យបង់នេះធ្វើឡើងបន្ទាប់ពីតុលាការក្រុងភ្នំពេញពីថ្ងៃទី ២២ ខែមេសា បានផ្ដល់ការវិនិច្ឆ័យប្រឆាំងនឹងក្រុមហ៊ុន Parkson Cambodia និងបានបញ្ជាឲ្យផាកពិន័យ និងការទូទាត់ការខូចខាត។ នេះបើយោងតាម TheStar កាលពីថ្ងៃចន្ទ។
សេចក្តីជូនដំណឹងបានឲ្យដឹងថា ប្រាក់តម្កល់របស់ក្រុមហ៊ុន Parkson (Cambodia) Co. Ltd និងការទូទាត់ការជួលទាំងអស់បានបង់ឲ្យក្រុមហ៊ុន Hassan (Cambodia) មានចំនួន ៤,៤៨ លានដុល្លារ ក៏នឹងត្រូវបានពិន័យដកហូតផងដែរ។
កាសែតភ្នំពេញប៉ុស្ដិ៍បានទាក់ទងក្រុមហ៊ុន Hassan (Cambodia) Development កាលពីថ្ងៃអង្គារ ប៉ុន្តែបុគ្គលិករបស់ក្រុមហ៊ុននេះបានប្រាប់ថា ពួកគេនឹងទាក់ទងពេលក្រោយ។
យោងតាម TheStar ក្រុមហ៊ុន PRA កាលពីខែវិច្ឆិកាឆ្នាំ ២០១៨ និង ខែតុលា ឆ្នាំ ២០១៩ បានប្រកាសថា ខ្លួនបានចេញសេចក្ដីជូនដំណឹងមួយអំពីមជ្ឈត្តិការទៅក្រុមហ៊ុន Hassan (Cambodia) ស្ថិតនៅក្រោមមជ្ឈមណ្ឌលមជ្ឈត្តិការអន្តរជាតិសិង្ហបុរី (SIAC) ជុំវិញការជួលនេះ។
ក្រុមហ៊ុន PRA កាលពីមុនបានប្រកាសក្នុងសេចក្ដីប្រកាសព័ត៌មានហិរញ្ញវត្ថុដែលមិនទាន់ធ្វើសវនកម្មរបស់ខ្លួនសម្រាប់ត្រីមាសទី ៤ និងរយៈពេល ១២ ខែ គិតត្រឹមថ្ងៃ ៣០ ខែមិថុនា ឆ្នាំ ២០១៩ ដែលចេញផ្សាយកាលពីថ្ងៃទី ២៧ ខែសីហា ឆ្នាំ ២០១៩ អំពីជម្លោះដែលកំពុងរង់ចាំមជ្ឈត្តិការស្ថិតក្រោម SIAC។ ក្រុមហ៊ុន Hassan (Cambodia) កាលពីថ្ងៃទី ១២ ខែធ្នូបានដាក់ញត្តិទៅសាលាដំបូងរាជធានីភ្នំពេញ។ នេះបើតាម TheStar។
ក្រុមហ៊ុន PRA ត្រូវបានដកស្រង់សម្តីដោយលើកឡើងថា៖ «មុនពេលការវិនិច្ឆ័យនេះ Parkson Cambodia បានដាក់ញត្តិប្ដឹងឧទ្ធរណ៍ទៅសាលាឧទ្ធរណ៍កម្ពុជាដើម្បីផ្ទេរយុត្តាធិការរបស់តុលាការក្រុងភ្នំពេញក្នុងការបើកសវនាការរឿងក្ដីលេខ ២៥៧៧ ទៅយុត្តាធិការមជ្ឈត្តិការ SIAC។ ញត្តិបណ្ដឹងឧទ្ធរណ៍នេះបច្ចុប្បន្នកំពុងរង់ចាំនៅសាលាឧទ្ធរណ៍កម្ពុជា»។
ក្រុមហ៊ុន Parkson Cambodia បច្ចុប្បន្នកំពុងស្វែងរកការប្រឹក្សាយោបល់ពីក្រុមមេធាវីកម្ពុជារបស់ខ្លួនថា តើត្រូវដាក់ញត្តិទុកការវិនិច្ឆ័យនេះ មួយឡែកដើម្បីប្ដឹងឧទ្ធរណ៍ទៅសាលាឧទ្ធរណ៍កម្ពុជាឬយ៉ាងណា ឬថាតើបែបបទបណ្ដឹងសើរើផ្សេងទៀតអាចធ្វើទៅបានដែរឬយ៉ាងណា? នេះបើយោងតាម TheStar៕ LA
