ភ្នំពេញៈ កំពង់ផែស្វយ័តក្រុងព្រះសីហនុ (PAS) បានប្រកាសបែងចែកភាគលាភជាង ៣ លានដុល្លារ ឬជាង ១២ ពាន់លានរៀល ដល់ភាគទុនិករបស់ខ្លួនដែលត្រូវរំពឹងថា នឹងបែងចែកនៅថ្ងៃទី ២២ ខែមិថុនា ខាងមុខ។
យោងតាមឯកសារក្រុមហ៊ុនដែលផ្ញើទៅក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ៥ ខែមិថុនា ចំនួនភាគលាភសរុបដែលត្រូវបែងចែកមានចំនួន ១២ ១៧៤ ៦៤៩ ២៧៦ រៀល ខណៈដែលអនុបាតនៃការបែងចែកភាគលាភសរុបមាន ៣១,១២ ភាគរយ ដោយក្នុងចំណោមនោះ ៩,០៣ ភាគរយ សម្រាប់ភាគហ៊ុនិកប្រភេទ «ខ» និង ២២,០៩ ភាគរយ សម្រាប់ភាគហ៊ុនិកប្រភេទ «គ» ហើយការទូទាត់នឹងត្រូវធ្វើឡើងជាសាច់ប្រាក់សុទ្ធ។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍កាលពីថ្ងៃចន្ទថា ការទូទាត់ភាគលាភនេះគឺជាការសម្រេចចិត្តសមហេតុផលមួយក្នុងការផ្តល់ចំនួន ៣១,១២ ភាគរយ ហើយភាគលាភក្នុងមួយភាគហ៊ុនសម្រាប់ភាគហ៊ុនិកប្រភេទ «គ» មានចំនួន ៤០៣,០០ រៀលស្មើនឹង ៨ ភាគរយ (ខ្ពស់ជាងភាគលាភធានា ៥ ភាគរយ) បើធៀបនឹងតម្លៃ IPO។
លោកថ្លែងថា៖ «ខណៈសេដ្ឋកិច្ចពិភពលោកដែលមិនច្បាស់លាស់នៅពេលបច្ចុប្បន្ន PAS អាចបែងចែកភាគលាភប្រហែល ២,៥ ភាគរយ (ធៀបនឹងតម្លៃទីផ្សារបច្ចុប្បន្ន) ដែលជាអត្រាដ៏ល្អមួយរួចហើយ»។
លោកលើកឡើងថា៖ «សម្រាប់ក្រសួងសេដ្ឋកិច្ច និងហិរញ្ញវត្ថុដែលជាភាគហ៊ុនិកឈានមុខគេ និងកាន់កាប់ភាគហ៊ុនប្រភេទ ខ ទទួលបានភាគលាភ ៥៤,៩២ រៀលក្នុង ១ ភាគហ៊ុនប៉ុណ្ណោះ ដែលមាន ៨២,៣៨ ភាគរយទាបជាងអ្នកកាន់កាប់ភាគហ៊ុនសាធារណៈ។ នេះមានន័យថា PAS បានដាក់កិច្ចខិតខំប្រឹងប្រែងខ្លាំង ដើម្បីថែរក្សាអត្ថប្រយោជន៍របស់ក្រុមវិនិយោគិនសាធារណៈ»។
លោកបានបញ្ជាក់ថា៖ «វាបង្ហាញពីសក្ដានុពលអាជីវកម្មដ៏រឹងមាំរបស់ PAS នៅក្នុងស្ថានការណ៍ពិបាកនេះ ខណៈដែលប្រភេទអាជីវកម្មផ្សេងៗទៀតត្រូវបានរងផលប៉ះពាល់យ៉ាងខ្លាំង។ ភាគហ៊ុនិកប្រាកដណាស់ថា នឹងពេញចិត្តជាមួយនឹងការផ្តល់ភាគលាភនេះ»៕ LA