ភ្នំពេញៈ ក្រុមហ៊ុនផ្គត់ផ្គង់ខ្សែបញ្ចូលថាមពល Pestech (Cambodia) Plc ដែលជាបុត្រសម្ព័ន្ធគ្រប់គ្រង ១០០ ភាគរយដោយក្រុមហ៊ុនមេ Pestech International Bhd មានមូលដ្ឋាននៅប្រទេសម៉ាឡេស៊ី ចុះបញ្ជីមូលបត្រកម្មសិទ្ធិរបស់ខ្លួនជាផ្លូវការនៅលើក្រុមហ៊ុនផ្សារមូលបត្រកម្ពុជា (CSX) កាលពីម្សិលមិញ ទោះបីជាស្ថិតក្នុងស្ថានភាពដ៏តានតឹងនៃការប្រយុទ្ធប្រឆាំងនឹងការរីករាលដាលជំងឺកូវីដ ១៩ ក៏ដោយ។
ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់ក្រុមហ៊ុន Pestech មានចំនួន ៥,២៦ ភាគរយ នៃភាគហ៊ុនសរុបដែលមានចំនួន ៣,៩ លានភាគហ៊ុនជាមួយនឹងតម្លៃ ៣ ១២០ រៀលក្នុង ១ ភាគហ៊ុន ឬ ៣ លានដុល្លារ។
លោក Paul Lim ប្រធានប្រតិបត្តិក្រុមហ៊ុន Pestech (Cambodia) បានឲ្យដឹងតាមរយៈសន្និសីទវីដេអូពីប្រទេសម៉ាឡេស៊ីនៅក្នុងពិធីចុះបញ្ជីផ្លូវការកាលពីថ្ងៃពុធថា ជាមួយនឹងអត្រានៃការធ្វើបរិវិសកម្មចំនួនលើស ១,៨៣ ដងនៃ IPO របស់ក្រុមហ៊ុននេះ គឺបង្ហាញទំនុកចិត្តជាសាធារណៈជុំវិញចក្ខុវិស័យរបស់ក្រុមហ៊ុន PESTECH (Cambodia)។
លោកបានឲ្យដឹងថា ចាប់តាំងពីឆ្នាំ ២០១០ ក្រុមហ៊ុន PESTECH បានកំពុងចូលរួមនៅក្នុងការសាងសង់បណ្ដាញអគ្គិសនីកម្រិតតុងស្យុងខ្ពស់នៅក្នុងប្រទេសកម្ពុជា ដើម្បីនាំយកថាមពលអគ្គិសនីទៅតំបន់ផ្សេងៗនៃប្រទេសកម្ពុជា។
លោកថ្លែងថា៖ «ដោយមានអាជីវកម្មមិនប៉ះពាល់ដល់បរិស្ថាននៅកម្ពុជា និងការចុះបញ្ជីលើ CSX ប្រកបដោយជោគជ័យក្រុមហ៊ុនមេរបស់យើងបានបង្កើតផលបត្រវិនិយោគល្អក្នុងការបន្តសម្រេចបានឱកាសដ៏ធំបន្ថែមទៀតក្នុងការផលិតថាមពលអគ្គិសនី អគ្គិសនីតាមផ្លូវដែក ការចែកចាយថាមពល អគ្គិសនី និងអាជីវកម្មអគ្គិសនីវៃឆ្លាតនៅកម្ពុជា និងការនាំចេញបន្ថែមទៀតទៅតំបន់ទន្លេមេគង្គ»។
លោកលើកឡើងទៀតថា៖ «ក្រុមហ៊ុន PESTECH (Cambodia) នៅពេលនេះ គឺជាក្រុមហ៊ុនចុះបញ្ជីនៅកម្ពុជាមួយបានប្ដេជ្ញាចិត្តថា នឹងពង្រឹងវត្តមានក្រុមហ៊ុនរបស់ខ្លួននៅក្នុងស្រុក បង្កើតឈ្មោះយីហោហេដ្ឋារចនាសម្ព័ន្ធថាមពលមានមូលដ្ឋាននៅប្រទេសកម្ពុជា ដើម្បីបម្រើតំបន់ឥណ្ឌូចិន បណ្ដុះបណ្ដាលក្រុមជំនាញវិស្វករថាមពលក្នុងស្រុក និងដើម្បីវិនិយោគលើការផលិតផលិតផលថាមពលដំឡើងក្នុងស្រុក ប្រសិនបើឱកាសផ្ដល់ឲ្យ»។
លោក ហុង សុខហួរ អគ្គនាយក CSX បានឲ្យដឹងថាជាមួយនឹងការចុះបញ្ជីនេះក្រុមហ៊ុននឹងប្រមូលមូលនិធិចំនួន ៣ លានដុល្លារជាមួយនឹងតម្លៃ IPO ៣ ១២០ រៀល ក្នុង ១ ភាគហ៊ុន ហើយវានឹងបម្រើជាប្រភពថ្មីនៃមូលនិធិសម្រាប់ក្រុមហ៊ុនក្នុងការវិនិយោគបន្ថែម និងពង្រីកអាជីវកម្មនៅកម្ពុជា។
លោកបញ្ជាក់ថា៖ «ការប្រមូលមូលនិធិតាមរយៈទីផ្សារមូលធននេះនឹងក្លាយជាមធ្យោបាយអាទិភាពសម្រាប់ក្រុមហ៊ុនធុនតូច និងមធ្យម ដើម្បីលើកកម្ពស់ និងពង្រីកអាជីវកម្មរបស់ពួកគេនៅពេលអនាគត។ ការប្រមូលមូលនិធិនេះនឹងជាថ្នូរនៃជម្រើសដោយទំនុកចិត្តចំពោះក្រុមវិនិយោគិនសក្ដានុពល ដែលកំពុងស្វែងរកការវិនិយោគ ឬចង់ប្រើប្រាស់ប្រាក់លើសចំនួនរបស់ពួកគេក្នុងការស្វែងរកប្រាក់ចំណេញនៅក្នុងរយៈពេលខ្លី និងរយៈពេលវែង»។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា (SECC) បាននិយាយថា ក្រុមហ៊ុន Pestech កំពុងធ្វើការងារលើគម្រោង IPO ក្នុងរយៈពេលជាច្រើនឆ្នាំ ប៉ុន្តែពួកគេមិនបានបោះបង់នោះទេ។
លោកបន្តថា៖ «មែនទែនទៅយើងមិនរំពឹងថា IPO របស់ក្រុមហ៊ុន Pestech ទទួលបានការធ្វើបរិវិសកម្មលើសចំនួននោះទេ ក្នុងអំឡុងពេលវេលាដ៏ពិបាកដោយសារតែការរីករាលដាលជំងឺកូវីដ ១៩»។
លោកបន្ថែមថា៖ «Pestech គឺជាក្រុមហ៊ុនដំបូងដែលមានក្រុមហ៊ុនមេចុះបញ្ជីនៅក្នុងប្រទេសម៉ាឡេស៊ី និងជាក្រុមហ៊ុនទី ៧ ដែលចុះបញ្ជីមូលបត្ររបស់ខ្លួនលើ CSX។ ខ្ញុំជឿជាក់លើក្រុមហ៊ុន Pestech នឹងនាំយកបទពិសោធលើការចុះបញ្ជីរបស់ពួកគេនៅម៉ាឡេស៊ីមកអនុវត្តនៅទីនេះ»។
យោងតាមលោក សុខហួរ រហូតមកដល់ពេលនេះ CSX មានក្រុមហ៊ុនចុះបញ្ជី ១៣ ក្នុងចំណោមនោះ ក្រុមហ៊ុន ៧ ចុះបញ្ជីមូលបត្រកម្មសិទិ្ធ និងក្រុមហ៊ុន ៦ ចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១៣ នេះបានប្រមូលមូលនិធិប្រហែល ២៤៣ លានដុល្លារ។ ត្រឹមបញ្ចប់ឆមាសទី ១ ឆ្នាំនេះ ទំហំមូលធននូបនីយកម្មទីផ្សារមូលបត្របានកើនឡើងដល់ ២,៥៧ ពាន់លានដុល្លារ ដោយកើនឡើងចំនួន ៤,៥ ដងបើប្រៀបធៀបនឹងរយៈពេលដូចគ្នាកាលពីឆ្នាំមុន៕LA