ភ្នំពេញៈ គណៈកម្មការមូលបត្រកម្ពុជា (SECC) បានផ្តល់ការអនុញ្ញាតលើសំណើបោះផ្សាយលក់មូលបត្រជាសាធារណៈរបស់ក្រុមហ៊ុន Pestech (Cambodia) ដែលជាការបើកផ្លូវឲ្យក្រុមហ៊ុនប្រមូលដើមទុនពីសាធារណជនតាមរយៈការលក់ភាគហ៊ុន និងក្លាយជាក្រុមហ៊ុនទី ៦ ដែលចុះបញ្ជីក្នុងផ្សារភាគហ៊ុនកម្ពុជា។
Pestech (Cambodia) គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Pestech International Bhd ដែលចុះបញ្ជីក្នុងផ្សារហ៊ុនម៉ាឡេស៊ីគ្រោងនឹងប្រមូលដើមទុនប្រមាណ ២០ លានដុល្លារតាមរយៈ IPO នៅក្នុងទីផ្សារគោលរបស់ផ្សារមូលបត្រកម្ពុជា (CSX)។ កាលពីខែមុនក្រុមហ៊ុនបានទទួលការឯកភាពលើពាក្យស្នើសុំពិនិត្យលទ្ធភាពចុះបញ្ជីពី CSX រួចហើយ។
លោក អ៊ីវ រ៉ាណ្ណារិទ្ធ នាយកប្រតិបត្តិក្រុមហ៊ុន អ អេចបី ឥណ្ឌូឆៃណា ស៊ីឃ្យូរីធី ដែលជាក្រុមហ៊ុនធានាទិញមូលបត្ររបស់ Pestech (Cambodia) បានលើកឡើងថាការទទួលបានការអនុញ្ញាតពី SECC នេះនឹងបើកផ្លូវឲ្យក្រុមហ៊ុននេះ ដំណើរការនីតិវិធី IPO ហើយក្រុមហ៊ុននឹងរៀបចំការធ្វើ ប៊ុកបៀលឌីង និងការរៀបចំសំណើ លក់ និងចុះបញ្ជីឯកសារផ្តល់ព័ត៌មានជាស្ថាពរអនុលោមតាមច្បាប់។
លោកថ្លែងថា៖ «ក្រុមហ៊ុនបានឆ្លងកាត់ដំណាក់កាលដ៏សំខាន់រួចហើយ អ៊ីចឹងការធ្វើ IPO និងការចុះបញ្ជីជួញដូរភាគហ៊ុនជាផ្លូវការនៅលើផ្សារហ៊ុន (CSX) នឹងកើតឡើងនៅក្នុងឆ្នាំនេះ»។
យោងតាមលោក រ៉ាណ្ណារិទ្ធ Pestech (Cambodia) គ្រោងយកដើមទុនប្រមូលបានពី IPO នេះទៅពង្រីកសមត្ថភាពផលិតកម្មលើគម្រោងដែលមានស្រាប់ និងការពង្រឹងសមត្ថភាពសម្រាប់គម្រោងនាពេលអនាគត។ លោកបន្តថាក្រុមហ៊ុនក៏គ្រោងពង្រីកប្រតិបត្តិការទៅមីយ៉ាន់ម៉ា និង ឡាវផងដែរ។
លោក រ៉ាណ្ណារិទ្ធ មិនអាចបង្ហាញពេលវេលាជាក់លាក់សម្រាប់ការធ្វើប៊ុកបៀលឌីង និងការធ្វើបរិវិសកម្ម ប៉ុន្តែបានថ្លែងថា ក្រុមហ៊ុននេះនឹងធ្វើទីផ្សារនៅក្នុងប្រទេស និងនៅក្រៅប្រទេស។
លោកថ្លែងថា៖ «យើងរំពឹងថា ក្រុមហ៊ុនចុះបញ្ជីថ្មីនេះនឹងបង្កើនសកម្មភាពជួញដូរនៅទីផ្សារនេះ ដោយសារតែ Pestech ជាក្រុមហ៊ុនដែលវិនិយោគខាងហេដ្ឋារចនាសម្ព័ន្ធថាមពលអគ្គិសនី និងមានក្រុមហ៊ុនមេមួយដែលបានចុះបញ្ជីរួចហើយនៅផ្សារហ៊ុនរបស់ម៉ាឡេស៊ី»។
លោក ល្មុន សូឡី ប្រធាននាយកដ្ឋានចុះបញ្ជី និងផ្តល់ព័ត៌មាននៃផ្សារមូលបត្រកម្ពុជាបានថ្លែងថា វាជាដំណើរមួយដ៏ល្អសម្រាប់ផ្សារមូលបត្រក្នុងការស្វាគមន៍ Pestech ហើយរំពឹងថាការចុះបញ្ជីផ្លូវការរបស់ក្រុមហ៊ុន Pestech នឹងរួមចំណែកក្នុងការបង្កើនសកម្មភាពជួញដូរ។
លោកថ្លែងថា៖ «បន្ទាប់ពីទទួលបានការយល់ព្រមពី SECC ក្រុមហ៊ុន Pestech និងភ្នាក់ងារធានាទិញមូលបត្ររបស់ខ្លួន នៅពេលនេះអាចកំណត់តម្លៃភាគហ៊ុនរបស់ខ្លួន ហើយបន្ទាប់មកនឹងលក់ភាគហ៊ុនឲ្យក្រុមវិនិយោគិនមានសក្ដានុពល»។
Pestech បានបញ្ចប់គម្រោងខ្សែបញ្ជូនថាមពលកម្ពុជាលើកដំបូងរបស់ខ្លួនកាលពីខែមិថុនាឆ្នាំ ២០១៣។ ក្រុមហ៊ុននេះបានពង្រឹងវត្តមានរបស់ខ្លួននៅកម្ពុជា ជាមួយនឹងកិច្ចព្រមព្រៀងរចនា ផលិត និងដំឡើងខ្សែបញ្ជូនអគ្គិសនី ១៩៨ គីឡូម៉ែត្រ ដែលតភ្ជាប់ទីក្រុងភ្នំពេញ និងក្រុងព្រះសីហនុ។
កាលពីឆ្នាំ ២០១៥ ក្រុមហ៊ុននេះបានទទួលកិច្ចព្រមព្រៀងតម្លៃ ៩២ លានដុល្លារ ដើម្បីអភិវឌ្ឍខ្សែបញ្ជូនអគ្គិសនី រវាងខេត្តក្រចេះ និងខេត្តកំពង់ចាម។
កាលពីឆ្នាំមុន ក្រុមហ៊ុននេះទទួលបានកិច្ចព្រមព្រៀងក្នុងការសាងសង់ខ្សែបញ្ជូនអគ្គិសនី ២៣០ គីឡូវ៉ុល មានតម្លៃ ១០០ លានដុល្លារ តភ្ជាប់ទំនប់វារីអគ្គិសនីស្ទឹងតាតៃរបស់ខេត្តកោះកុងទៅទីក្រុងភ្នំពេញ៕LA