.jpg)
PESTECH នឹងបោះផ្សាយមូលបត្រកម្មសិទ្ធិនៅខែក្រោយ ក្នុងការប្រមូលមូលនិធិប្រមាណ ៣ លានដុល្លារ សម្រាប់ពង្រីកអាជីវកម្មរបស់ខ្លួននៅកម្ពុជា។ Pestech Cambodia
ភ្នំពេញៈ ទោះបីជាការរីករាលដាលជំងឺកូវីដ ១៩ កំពុងរួតរឹតសេដ្ឋកិច្ចក៏ដោយ ក្រុមហ៊ុន PESTECH (Cambodia)Plc ដែលជាបុត្រសម្ព័ន្ធរបស់ Pestech International Bhd របស់ម៉ាឡេស៊ីបានបង្ហាញការចាប់ផ្តើមផ្សព្វផ្សាយជាផ្លូវការកាលពីថ្ងៃចន្ទ ឆ្ពោះទៅកាន់ការចុះបញ្ជីលើផ្សារមូលបត្រកម្ពុជា (CSX) ដែលគ្រោងធ្វើនៅថ្ងៃទី ១២ ខែសីហា ក្នុងការប្រមូលមូលនិធិប្រមាណ ៣ លានដុល្លារ សម្រាប់ពង្រីកអាជីវកម្មរបស់ខ្លួននៅកម្ពុជា។
លោក Lim Pay Chuan ប្រធានក្រុមប្រឹក្សាប្រតិបត្តិរបស់ PESTECH (Cambodia) PLC បានឲ្យដឹងថា ក្រុមហ៊ុនបានបង្កើតឡើងដំបូងនៅក្នុងប្រទេសកម្ពុជា ក្នុងឆ្នាំ ២០១០។ លោកបានកត់សម្គាល់ថា ការប្រើប្រាស់ថាមពលរបស់ប្រទេសកម្ពុជាបានកើនឡើងពី ៤ ០៥១ ជីហ្គាវ៉ាត់ម៉ោង (GWh) កាលពីឆ្នាំ ២០១៣ ដល់ ១២ ០១៥ GWh កាលពីឆ្នាំ ២០១៩ នៅក្នុងអត្រាកំណើនប្រចាំឆ្នាំរួមចំនួន ១៩,៩ ភាគរយ និងតម្រូវការត្រូវព្យាករថានឹងកើនឡើង ១៦ ភាគរយដល់ ១៣ ៩៨១ GWh ក្នុងឆ្នាំ ២០២០។
លោកបានឲ្យដឹងថា ស្ថិតក្រោមការអភិវឌ្ឍផលិតកម្មថាមពលឆ្នាំ ២០១៩-២០២៥ រដ្ឋាភិបាលកម្ពុជាគ្រោងនឹងបង្កើនសមត្ថភាពផលិតថាមពលក្នុងស្រុកពី ១ ៦៥៧ MW កាលពីឆ្នាំ ២០១៥ កើនដល់ ៤ ៤៩៨ MW ក្នុងឆ្នាំ ២០២៥ ហើយរដ្ឋាភិបាលក៏គ្រោងនឹងសាងសង់ខ្សែបញ្ជូនថាមពលអគ្គិសនីបន្ថែម ១ ៧៥០ គីឡូម៉ែត្រត្រឹមឆ្នាំ ២០២៥ ដែលនឹងបង្កើនការប្រើប្រាស់ថាមពលអគ្គិសនីជាតិចំនួន ៧៧,២ ភាគរយដល់ ៤ ០១៧ គីឡូម៉ែត្រ។
លោកបានឲ្យដឹងថា៖ «PESTECH (Cambodia) គឺស្ថិតនៅក្នុងទីតាំងល្អ និងបានចាប់ផ្ដើមទទួលអត្ថប្រយោជន៍ពីកំណើនការប្រើប្រាស់ថាមពលអគ្គិសនី និងពីផែនការរបស់ប្រទេសកម្ពុជា ក្នុងការអភិវឌ្ឍហេដ្ឋារចនាសម្ព័ន្ធអគ្គិសនីនៅក្នុងរយៈពេល ៥ ឆ្នាំក្រោយ»។
លោក Lim លើកឡើងបន្តទៀតថា៖ «ការចុះបញ្ជីនៅផ្សារមូលបត្រកម្ពុជានឹងផ្ដល់ឱកាសសម្រាប់សាធារណជនកម្ពុជា ដើម្បីវិនិយោគលើឧស្សាហកម្មថាមពលជាមួយគ្នានឹងកំណើនតម្រូវការថាមពលអគ្គិសនីនៅក្នុងតំបន់ទន្លេមេគង្គ។ តំបន់នេះនឹងរួមចំណែកក្នុងការអភិវឌ្ឍក្រុមហ៊ុន PESTECH Cambodia បន្ថែមទៀតទាក់ទងនឹងការវិនិយោគ និងការបង្កើនទ្រព្យសកម្មនៅកម្ពុជាដើម្បីបម្រើទីផ្សារឥណ្ឌូចិនរបស់ក្រុមហ៊ុន»។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍ថា ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់ក្រុមហ៊ុន Pestech (Cambodia) មានចំនួន ៥,២៦ ភាគរយនៃចំនួនភាគហ៊ុនបោះផ្សាយសរុបដែលមានចំនួន ៣,៩ លានភាគហ៊ុន ដោយរំពឹងថា តម្លៃ IPO មានចំនួន ០,៧៦ ដុល្លារក្នុង ១ ភាគហ៊ុន។ ទាក់ទងនឹងចំនួនមូលនិធិសរុបដែលប្រមូលបានពីទីផ្សារនេះប្រហែល ៣ លានដុល្លារ។
លោកថ្លែងថា៖ «ក្រុមហ៊ុននេះមានផែនការ និងយុទ្ធសាស្ដ្រអាជីវកម្មរយៈពេលវែង ដែលរួមការលើកកម្ពស់តួនាទីទីផ្សារនៅក្នុងទីផ្សារខ្សែបញ្ជូនថាមពល និងការចែកចាយ មិនគ្រាន់តែប្រទេសកម្ពុជាប៉ុណ្ណោះទេ ប៉ុន្តែថែមទាំងនៅតាមបណ្ដាប្រទេសជិតខាងផងដែរ»។
លោក ហុង សុខហួរ អគ្គនាយក CSX បានឲ្យដឹងដែរថា ក្រុមហ៊ុន PESTECH (Cambodia) នឹងក្លាយជាក្រុមហ៊ុនចុះបញ្ជីមូលបត្រទី ១៣ នៅផ្សារមូលបត្រកម្ពុជា និងជាក្រុមហ៊ុនចុះបញ្ជីមូលបត្រកម្មសិទ្ធិទី ២ នៅឆ្នាំនេះ ដើម្បីប្រមូលមូលនិធិតាមរយៈការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ។
លោកបន្តថា ក្នុងចំណោមក្រុមហ៊ុនចុះបញ្ជីមូលបត្រទាំង ១២ នៅលើ CSX មាន ៦ ជាក្រុមហ៊ុនចុះបញ្ជីភាគហ៊ុន។ ក្រុមហ៊ុនទាំង ១២ នោះបានប្រមូលមូលនិធិសរុបប្រហែល ២៤០ លានដុល្លារពីទីផ្សារ។
កាលពីចុងខែមិថុនាឆ្នាំ ២០២០ មូលធនីយកម្មទីផ្សាររបស់ CSX បានកើនឡើងដល់ប្រហែល ២,៥៧ លានដុល្លារ ៤,៥ ដងខ្ពស់ជាងឆ្នាំមុន ខណៈដែលសន្ទស្សន៍បានកើនឡើង ១២ ភាគរយក្នុងរយៈពេលដូចគ្នានេះ។
លោក សុខហួរ លើកឡើងថា៖ «និន្នាការនេះបង្ហាញថា CSX កំពុងរីកចម្រើនទោះបីជា សេដ្ឋកិច្ចកំពុងទទួលរងផលប៉ះពាល់ដោយសារតែការរីករាលដាលជំងឺកូវីដ១៩ទូទាំងពិភពលោកនៅឆ្នាំនេះក៏ដោយ។ ខ្ញុំសូមលើកទឹកចិត្តដល់ក្រុមហ៊ុនទាំងឡាយធ្វើពិពិធកម្មប្រភពហិរញ្ញវត្ថុរបស់ពួកគេ គឺមិនត្រូវពឹងផ្អែកតែទៅលើកម្ចីពីធនាគារ ដែលនឹងក្លាយជាបន្ទុកដ៏ធំមួយ ឬថែមទាំងជាការវាយប្រហារដ៏ខ្លាំងមួយ នៅពេលមានវិបត្តិដូចវិបត្តិដូចដែលយើងកំពុងជួបប្រទះនៅពេលនេះ»។
យោងតាមក្រុមហ៊ុន PESTECH (Cambodia) ក្រុមហ៊ុននេះចាប់ផ្ដើមបើកដំណើរការ ធ្វើបរិវិសកម្មជាសាធារណៈចាប់ពីថ្ងៃទី ២៧ ខែកក្កដា នេះ និងបិទបញ្ចប់នៅថ្ងៃទី ៤ ខែសីហា ខណៈដែលការបែងចែកភាគហ៊ុន IPO ដល់អ្នកដាក់ពាក្យដែលទទួលបានជោគជ័យនៅថ្ងៃទី ៧ ខែសីហា។ ក្រុមហ៊ុននេះគ្រោងនឹងចុះបញ្ជីជាផ្លូវការលើផ្សារហ៊ុន CSX នៅថ្ងៃទី ១២ ខែសីហា ឆ្នាំ ២០២០៕LA
