.jpg)
មន្ត្រី CSX ពន្យល់ព័ត៌មានផ្សារហ៊ុនពេលសម្ពោធការចុះបញ្ជី Pestech Cambodia។ CSX
ភ្នំពេញៈ Pestech (Cambodia) Plc [PCL] ដែលជាក្រុមហ៊ុនផ្គត់ផ្គង់ខ្សែបញ្ចូនថាមពល និងដែលបានចុះបញ្ជីនៅក្រុមហ៊ុនផ្សារមូលបត្រកម្ពុជា (CSX) បានរាយការណ៍ទទួលបានកំណើនទាបនៃប្រតិបត្តិការអាជីវកម្មនៅត្រីមាសទី១ ឆ្នាំនេះ ជាមួយនឹងប្រាក់ចំណូលសរុបបានកើនឡើង ៨,០២ ភាគរយ ចំពេលសម្ពាធសេដ្ឋកិច្ចដែលបានបណ្ដាលមកពីការរីករាលដាលជំងឺកូវីដ ១៩។
យោងតាមឯកសាររបស់ក្រុមហ៊ុនផ្ញើទៅ CSX កាលពីថ្ងៃទី ១៨ ខែមេសានៅត្រីមាសទី១ ឆ្នាំ ២០២១ ប្រាក់ចំណូលសរុបរបស់ក្រុមហ៊ុន PCL មានចំនួន ៥២ ៥៦៤ លានរៀល (១២,៩៥០ លានដុល្លារ) ដែលតំណាងឱ្យកំណើន ៣ ៩០១ លានរៀល (០,៩៧៣ លានដុល្លារ) ឬ ៨,០២ ភាគរយ ធៀបនឹង ៤៨ ៦៦៣ លានរៀល (១១,៩៧៧ លានដុល្លារ) នៅក្នុងរយៈពេលដូចគ្នាកាលពីត្រីមាសទី ១ នៃឆ្នាំ ២០២០។
លោក Han Fatt Juan អគ្គនាយកក្រុមហ៊ុនបានឱ្យដឹងថា ក្នុងអំឡុងពេលត្រីមាសនេះក្រុមហ៊ុន PCL បានប្រតិបត្តិការការងារយ៉ាងខ្លាំងនៅអណ្ដូងរ៉ែមាសអូរខ្វាវនៅខេត្តមណ្ឌលគិរី។
លោកបានបញ្ជាក់ថា ការសាងសង់គម្រោងរ៉ែអូរខ្វាវ ត្រូវបានបញ្ចប់នៅខែមេសា ឆ្នាំ ២០២១ ជាមួយនឹងបេសកកម្មក្នុងការអនុវត្តជាបន្តទៅទៀត។
ជាមួយគ្នានេះដែរ ក្រុមហ៊ុននេះក៏កំពុងធ្វើការងារយ៉ាងសកម្មលើកសិដ្ឋាន សូឡាដែលមានទំហំ ២០ មេហ្គាវ៉ាត់ ស្ថិតនៅក្រុងបាវិត ខេត្តស្វាយរៀងជាមួយការងារស៊ីវិលបឋមត្រូវបានអនុវត្តជាបណ្ដើរៗ ហើយការបញ្ជាទិញសម្ភារ និងគ្រឿងបង្គុំសំខាន់ៗត្រូវបានធ្វើឡើងសម្រាប់ការចែកចាយជាយថាហេតុ នៅត្រីមាសទី៤ ឆ្នាំ ២០២១ តទៅ។
ម្យ៉ាងវិញទៀត លោកបានឱ្យដឹងថា នៅភាគខាងកើតខេត្តសៀមរាប គម្រោងខ្សែបញ្ចូនថាមពលប្រវែង ១៣០ គីឡូម៉ែត្រនៅឧត្តរមានជ័យ ការងារត្រូវបានធ្វើឡើងជាប្រចាំ ជាមួយនឹងការសាងសង់គ្រឹះនៅទីតាំងនេះត្រូវបានកំណត់។ ការចែកចាយសម្ភារត្រូវបានរំពឹងថា នឹងធ្វើឡើងនៅ ២ ឬ ៣ ត្រីមាសក្រោយ ដែលបន្ទាប់មកនឹងបន្តដំឡើងបង្គោលខ្សែបញ្ចូនថាមពល និងឧបករណ៍ចម្លងអគ្គិសនី។
លោកថ្លែងថា៖ «យើងសង្ឃឹមថា យើងនឹងបន្តសកម្មភាពប្រតិបត្តិគម្រោងនេះ ចំពេលមានការផ្ទុះឡើងការរីករាលដាលជំងឺកូវីដ ១៩ និងខិតខំធ្វើការងារជាមួយអាជ្ញាធរពាក់ព័ន្ធក្នុងការធានា បរិស្ថានការងារប្រកបដោយសុវត្ថិភាព សម្រាប់សមាជិកក្រុមទាំងអស់របស់យើង»។
លោកបន្តថា៖ «ក្រុមហ៊ុន PCL ក៏ត្រូវបានប្រគល់ភារកិច្ចអនុវត្តផ្នែកការងារមួយចំនួននៃគម្រោងខ្សែបញ្ចូនថាមពលទីក្រុងភ្នំពេញប្រវែង ២៣០ គីឡូម៉ែត្រ និងគម្រោងពង្រីកប្រព័ន្ធចែកចាយថាមពលអគ្គិសនីដំណាក់កាលទី ២ នៅកណ្ដាលទីក្រុងភ្នំពេញ។
គម្រោងនេះទាក់ទងនឹងការប្រើប្រាស់ម៉ាស៊ីនខួងតាមទិសផ្ដេក (HDD) ដែលនឹងមានសមត្ថភាពនៃការធ្វើឱ្យរំខានតិចតួចបំផុតចំពោះការធ្វើចរាចរណ៍ និងការធ្វើដំណើររបស់អ្នកថ្មើរជើង៕LA
