.jpg)
រដ្ឋលេខាធិការក្រសួងសាធារណៈការ ចាប់ដៃជាមួយអគ្គនាយក Pi Pay ក្រោយចុះកិច្ចព្រមព្រៀងជាមួយគ្នា កាលពីម្សិលមិញ។ ហេង ជីវ័ន
ភ្នំពេញៈ ក្រុមហ៊ុន Pi Pay ដែលជាក្រុមហ៊ុនទូទាត់ដោយគ្មានសាច់ប្រាក់ កាលពីថ្ងៃម្សិលមិញបានចុះកិច្ចព្រមព្រៀងជាមួយក្រសួងសាធារណការ និងដឹកជញ្ជូន (MPWT) លើការទូទាត់ដោយគ្មានសាច់ប្រាក់នូវរាល់សេវារបស់ក្រសួងទាំងអស់។
សម្រាប់កិច្ចព្រមព្រៀងនេះនឹងមានន័យថាការទូទាត់សេវារបស់ MPWT ទាំងអស់ ដូចជាការទិញសំបុត្រសេវាដឹកជញ្ជូនសាធារណៈ និងការចុះបញ្ជីរថយន្តនៅក្រសួងអាចធ្វើឡើងតាមរយៈក្រុមហ៊ុន Pi Pay។
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនបានថ្លែងថា៖ «តាមរយៈការប្រើប្រាស់ប្រព័ន្ធទូទាត់ដោយគ្មានសាច់ប្រាក់ យើងសង្ឃឹមថានឹងកែលម្អប្រសិទ្ធភាពសេវាសាធារណៈ ដោយការលុបចោលការបង់ប្រាក់ក្រៅផ្លូវការ ហើយនឹងផ្ដល់សេវាងាយស្រួលសម្រាប់ប្រជាជនរបស់យើង»។
លោកបន្ថែមថា៖ «ពួកគេអាចបង់ប្រាក់ដោយផ្ទាល់តាមរយៈអនឡាញជាមួយនឹង Pi Pay ដែលមិនចាំបាច់តម្រង់ជួរដើម្បីបង់ប្រាក់ទៀតទេ»។
សេវាសាធារណៈដែលបានផ្ដល់ដោយ MPWT រួមមានសេវាត្រួតពិនិត្យបច្ចេកទេសយានយន្ត ការប្រឡងបើកបរ និងអាជ្ញាប័ណ្ណសម្រាប់អាជីវកម្មដឹកជញ្ជូនជាដើម។
ការទូទាត់គ្មានសាច់ប្រាក់ដែលធ្វើឡើងជាមួយក្រុមហ៊ុន Pi Pay នេះ មិនមែនជាវិធានការលើកដំបូងនោះទេ សម្រាប់ក្រសួង ប៉ុន្តែក្រសួងមានកិច្ចព្រមព្រៀងរួចហើយជាមួយក្រុមហ៊ុនទូទាត់គ្មានសាច់ប្រាក់ផ្សេងទៀត ដូចជា វីង លីហួរ និង Smart Pay។
លោក Tomas Pokorny អគ្គនាយកក្រុមហ៊ុន Pi Pay បានថ្លែងថា ភាពជាដៃគូជាមួយ MPWT គឺជាជំហានដ៏ធំឆ្ពោះទៅការបង្កើនការប្រើប្រាស់បច្ចេកវិទ្យាទូទាត់ដោយគ្មានសាច់ប្រាក់នៅក្នុងប្រទេសកម្ពុជា និងការមើលឃើញកិច្ចសហប្រតិបត្តិការជាមួយក្រសួងក្នុងការពង្រីកទូទាំងប្រទេសសម្រាប់សេវារបស់ក្រសួងនៅក្នុង ២៥ ខេត្តក្រុង។
ដោយបានដំណើរការនៅប្រទេសកម្ពុជាកាលពីខែមិថុនាមុន Pi Pay បានសហការជាមួយពាណិជ្ជករលក់រាយរាប់ពាន់នាក់ដូចជា ហាងកាហ្វេ ហាងលក់ទំនិញ និងគ្រឹះស្ថានផ្សេងទៀតជាច្រើន។
ក្រុមហ៊ុន Pi Pay ក៏កំពុងបង្កើតបណ្ដាញនៃភាពជាដៃគូធនាគារដែលអាចឲ្យប្រជាជនដាក់ប្រាក់បញ្ញើពីកម្មវិធី Pi Pay របស់ពួកគេនៅក្នុងគណនីធនាគាររបស់ពួកគេ ឬបញ្ចូលប្រាក់ជាថ្មីក្នុងកម្មវិធីរបស់ពួកគេពីគណនីរបស់ពួកគេផងដែរ។
លោក Tomas Pokorny បានថ្លែងថា៖ «យើងនឹងផ្ដល់សេវាជាច្រើនដែលមិនគ្រាន់តែការទូទាត់ដោយគ្មានសាច់ប្រាក់នោះទេ យើងនឹងផ្ដោតលើដំណោះស្រាយឌីជីថលផ្សេងទៀតសម្រាប់ការទូទាត់ផងដែរ»។
ភាពជាដៃគូដូចនេះជាមួយក្រសួងដែលសម្លឹងឆ្ពោះទៅមុខ និងប្រកបដោយថាមពលនឹងជំរុញប្រជាជនកម្ពុជាកាន់តែច្រើនឲ្យទទួលយកភាពងាយស្រួល និងសុវត្ថិភាពនៃការគ្មានសាច់ប្រាក់នៅក្នុងគ្រប់ទិដ្ឋភាពទាំងអស់នៃការរស់នៅរបស់ពួកគេ កែបង្កើនការរួមបញ្ជូលហិរញ្ញវត្ថុ និងការជំរុញចំណេះដឹងផ្នែកហិរញ្ញវត្ថុរបស់ប្រជាជន។ នេះបើយោងតាមលោក Tomas Pokorny ។
លោកថ្លែងថា បច្ចុប្បន្នមានអ្នកប្រើប្រាស់ជាង ២៥០ ០០០ នាក់ និងពាណិជ្ជករជាង ២ ០០០ នាក់ដែលកើនឡើងជារៀងរាល់ថ្ងៃ៕LA
