.jpg)
កសិករកំពុងឲ្យចំណីមាន់ដែលចិញ្ចឹមជាលក្ខណៈគ្រួសារនៅខេត្តព្រៃវែងនាពេលកន្លងមក។ រូបថត ហុង មិនា
ភ្នំពេញៈ និន្នាការកសិដ្ឋានចិញ្ចឹមមាន់លក្ខណៈគ្រួសារ បានមើលឃើញកំណើន បន្ទាប់ពីគម្រោងរយៈពេល ២ ឆ្នាំ ដែលផ្ដល់មូលនិធិ ១,៣៥ លានដុល្លារ ដោយសហភាពអឺរ៉ុប។ នេះបើតាម People in Need Cambodia (PIN) ដែលជាអង្គការមិនមែនរដ្ឋាភិបាល និងមិនស្វែងរកប្រាក់ចំណេញ។
សេចក្ដីប្រកាសព័ត៌មាននេះ ត្រូវបានលើកឡើងនៅក្នុងសិក្ខាសាលាស្តីពីការចិញ្ចឹមសត្វ ដែលរៀបចំដោយ អង្គការ PIN កាលពីម្សិលមិញ។ សិក្ខាសាលានេះមានបំណងចែករំលែកមេរៀនដែលបានរៀនសូត្រ និងសមិទ្ធផលសំខាន់ៗតាមរយៈការអនុវត្តគម្រោង។
បន្ទាប់ពីរយៈពេល ២ ឆ្នាំនៃការអនុវត្តគម្រោងនេះ ការចិញ្ចឹមមាន់លក្ខណៈគ្រួសារ កើនឡើងជិត ៩០ ភាគរយបើគិតលើចំនួនសត្វមាន់ ខណៈការរកចំណូលកើន ៥០ ភាគរយ ធៀបនឹងពេលមុន។ នេះបើតាមប្រធានគម្រោងនៅ PIN។
លោក ជួន ប៊ុណ្ណារ៉ា ប្រធានគម្រោងវិស័យបសុសត្វនៃកម្មវិធីមុខរបរចិញ្ចឹមជីវិត និងបរិស្ថាន នៃអង្គការ PIN បានឲ្យដឹងក្នុងអំឡុងសិក្ខាសាលាថា គោលបំណងសំខាន់របស់គម្រោងនេះ គឺដើម្បីលើកកម្ពស់ប្រាក់ចំណូលរបស់កសិករ។
លោកថ្លែងថា៖ «តាមរយៈគម្រោងនេះ កសិករទទួលបានបច្ចេកទេស ផែនការអាជីវកម្ម និងផែនការទីផ្សារ ព្រមទាំងការបង្កើតបណ្ដាញ និងការសហការជាមួយក្រុមរបស់ពួកគេ»។
លោកបន្តថា៖ «ដូច្នេះកសិករបានរៀនសូត្រពីរបៀបក្នុងការធ្វើកសិដ្ឋានដើម្បីឆ្លើយតបតាមតម្រូវការទីផ្សារ»។
លោក ប៊ុណ្ណារ៉ា បានឲ្យដឹងថា ជាលទ្ធផលការពង្រីកកសិដ្ឋានចិញ្ចឹមមាន់លក្ខណៈគ្រួសារកើនឡើងដល់ ៨៩ ភាគរយ។
មានគ្រួសារជាង ១ ម៉ឺននាក់ មកពី ៨ ខេត្ត កំពុងស្ថិតក្រោមគម្រោងនេះកសិករទាំងនោះមកពីខេត្ត បាត់ដំបង កំពង់ឆ្នាំង ពោធិ៍សាត់ កំពង់ស្ពឺ តាកែវ កំពត ព្រៃវែង និងស្វាយរៀង។
លោកស្រី អុក សាវិន អគ្គនាយករងនៃអគ្គនាយកដ្ឋានសុខភាព និងផលិតកម្មសត្វ បានឲ្យដឹងថា ការផ្គត់ផ្គង់សាច់ក្នុងស្រុក មិនគ្រប់គ្រាន់ ហើយកម្ពុជាត្រូវការនាំចូល ដើម្បីឆ្លើយតបតាមតម្រូវការ។
លោកស្រីថ្លែងថា៖ «យើងនៅតែត្រូវការការនាំចូលមាន់ ដោយសារតែមាន់ក្នុងស្រុកបានធ្លាក់ចុះ ចាប់តាំងពីក្រុមយុវជនបោះបង់ចោលទៅធ្វើការងារនៅក្នុងរោងចក្រកាត់ដេរ»។
លោកស្រីបានបន្តថា៖ «ប៉ុន្តែ ដោយសារតែកង្វះការផ្គត់ផ្គង់ យើងបានបង្កើតគោលនយោបាយ និងផែនការយុទ្ធសាស្ដ្រ តាមរយៈការផ្ដល់បច្ចេកទេស និងការបណ្ដុះបណ្ដាលដល់កសិករ ពីរបៀបក្នុងការទទួលបានការផលិតខ្ពស់ និងចំណាយកាន់តែតិច ព្រមទាំងរកប្រាក់ចំណូលបានច្រើនជាងការងារចំណាកស្រុក»។
លោក ថាន់ ពន្លក ជាកសិករអាយុ ៣០ ឆ្នាំមកពីខេត្ត តាកែវ ដែលបានចូលរួមសិក្ខាសាលានេះកាលពីម្សិលមិញ បានឲ្យដឹងថា បន្ទាប់ពីការចូលរួមក្នុងគម្រោងនេះ ចំណូលលោកបានមើលឃើញពីការផ្លាស់ប្តូរយ៉ាងខ្លាំង។
លោកថ្លែងថា៖ «ខ្ញុំអាចផ្គត់ផ្គង់ទីផ្សារបានជាទៀងទាត់ និងរកប្រាក់ចំណូលបានចាប់ពី ៤ លានរៀលដល់ ៥ លានរៀល ហើយជាមួយនឹងប្រាក់ចំណូលនេះ ខ្ញុំមិនបារម្ភពីគ្រួសាររបស់ខ្ញុំនោះទេ»។
លោក ពន្លក បានឲ្យដឹងថា ពីមុនលោកបានចិញ្ចឹមមាន់មិនដល់ ១០០ ក្បាលទេ ដែលអាចរកប្រាក់ចំណូលបានតែ ១៥០ ដុល្លារ ប៉ុណ្ណោះ ហើយបន្ទាប់ពីការចូលរួមក្នុងគម្រោងនេះ លោកអាចពង្រីកកសិដ្ឋានចិញ្ចឹមមាន់របស់លោក ដែលលោកអាចផ្គត់ផ្គង់មាន់ដល់ ទីផ្សារពី ២៥០ ទៅ ៣០០ ក្បាលក្នុង ១ ខែ៕LA
