The Phnom Penh Post Search

Search form

Logo of Phnom Penh Post newspaper Phnom Penh Post - P.M.T.I Energy នឹង​លក់​ថាមពល ៤៨ ពាន់​មេហ្គាវ៉ាត់​ឲ្យ EDC




P.M.T.I Energy នឹង​លក់​ថាមពល ៤៨ ពាន់​មេហ្គាវ៉ាត់​ឲ្យ EDC

គំនរ​អង្កាម​ដែល​ត្រូវ​បាន​គេ​យក​មក​ច្នៃ​ដើម្បី​ផលិត​ជា​ថាមពល​អគ្គិសនី។
គំនរ​អង្កាម​ដែល​ត្រូវ​បាន​គេ​យក​មក​ច្នៃ​ដើម្បី​ផលិត​ជា​ថាមពល​អគ្គិសនី។ ហេង ជីវ័ន

P.M.T.I Energy នឹង​លក់​ថាមពល ៤៨ ពាន់​មេហ្គាវ៉ាត់​ឲ្យ EDC

ភ្នំពេញៈ រោងចក្រ​ថាមពល​ជីវម៉ាស់​ដើរ​ដោយ​ដុត​អង្កាម​នៅ​ក្នុង ខេត្ត​បាត់ដំបង P.M.T.I Energy (Cambodia) Co., Ltd ដែល​ជា​បុត្រ​សម្ព័ន្ធ​របស់​សាជីវកម្ម​ផ្នែក​ឧស្សាហកម្ម​ថាមពល Wah Seong Corporation Berhad របស់​ប្រទេស​ម៉ាឡេស៊ី បាន​ចុះ​កិច្ច​ព្រម​ព្រៀង​លក់​ថាមពល​អគ្គិសនី​ចំនួន​ប្រមាណ ៤៨ ០០០ មេហ្គាវ៉ាត់​ក្នុង​មួយ​ឆ្នាំៗ សម្រាប់​រយៈ​ពេល ១០​ឆ្នាំ មក​ឲ្យ​អគ្គិសនី​កម្ពុជា។

កិច្ច​ព្រម​ព្រៀង​នេះ​ធ្វើ​ឡើង​កាល​ពីថ្ងៃ​សុក្រ​សប្តាហ៍​មុន។ បើ​តាម​ការ​ឲ្យ​ដឹង​ពី លោក ពូ ពុយ អគ្គ​នាយក​ក្រុម​ហ៊ុន P.M.T.I Energy (Cambodia) Co., Ltd កិច្ច​ព្រម​ព្រៀង​នេះ​ធ្វើ​ឡើង​បន្ទាប់​ពី​ក្រុម​ហ៊ុន ទទួល​ការ​អនុញ្ញាត​ពី​ក្រសួង​រ៉ែ និង​ថាមពល សាង​សង់​រោងចក្រ​ថាមពល​ជីវម៉ាស់​ដោយ​ដុត​អង្កាម​ដែល​មាន​អនុភាព ១០ មេហ្គាវ៉ាត់​ក្នុង​មួយ​ម៉ោង​នៅ​ក្នុង ខេត្ត​បាត់ដំបង។

លោក​ឲ្យ​ដឹង​ថា៖ «ថាមពល​អគ្គិសនី​ដែល​ផលិត​បាន​នឹង​ត្រូវ​លក់​ទៅ​ឲ្យ​រោង​ម៉ាស៊ីន​កិន​ស្រូវ​បៃតង​និង​មួយ​ចំនួន​ទៀត​ទៅ​ឲ្យ​រោង​ម៉ាស៊ីន​កិន​ស្រូវ​ដែល​មាន​ឈ្មោះ​នៅ​ក្នុង​សមាគម​អ្នក​កែច្នៃ​អង្ករ​នៅ​បាត់ដំបង ហើយ​នៅ​សល់​ពី​នេះ​ត្រូវ​បាន​លក់​ទៅ​ឲ្យ​អគ្គិសនី​កម្ពុជា»។

លោក​បន្ត​ថា លោក​ក៏​មាន​គម្រោង​ចរចា​ជាមួយ​រោង​ម៉ាស៊ីន​កិន​ស្រូវ​ដើម្បី​ផ្គត់​ផ្គង់​អង្កាម​មក​រោងចក្រ​ថាមពល ហើយ​រោងចក្រ​នឹង​ផ្តល់​ថាមពល​ទៅ​វិញ​ក្នុង​តម្លៃ​ដែល​ថោក​ជាង​តម្លៃ​ទិញ​ពី​រដ្ឋ។

ក្នុង​កិច្ច​ព្រម​ព្រៀង អគ្គិសនី​កម្ពុជា​នឹង​ទទួល​ទិញ​ថាមពល​ពី​ក្រុម​ហ៊ុន P.M.T.I Energy (Cambodia) Co., Ltd នៅ​ពេល​ដែល​មាន​កង្វះ​ខាត​អគ្គិសនី​ប៉ុណ្ណោះ។ តម្លៃ​អគ្គិសនី​ត្រូវ​បាន​លក់​ក្នុង​តម្លៃ​ប្រមាណ ៣៦០ រៀល​ក្នុង​មួយ​គីឡូវ៉ាត់។

លោក ទី ថានី ប្រធាន​ផ្នែក​ហិរញ្ញវត្ថុ​អាជ្ញាធរ​អគ្គិសនី​កម្ពុជា ថ្លែង​ថា ចំនួន​នៃ​ការ​ផ្គត់​ផ្គង់​នេះ​តិច​តួច​នៅ​ឡើយ តែ​អាច​ដោះ​ស្រាយ​កង្វះ​ខាត​អគ្គិសនី​មួយ​ចំណែក​ដែរ​នា​រដូវ​ប្រាំង​ពេល​ដែល​វារី​អគ្គិសនី​ផ្តល់​ថាមពល​បាន​តិច។

លោក​ថ្លែង​ទៀត​ថា៖ «វា​ចូល​រួម​បាន​មួយ​ចំណែក​ដែរ នៅ​រដូវ​ប្រាំង​ពេល​ដែល​ថាមពល​ពី​វារី​អគ្គិសនី​ធ្លាក់​ចុះ។ យើង​នឹង​អាច​កាត់​បន្ថយ​បាន​ខ្លះ​ការ​ពឹង​ផ្អែក​លើ​ការ​នាំ​ចូល​អគ្គិសនី​ពី ប្រទេស​ថៃ និង វៀតណាម»។

លោក​អះអាង​ថា ថាមពល​ដែល​ផលិត​បាន​ក្នុង​ស្រុក​គឺ​មាន​ច្រើន​រហូត​ដល់​អាច​ដោះ​ដូរ​ជាមួយ​ប្រទេស​ជិត​ខាង តែ​ដោយ​សារ​កង្វះ​បណ្តាញ អគ្គិសនី​ទើប​ធ្វើ​ឲ្យ​ការ​ផ្គត់​ផ្គង់​ថាមពល​អគ្គិសនី​ទៅ​ដល់​តំបន់​ដាច់​ស្រយាល​នៅ​មិន​ទាន់​អាច​ធ្វើ​ទៅ​បាន។

សេចក្តី​ប្រកាស​ព័ត៌មាន​របស់​អគ្គិសនី​កម្ពុជា​កាល​ពី​ថ្ងៃ​សុក្រ​បាន​សរសេរ​ថា គម្រោង​នេះ​នឹង​បង្កើន​ផលិត​កម្ម​អង្ករ​សម្រាប់​ការ​ប្រើ​ប្រាស់​ក្នុង​ស្រុក​និង​ការ​នាំ​ចេញ ជាមួយ​គ្នា​នេះ​ដែរ​ក៏​នឹង​កាត់​បន្ថយ​ការ​ប្រើ​ប្រាស់​ប្រេង​ឥន្ធនៈ​និង​សន្សំ​រូបិយវត្ថុ​ជាតិ​ផង​ដែរ។

លោក កាន់ គន្ធី នាយក​ប្រតិបត្តិ​រោង​ម៉ាស៊ីន​កិន​ស្រូវ Brico ក្នុង ខេត្ត​បាត់ដំបង បាន​ឲ្យ​ដឹង​ថា បញ្ហា​កង្វះ​អគ្គិសនី និង​តម្លៃ​អគ្គិសនី​ថ្លៃ​នៅ​តែ​ជា​បញ្ហា​ប្រឈម​សម្រាប់​អ្នក​ផលិត​ក្នុង​ស្រុក។

លោក​ថ្លែង​ថា៖ «ខ្ញុំ​ស្វាគមន៍​ប្រសិន​បើ​រោងចក្រ​ថាមពល​ដុត​ដោយ​អង្កាម​នេះ​មាន​ដំណើរ​ការ​និង​លក់​ក្នុង​តម្លៃ​សមរម្យ​មែន»៕

អត្ថបទគួរចាប់អារម្មណ៍