.jpg)
ភ្នំពេញ: ក្រុមហ៊ុនកំពង់ផែស្វយ័តភ្នំពេញ (PPAP) ដែលចុះបញ្ជីនៅក្រុមហ៊ុនផ្សារមូលបត្រកម្ពុជា (CSX) បានរាយការណ៍ប្រតិបត្តិការអាជីវកម្មវិជ្ជមានក្នុងរយៈពេល ៩ ខែដំបូងឆ្នាំនេះ ទោះបីជាកំពង់ផែ ១ នេះប្រឈមនឹងបញ្ហានៃការធ្លាក់ចុះសេដ្ឋកិច្ចពិភពលោកក៏ដោយ។
របាយការណ៍របស់ PPAP ផ្ញើទៅ CSX កាលពីល្ងាចថ្ងៃចន្ទ កំពង់ផែ ១ នេះរកប្រាក់ចំណូលបានជាង ២២,២៦៤ លានដុល្លារ នៅក្នុងរយៈពេល ៩ ខែដំបូង ធៀបនឹង ២១,៧០៧ លានដុល្លារ ក្នុងរយៈពេលដូចគ្នាកើនឡើង ២,៥៦ ភាគរយ។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍ថា លទ្ធផលរបស់ PPAP បានបង្ហាញស្ថិរភាពអាជីវកម្មរបស់ PPAP ក្នុងអំឡុងពេលដ៏ពិបាកនេះ។
លោកថ្លែងថា៖ «ប្រសិនបើយើងយកស្ថានការណ៍ជំងឺកូវីដ១៩ក្នុងពេលបច្ចុប្បន្នមកពិចារណា យើងអាចមើលឃើញថា ក្រុមហ៊ុននេះនៅតែរឹងមាំ។ ហើយការធ្វើពាណិជ្ជកម្មរវាងបណ្ដាប្រទេសជាច្រើនត្រូវបានកាត់បន្ថយយ៉ាងខ្លាំង ហើយសម្រាប់អាជីវកម្មរបស់កំពង់ផែ ១ នេះនៅតែរក្សាកំណើនប្រាក់ចំណូលតិចតួច ដែលបង្ហាញពីការគ្រប់គ្រង និងយុទ្ធសាស្ដ្រអាជីវកម្មល្អប្រសើរ»។
បច្ចុប្បន្ន CSX មានក្រុមហ៊ុនចុះបញ្ជីមូលបត្រសរុបចំនួន ១៣ ដែលក្នុងនោះក្រុមហ៊ុន ៧ ចុះបញ្ជីភាគហ៊ុន និងក្រុមហ៊ុន ៦ ចុះបញ្ជីមូលបត្របំណុល។ ក្រុមហ៊ុនទាំង ១៣ នេះបានប្រមូលមូលនិធិជាង ២៥៣ លានដុល្លាររួចហើយពីទីផ្សារមូលបត្រ ១ នេះ។
សម្រាប់រយៈពេល ៩ ខែនេះ CSX ទទួលបានក្រុមហ៊ុនចុះបញ្ជីមូលបត្រចំនួន ៥ ក្រុមហ៊ុន ២ ក្នុងចំណោមក្រុមហ៊ុនទាំងនោះចុះបញ្ជីមូលបត្រភាគហ៊ុន និង ៣ ផ្សេងទៀតចុះបញ្ជីមូលបត្របំណុល ក្រុមហ៊ុនទាំងនោះបានប្រមូលមូលនិធិសរុបប្រហែល ៩២ លានដុល្លារ៕ LA
