.jpg)
ទិដ្ឋភាពនៅកន្លែងលើកដាក់ទំនិញរបស់កំពង់ផែស្វយ័តភ្នំពេញ។ ហេង ជីវ័ន
ភ្នំពេញៈ កំពង់ផែស្វយ័តភ្នំពេញ (PPAP) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) បានប្ដេជ្ញានឹងលើកកម្ពស់ប្រតិបត្តិការអាជីវកម្មរបស់ខ្លួនក្នុងអំឡុងពេលវេលាដ៏ពិបាកដែលបណ្តាលពីវិបត្តិសុខភាពសកល តាមរយៈការកាត់បន្ថយការចំណាយ និងការពន្យារពេលការវិនិយោគណាដែលមិនមានភាពបន្ទាន់។
លោក ហ៊ី បាវី អគ្គនាយក PPAP បានឲ្យដឹងក្នុងកិច្ចប្រជុំប្រចាំឆ្នាំកាលពីថ្ងៃសុក្រថា ការរីករាលដាលជំងឺកូវីដ១៩ កំពុងធ្វើឲ្យមានការបន្ថយល្បឿនសកម្មភាពអាជីវកម្មនៅទូទាំងពិភពលោក ព្រមទាំងប្រទេសកម្ពុជាផងដែរ។ លោកថ្លែងថា៖ «នៅក្នុងស្ថានការណ៍បច្ចុប្បន្នកម្ពុជា និងបណ្ដាប្រទេសនានាលើពិភពលោកសុទ្ធតែកំពុងប្រឈមនឹងវិបត្តិនេះ។ PPAP នៅតែបន្តជំហរដ៏រឹងមាំក្នុងការកាត់បន្ថយផលប៉ះពាល់ដល់អាជីវកម្មរបស់ខ្លួន»។
លោកបន្តថា បុគ្គលិកទាំងអស់កំពុងប្រកៀកស្មាគ្នាដើម្បីកាត់បន្ថយការចំណាយមិនចាំបាច់ និងទប់ស្កាត់ផលប៉ះពាល់ណាមួយដោយសារវីរុសកូរ៉ូណា។
លោក បាវី បានអះអាងថា៖ «ថ្មីៗនេះ យើងបានដាក់ឲ្យដំណើរការនូវវិធានការឆ្លើយតបចំនួនដូចជា ការកែតម្រូវផែនការអាជីវកម្មឆ្នាំ ២០២០ ការកាត់បន្ថយការចំណាយមិនចាំបាច់ និងពន្យារពេលការវិនិយោគដែលមិនចាំបាច់នៅពេលនេះ តាមរយៈការផ្ដោតការយកចិត្តទុកដាក់ទៅលើគម្រោងសំខាន់ៗដើម្បីគាំទ្រកំណើន»។
របាយការណ៍ប្រចាំត្រីមាសទី ១ ឆ្នាំ ២០២០ របស់ PPAP បានឲ្យដឹងថា ប្រាក់ចំណូលសរុបរបស់ PPAP មានចំនួន ៧ ៦០៣ ៨៧៧ ដុល្លារ។
ការរីករាលដាលនៃជំងឺកូវីដ១៩ បានធ្វើឲ្យចំនួនកាណូតដឹកអ្នកដំណើរនាពេលថ្មីៗនេះធ្លាក់ចុះ ប៉ុន្តែសកម្មភាពអាជីវកម្មផ្សេងទៀតរបស់ PPAP គឺនៅដំណើរការដដែល។
ប្រាក់ចំណូលសរុបនៅរយៈពេល ៥ ខែដំបូង ឆ្នាំ ២០២០ បានធ្លាក់ចុះប្រហែល ៣ ភាគរយធៀបនឹងរយៈពេលដូចគ្នាកាលពីឆ្នាំ ២០១៩។ ក្នុងនោះប្រាក់ចំណូលបានមកពីកាណូតដឹកអ្នកដំណើរ និងការចរាចររបស់អ្នកដំណើរបានធ្លាក់ចុះគួរឲ្យកត់សម្គាល់ ខណៈដែលការដឹកជញ្ជូនទំនិញ និងប្រេងឥន្ធនៈ ឧស្ម័ន ធ្លាក់ចុះចំនួន ៤ ភាគរយ ប៉ុន្តែការចរាចរកុងតឺន័រ បន្តការកើន ១៥ ភាគរយ។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បានឲ្យដឹងថា របាយការណ៍ហិរញ្ញវត្ថុ PPAP បង្ហាញថា អាជីវកម្មរបស់ពួកគេនៅតែល្អ ទោះបីជាការរីករាលដាលជំងឺកូវីដ១៩ ក៏ដោយ ហើយប្រហែលមើលឃើញកំណើននៅត្រីមាសបន្ទាប់ ដោយសារតែអាជីវកម្មនាំចូល នាំចេញជាមួយបណ្ដាប្រទេសផ្សេងទៀតមានសារៈសំខាន់ចំពោះសេដ្ឋកិច្ចកម្ពុជា។
លោកលើកឡើងថា៖ «ប្រាក់ចំណេញក្នុង ១ ភាគហ៊ុនរបស់ PPAP គឺនៅតែខ្ពស់ខ្លាំងក្នុងចំណោមក្រុមហ៊ុនចុះបញ្ជីរបស់យើង។ ខ្ញុំមានសុទិដិ្ឋនិយមយ៉ាងខ្លាំងលើអាជីវកម្មនៅពេលអនាគតរបស់ PPAP ដែលស្ថិតនៅក្រោមសេដ្ឋកិច្ចកំពុងរីកចម្រើនដ៏រហ័សរបស់កម្ពុជា»។
តម្លៃភាគហ៊ុនរបស់ PPAP មានភាពរឹងមាំកាលពីខែមករា ឆ្នាំ ២០២០ ដោយស្ថិតក្នុងតម្លៃជាង ១២ ០០០ រៀល ប៉ុន្តែបានធ្លាក់ចុះប្រមាណ ១៣ ភាគរយកាលពីចុងខែកុម្ភៈ ដោយសារតែការបារម្ភពីជំងឺកូវីដ ១៩។ តម្លៃនៅតែទាបរហូតដល់ខែមេសា មុនពេលវាចាប់ផ្ដើមស្ទុះងើបឡើងវិញ។ កាលពីចុងខែឧសភា តម្លៃភាគហ៊ុនបានងើបឡើងវិញ ១០ ភាគរយក្នុងរយៈពេល ២ ខែ។ នេះបើតាមទិន្នន័យពី CSX៕ LA
