ភ្នំពេញៈ ធនាគារ PPCBank ដែលគ្រប់គ្រងដោយវិនិយោគិនកូរ៉េខាងត្បូង និងក្រុមហ៊ុនធានារ៉ាប់រងអាយុជីវិតព្រូដិនសល (Prudential Cambodia) បានសម្រេចកិច្ចព្រមព្រៀង «ភាពជាដៃគូលក់ការធានារ៉ាប់រងអាយុជីវិត» ដើម្បីផ្ដល់ជម្រើសផលិតផលហិរញ្ញវត្ថុបន្ថែមទៀតដល់អតិថិជនរបស់ខ្លួននៅក្នុងប្រទេសកម្ពុជា។
កិច្ចព្រមព្រៀងនេះត្រូវបានចុះហត្ថលេខារវាងលោក Shin Chang Moo ប្រធានធនាគារ PPCBank និងលោក Sanjay Chakrabarty អគ្គនាយកក្រុមហ៊ុន Prudential Cambodia នៅទីក្រុងភ្នំពេញកាលពីថ្ងៃទី ១ ខែកុម្ភៈ ឆ្នាំ ២០២១។
លោក Shin Chang Moo បានឱ្យដឹងថា ភាពជាដៃគូលក់ធានារ៉ាប់រងអាយុជីវិតនេះនឹងបម្រើជាច្រកចេញ-ចូលតែមួយសម្រាប់ដំណោះស្រាយហិរញ្ញវត្ថុដែលនឹងលើកកម្ពស់បទពិសោធរបស់អតិថិជន និងកម្រិតនៃភាពងាយស្រួល។ លោកបន្តថា៖ «ការលក់ធានារ៉ាប់រងអាយុជីវិត» នឹងផ្ដល់កញ្ចប់ ៣ សម្រាប់អតិថិជនចាប់ពីការការពារទ្រព្យសម្បត្តិដល់ការធានាអនាគតកូនៗរបស់ពួកគេ។
លោកបានថ្លែងថា៖ «ការណ៍នេះអាចឱ្យមានការសម្រេចចិត្តប្រកបដោយព័ត៌មានពិត និងប្រសិទ្ធភាពសម្រាប់អនាគតហិរញ្ញវត្ថុពួកគេ។ PPCBank ទទួលស្គាល់តម្រូវការនៃការទទួលបានសេវាធនាគារពេញលេញនៅកម្ពុជា។ ភាពជាដៃគូផ្លូវការរបស់យើងជាមួយព្រូដិនសល នៅថ្ងៃនេះ គឺជាការបើកសោនៃទំនុកចិត្តថ្មី និងដំណោះស្រាយដែលនាំមុខថ្មីមួយទៀតក្នុងការវិនិយោគលើសុវត្ថិភាពហិរញ្ញវត្ថុ»។
លោក Sanjay Chakrabarty អគ្គនាយកក្រុមហ៊ុន Prudential Cambodia បាននិយាយថា ចាប់ពីការបង្កើតអាជីវកម្មនៅក្នុងប្រទេសកម្ពុជាកាលពីឆ្នាំ ២០១៣ ក្រុមហ៊ុន Prudential Cambodia បានអនុម័តប្រាក់សំណង ១១,១ លានដុល្លារ និងបម្រើអ្នកកាន់បណ្ណធានារ៉ាប់រងជាង ២៥០ ០០០ នាក់ (គិតត្រឹមថ្ងៃទី ៣០ ខែវិច្ឆិកា ឆ្នាំ ២០២០)។
លោក Sanjay បានថ្លែងថា៖ «ការទូទាត់ទាំងនេះ បានជួយដល់គ្រួសារកម្ពុជា ប្រឈមនឹងព្រឹត្តិការណ៍អាក្រក់ដោយភាពថ្លៃថ្នូរ និងទទួលបានភាពជោគជ័យជាថ្មី។ ដោយសារការរីករាលដាលជំងឺកូវីដ១៩ និងអត្រាចំណែកទីផ្សារធានារ៉ាប់រងអាយុជីវិតទាបនៅក្នុងប្រទេសកម្ពុជា គោលបំណងរបស់យើងគឺធ្វើឱ្យទាន់ពេលវេលា និងកាន់តែមានសារៈសំខាន់ជាងពេលណាៗទាំងអស់នៅក្នុងប្រវត្តិសាស្ដ្ររបស់យើងនៅក្នុងប្រទេសកម្ពុជា»។
លោកលើកឡើងថា៖ «ក្នុងនាមអ្នកថែរក្សាសុខុមាលភាពហិរញ្ញវត្ថុរបស់អតិថិជន ធនាគារជាច្រើនមានជំហរតែមួយគត់ក្នុងការប្រឹក្សាយោបល់ដល់អតិថិជនរបស់ពួកគេលើការការពារលើតម្រូវការហិរញ្ញវត្ថុ។ យើងរីករាយក្នុងការធ្វើដៃគូជាមួយ PPCBank ហើយយើងទន្ទឹងរង់ចាំដោយរីករាយក្នុងការជួយការពារសុខភាព និងទ្រព្យសម្បត្តិអតិថិជន»៕ LA