ភ្នំពេញៈ PPCBank ចុះបញ្ជីសញ្ញាប័ណ្ណសាជីវកម្មដំបូងរបស់ខ្លួនក្នុងផ្សារមូលបត្រកម្ពុជាជាផ្លូវការស្របពេលដែលវិបត្តិសុខាភិបាលកំពុងយាយីសេដ្ឋកិច្ចសកល និងតំបន់។
ធនាគារ ភីភីស៊ីប៊ែង (PPCBank) បានក្លាយជាស្ថាប័នហិរញ្ញវត្ថុទី ៤ បន្ទាប់ពីបានចុះបញ្ជីសញ្ញាបណ្ណសាជីវកម្មដំបូងរបស់ខ្លួនជាផ្លូវការហើយនៅផ្សារមូលបត្រកម្ពុជានៅថ្ងៃអង្គារ ទី ២១ ខែមេសា ឆ្នាំ ២០២០ បើទោះបីជាវីរុសកូរ៉ូណាកំពុងតែធ្វើឲ្យផ្សារភាគហ៊ុននៅលើពិភពលោក និងក្នុងតំបន់បន្តធ្លាក់ចុះក៏ដោយ។
លោក Shin Chang Moo នាយកប្រតិបត្តិធនាគារ ភីភីស៊ីប៊ែង បានលើកឡើងថា ការចុះបញ្ជីសញ្ញាបណ្ណសាជីវកម្មរបស់យើងនេះ គឺជាព្រឹត្តិការណ៍ដ៏សំខាន់របស់ធនាគារភីភីស៊ីប៊ែង ជាមួយនឹងការគាំទ្រពីសំណាក់និយតករ វិនិយោគគិន និងអ្នកផ្តល់ប្រឹក្សាទាំងអស់ដែលបានធ្វើឱ្យការបោះផ្សាយមូលបត្រលើកទី ១ របស់ខ្លួន ប្រព្រឹត្តទៅដោយជោគជ័យចំពេលនៃភាពមិនប្រាកដប្រជាខ្ពស់ និងការប្រែប្រួលនៅក្នុងទីផ្សារដែលការធានាបាននូវសុវត្ថិភាពសាច់ប្រាក់ មានសារៈសំខាន់ជាងពេលណាទាំងអស់។
លោកបានថ្លែងយ៉ាងដូច្នេះថា៖ «ធនាគារ ភីភីស៊ីប៊ែង ជាគ្រឹះស្ថានហិរញ្ញវត្ថុមួយក្នុងចំណោមគ្រឹះស្ថានហិរញ្ញវត្ថុតិចតួចបំផុតដែលអាចទទួលបានប្រភពទុនថ្មីបំផុតមួយទៀតក្នុងរយៈពេលវែងឆ្ងាយ។ តាមរយៈការបោះផ្សាយមូលបត្របំណុលនេះ យើងអាចបង្កើតទំនាក់ទំនងថ្មីមួយទៀតជាមួយនឹងក្រុមសហគ្រិនទាំងក្នុងស្រុក និងក្រៅប្រទេស»។
«ខ្ញុំជឿជាក់ថា នេះគឺជាលើកទី ១ ហើយដែលមានក្រុមហ៊ុនធានារ៉ាប់រងក្នុងស្រុក វិនិយោគលើមូលបត្របំណុល ក្នុងនាមជាវិនិយោគគិនចម្បង។ យើងជឿជាក់ថា ការចុះបញ្ជីសញ្ញាបណ្ណសាជីវកម្មរបស់យើងនឹងចូលរួមចំណែកយ៉ាងសំខាន់ដល់ការពង្រីកកេរ្តិ៍ឈ្មោះរបស់ធនាគាររបស់យើង ដែលមិនត្រឹមតែជាធនាគារពាណិជ្ជឈានមុខគេប៉ុណ្ណោះទេ ប៉ុន្តែថែមទាំងជាដៃគូជឿទុកចិត្តជាមួយនឹងប្រតិបត្តិការផ្តោតសំខាន់លើអតិថិជន ការច្នៃប្រឌិត និងតម្លាភាពផងដែរ»។
លោកបានបន្ថែមទៀតថា៖ «ស្ថិតក្នុងដំណាក់កាលដំបូងនៃការវិវត្តរបស់មូលបត្របំណុល ទីផ្សារមូលធននៅកម្ពុជាត្រូវបានប៉ាន់ស្មានថានឹងផ្តល់ជូនយើងនូវភាពបត់បែន និងស្ថិរភាពបន្ថែមទៀតទាក់ទងនឹងការផ្តល់មូលនិធិសម្រាប់រយៈពេលមធ្យម និងរយៈពេលវែង»។
លោក Han Kyung Tae នាយកក្រុមហ៊ុនមូលបត្រយ័នតា (ខេមបូឌា) ដែលជាអ្នកដឹកនាំគម្រោងចេញមូលបត្របំណុលរបស់ ភីភីស៊ីប៊ែង ក៏បានទទួលស្គាល់ផងដែរថា ស្របពេលដែលវិបត្តិសុខាភិបាលដែលបង្កឡើងដោយជំងឺកូវីដ១៩កំពុងយាយីសេដ្ឋកិច្ចសកលក៏ពិតមែន តែផ្សាមូលបត្រកម្ពុជានៅតែទទួលបានការចុះបញ្ជីពីក្រុមហ៊ុនឯកជន។
លោកបានថ្លែងយ៉ាងដូច្នេះថា៖ «នៅពាក់កណ្តាលនៃការរីករាលដាលនៃជំងឺរាតត្បាតកូវីដ១៩ យើងរីករាយដែលបានដឹកនាំ ភីភីស៊ីប៊ែង ដោយជោគជ័យ ក្នុងការបញ្ចប់ដំណាក់កាលទី ១ នៃការចេញមូលបត្របំណុលរបស់ខ្លួន។ យើងជឿជាក់ថា នេះគឺជាការចាប់ផ្តើមដ៏ល្អប្រសើរមួយសម្រាប់ធនាគារ ព្រោះថាការធានាលើសាច់ប្រាក់គឺជាអាទិភាពមួយក្នុងចំណោមអាទិភាពកំពូលសម្រាប់ធនាគារសម្រាប់ប៉ុន្មានខែខាងមុខនេះ»។
លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជាបានសាទរចំពោះវត្តមានរបស់ភីភីស៊ីប៊ែងនៅផ្សារមូលបត្រកម្ពុជាដែលឆ្លុះបញ្ចាំងពីការតាំងចិត្តខ្ពស់របស់ថ្នាក់ដឹកនាំនៃធនាគារមកលើប្រទេសកម្ពុជា។
លោកបានថ្លែងថា៖ «ខណៈពេលដ៏តានតឹងនេះគឺយើងនៅតែបន្តបោះជំហានទៅមុខជាមួយនឹងការចុះបញ្ជីបោះផ្សាយសញ្ញាបណ្ណសាជីវកម្មរបស់ធនាគារភីភីស៊ីប៊ែងនៅលើផ្សារមូលបត្រកម្ពុជា។ វាជារឿងដែលមិនគួរឲ្យជឿឡើយ។
ស្ថិតក្នុងពេលវេលានេះ ធនាគារនៅតែបន្តជំហរ និងប្តេជ្ញាចិត្តក្នុងការបោះផ្សាយ បើទោះបីជាការបោះផ្សាយនេះត្រូវបានបែងចែកជា ២ ដំណាក់កាលក៏ដោយ តែការបោះផ្សាយជំហានទីមួយដែលទឹកប្រាក់ប្រមាណជា ១០ លានដុល្លារនេះគឺជាជោគជ័យដ៏ធំធេងមួយរបស់ធនាគារ និងផ្សារមូលបត្រកម្ពុជា ដូច្នេះធនាគាភីភីស៊ីប៊ែងនឹងរិះរកពេលវេលាដ៏សមស្របណាមួយក្នុងការបោះផ្សាយដំណាក់ទី ២ ដែលមានទឹកប្រាក់ ១០ លានដុល្លារទៀតក្នុងរយៈពេល ៦ ខែខាងមុខនេះ»។
ធនាគារ ភីភីស៊ីប៊ែង បានប្រមូលទុនចំនួន ៤០ ពាន់លានរៀល (១០ លានដុល្លារអាមេរិក) ដោយជោគជ័យក្នុងដំណាក់ទី ១ ចំពេលនៃការរាតត្បាតជំងឺកូវីដ១៩។ ក្នុងដំណាក់កាលទី ១ ក្រុមវិនិយោគិនបានទិញសញ្ញាបណ្ណ សាជីវកម្មដែលមានការការពារហានិភ័យអត្រាប្តូរប្រាក់មានអត្រាគូប៉ុងចុង ក្រោយប្រចាំឆ្នាំ ៦.៥% និងមានរយៈពេល ៣ ឆ្នាំ។
មូលបត្របំណុលសរុប ៤០០ ០០០ ត្រូវបានធ្វើការជួញដូរនៅក្នុងដំណាក់ទី ១ ដែលមានតម្លៃ ១ ម៉ឺនរៀលក្នុងមួយមូលបត្របំណុល។ ធនាគារ ភីភីស៊ីប៊ែង គ្រោងនឹងប្រមូលទុនឱ្យបាន ៤០ ពាន់លានរៀលបន្ថែមទៀតក្នុងដំណាក់កាលទី ២ នៅប្រមាណរយៈពេល ៦ ខែខាងមុខដោយតាមដានដោយប្រុងប្រយ័ត្ននូវការវិវត្តនានាក្នុងស្ថានភាពនៃជំងឺកូវីដ ១៩៕