.jpg)
ភ្នំពេញៈ ទោះបីជាការរីករាលដាលជំងឺកូវីដ១៩ នៅតែមានក៏ដោយ ក៏ធនាគារ PPC-Bank ដែលគ្រប់គ្រងដោយវិនិយោគិនកូរ៉េខាងត្បូងបានប្រកាសថា នឹងចុះបញ្ជីបោះផ្សាយលក់មូលបត្រសាជីវកម្មនៅលើក្រុមហ៊ុនផ្សារមូលបត្រកម្ពុជា (CSX) នៅថ្ងៃព្រហស្បតិ៍នេះ ដើម្បីប្រមូលមូលនិធិ ១០ លានដុល្លារបន្ថែមទៀតពីទីផ្សារនេះ។
ការចុះបញ្ជីបោះផ្សាយជុំទី ២ នៃសញ្ញាបណ្ណសាជីវកម្មរបស់ធនាគារ PPCBank បានធ្វើឡើងរយៈពេលជាង ៥ ខែប៉ុណ្ណោះ បន្ទាប់ពីជុំទី ១ ត្រូវបានបោះផ្សាយជាផ្លូវការកាលពីចុងខែមេសា ហើយក៏ប្រមូលមូលនិធិបាន ១០ លានដុល្លារផងដែរ។
លោក Jong Weon Ha អនុប្រធាន CSX បានប្រាប់ភ្នំពេញ-ប៉ុស្ដិ៍ថា ធនាគារ PPCBank បានធ្វើការបោះផ្សាយលក់មូលបត្រសាជីវកម្មជុំទី ២ ជាមួយនឹងទំហំទឹកប្រាក់សរុបចំនួន ៤០ ប៊ីលានរៀល (ប្រហែល ១០ លានដុល្លារអាមេរិក) ដោយមានរយៈពេល ៣ ឆ្នាំ អត្រាការប្រាក់ខ្ពស់ ៦,៥ ភាគរយក្នុង ១ ឆ្នាំ។ លោកបានឱ្យដឹងថា សញ្ញាបណ្ណសាជីវកម្មទាំងអស់ត្រូវបានជាវទាំងស្រុងកាលពីថ្ងៃទី ២១ ខែកញ្ញា ឆ្នាំ ២០២០ ហើយធនាគារនេះនឹងចុះបញ្ជីសញ្ញាបណ្ណសាជីវកម្មទាំងនេះនៅ CSX នៅថ្ងៃទី ៨ ខែតុលា ឆ្នាំ ២០២០។
លោក Ha ថ្លែងថា៖ «ខ្ញុំផ្ទាល់គិតថា វាជារឿងធម្មតា ដែលក្រុមហ៊ុនចុះបញ្ជីមូលបត្រមូលនិធិពីទីផ្សារមូលធនជាច្រើនដង ហើយដោយមានភាពជោគជ័យនៃការចេញមូលបត្រលើកទី ២ របស់ធនាគារ PPCB បានបង្ហាញថា ផ្សារហ៊ុននេះគឺជាប្រភពថវិកាដ៏សម្បូរបែប ដែលអាចឱ្យក្រុមហ៊ុន សហគ្រាស ជាពិសេសក្រុមហ៊ុនចុះបញ្ជីអាចប្រមូលមូលនិធិបន្ថែមជាច្រើនដងដើម្បីគាំទ្រការអភិវឌ្ឍយ៉ាងរហ័ស និងការពង្រីកអាជីវកម្មរបស់ពួកគេ ជាជាងការរង់ចាំប្រាក់ចំណេញរបស់ពួកគេ ដើម្បីពង្រីកអាជីវកម្ម ដែលអាចមានដំណើរការយឺតយ៉ាវ ដោយសារតែទីផ្សារប្រកួតប្រជែងគ្នាខ្លាំងនៅ ពេលបច្ចុប្បន្ន»។
លោក Han Kyung tae នាយកគ្រប់គ្រងក្រុមហ៊ុន Yuanta Securities (Cambodia) Plc បានឱ្យដឹងនៅក្នុងអំឡុងការចុះបញ្ជីលើកទី ១ របស់ធនាគារនេះកាលពីខែមេសាថា នៅពាក់កណ្ដាលវិបត្តិសុខភាពនេះគឺជាសមិទ្ធផលដ៏ធំមួយសម្រាប់ទាំងធនាគារនេះ និងការអភិវឌ្ឍនៃទីផ្សារមូលធនរបស់កម្ពុជា។
ទិន្នន័យបានពី CSX រហូតមកដល់ពេលនេះ ទីផ្សារនេះមានក្រុមហ៊ុនចុះបញ្ជីចំនួន ១៣ ក្នុងចំណោមក្រុមហ៊ុនទាំងនោះ ក្រុមហ៊ុន ៧ ចុះបញ្ជីមូលបត្រកម្មសិទ្ធិ និងក្រុមហ៊ុន ៦ ផ្សេងទៀតចុះបញ្ជីសញ្ញាបណ្ណសាជីវកម្ម។ ក្រុមហ៊ុន ១៣ នេះបានប្រមូលមូលនិធិរួមគ្នាបានប្រហែល ២៤៣ លានដុល្លារ។ ត្រឹមចុងឆមាសទី ១ ឆ្នាំនេះមូលធនភាវូបនីយកម្មទីផ្សារមួយនេះបានកើនឡើងដល់ ២,៥៧ ពាន់លានដុល្លារ ដែលមានចំនួន ៤,៥ ដង បើធៀបនឹងរយៈពេលដូចគ្នាកាលពីឆ្នាំមុន៕LA
