The Phnom Penh Post Search

Search form




Logo of Phnom Penh Post newspaper Phnom Penh Post - PPSEZ គ្រោង ឡើង​ផ្សារ​ហ៊ុន

PPSEZ គ្រោង ឡើង​ផ្សារ​ហ៊ុន

PPSEZ គ្រោង ឡើង​ផ្សារ​ហ៊ុន

ភ្នំពេញៈ មន្ដ្រី​ជាន់​ខ្ពស់​គណៈកម្មការ​មូលបត្រ​កម្ពុជា (SECC) បាន​និយាយ​ថា តំបន់​សេដ្ឋកិច្ច​ពិសេស​ភ្នំពេញ (PPSEZ) ដែល​ជា​ផ្នែក​មួយ​ក្នុង​ចំណោម​តំបន់​សេដ្ឋកិច្ច​ពិសេស​ទាំង ១៥ នៅ កម្ពុជា គ្រោង​នឹង​ឡើង​ផ្សារ​ហ៊ុន​កម្ពុជា (CSX) ក្នុង​ការ​ស្វែង​រក​ប្រភព​ទុន​បន្ថែម​សម្រាប់​ពង្រីក​ការ​វិនិយោគ។

លោក សុខ ដារ៉ា អគ្គ​នាយក​រង SECC បាន​ប្រាប់ ភ្នំពេញ ប៉ុស្ដិ៍ កាល​ពី​ថ្ងៃ​ចន្ទ​ថា PPSEZ បាន​ដាក់​លិខិត​បង្ហាញ​ឆន្ទៈ​រួច​ស្រេច​ហើយ​ជាមួយ SECC ប៉ុន្តែ​លោក​បាន​បដិសេធ​ផ្ដល់​ព័ត៌មាន​លម្អិត​បន្ថែម។ លោក​បន្ត​ថា៖ «PPSEZ បាន​ដាក់​លិខិត​បង្ហាញ​ឆន្ទៈ​ទៅ SECC ចាប់​តាំង​ពី​ខែ កញ្ញា ដោយ​សារ​តែ​ពួក​គេ​ចង់​បោះ​ផ្សាយ​មូលបត្រ​ដើម្បី​ទទួល​យក​ប្រាក់​មួយ​ចំនួន​សម្រាប់​ពង្រីក​ការ​វិនិយោគ​របស់​ខ្លួន»។

លោក​បន្ត​ថា មក​ដល់​ពេល​នេះ​លោក​មិន​បាន​ទទួល​ព័ត៌មាន​ថ្មី​ណា​មួយ​ពី​ក្រុមហ៊ុន​នេះ​ទេ។ លោក​បន្ថែម​ថា៖ «ជា​ពិសេស​ពួក​គេ​កំពុង​ស្ថិត​នៅ​ពាក់​កណ្ដាល ផ្លូវ​ចន្លោះ​ការ​ដាក់​លិខិត​បង្ហាញ​ឆន្ទៈ​និង​ការ​ស្នើ​សុំ​បោះផ្សាយ​មូលបត្រ​លក់​ជា​លើក​ដំបូង (IPO)។ ដូច្នេះ​វា​មាន​ដំណើរការ​លឿន​ឬ​យឺត​គឺ​អាស្រ័យ​លើ​ពួក​គេ»។

លោក​បន្ថែម​ថា​នៅ​ពេល​ពួកគេ​ដាក់​ពាក្យ​សម្រាប់ IPO បាន​ហើយ SECC តម្រូវ​ឲ្យ​ក្រុមហ៊ុន​រៀបចំ​ឯកសារ​ដោយ​មាន​លិខិត​ពិនិត្យ​លទ្ធភាព​ចុះ​បញ្ជី ឯកសារ​បង្ហាញ​ព័ត៌មាន និង​ឯកសារ​ផ្សេងៗ​ទៀត។ លោក​បន្ថែម​ថា៖ «បន្ទាប់​មក SECC នឹង​ត្រួត​ពិនិត្យ​មើល​ការ​ស្នើ​សុំ IPO របស់​ពួក​គេ​ថា តើ​អ្នក​មាន​សិទ្ធិ​ឬ​មិន​មាន ដូច្នេះ​យើង​នឹង​ជូន​ដំណឹង​ពួក​គេ​ក្នុង​រង្វង់​ពីរ​ខែ»។

លោក​បាន​បន្ត​ថា៖ «ក្នុង​នាម​ជា​និយតករ យើង​លើក​ទឹក​ចិត្ត​ដល់​ក្រុមហ៊ុន​មាន​សក្ដានុពល​ជាច្រើន​ដូចជា PPSEZ ឲ្យ​ចុះ​បញ្ជី​ក្នុង​ផ្សារ​ហ៊ុន​នេះ។ ច្បាស់​ណាស់​យើង​គាំទ្រ និង​ស្វាគមន៍​ក្រុមហ៊ុន​ឯកជន​ក្នុង​ការ​ចុះ​បញ្ជី​ក្នុង​ផ្សារ​ហ៊ុន​ប្រសិន​បើ​ពួក​គេ​គិត​ថា ពួក​គេ​មាន​លទ្ធភាព ព្រោះ​វា​នឹង​ផ្ដល់​ជម្រើ​ស​កាន់​តែ​ច្រើន​សម្រាប់​វិនិយោគិន បន្ថែម​លើ​អ្វី​ដែល​យើង​មាន​រួច​ហើយ [រដ្ឋករ​ទឹក​ស្វយ័ត​ក្រុង​ភ្នំពេញ]»។

លោក Hiroshi Uematsu អ្នក​គ្រប់​គ្រង​របស់ PPSEZ មិន​បាន​ឆ្លើយ​ទេ នៅ​ពេល ភ្នំពេញ ប៉ុស្ដិ៍ សួរ​ពី​បញ្ហា​នេះ។ តំបន់​សេដ្ឋកិច្ច​ពិសេស​ភ្នំពេញ​ត្រូវ​បាន​បង្កើត​ឡើង​កាល​ពី​ឆ្នាំ ២០០៦ ដោយ​វិនិយោគិន​ក្នុង​ស្រុក​ដោយ​មាន​ទុន​វិនិយោគ ៦៨ លាន​ដុល្លារ ជា​តំបន់​សេដ្ឋកិច្ច​ពិសេស​នាំ​មុខ​គេ​នៅ​ជាយ​ក្រុង ភ្នំពេញ នៅ​លើ​ផ្ទៃ​ដី ៣៦០ ហិកតា។

បច្ចុប្បន្ន​មាន​ក្រុមហ៊ុន ៦៣ នៅ​ក្នុង​តំបន់ សេដ្ឋកិច្ច​ពិសេស​នេះ​ហើយ​ក្រុមហ៊ុន​ទាំង​នោះ​ជាង​ពាក់​កណ្ដាល​គឺជា ក្រុមហ៊ុន ជប៉ុន។ ក្រុមហ៊ុន Sumitomo Mitsui Banking Corporation (SMBC) មាន​មូលដ្ឋាន​នៅ​ទីក្រុង តូក្យូ បាន​ចុះ​ហត្ថលេខា​លើ​អនុស្សរណៈ​នៃ​ការ​យោគយល់​គ្នា​ជាមួយ​តំបន់ សេដ្ឋកិច្ច​ពិសេស​ភ្នំពេញ​កាល​ពី​ដើម​ខែ​នេះ ដើម្បី​ជួយ​គាំទ្រ​ដល់​ការ​វិនិយោគ​របស់​ជប៉ុន​នៅ​កម្ពុជា។

លោក សុខ ដារ៉ា បាន​និយាយ​ថា ក្រុមហ៊ុន​ឯកជន​ប្រហែល ១០ បង្ហាញ​ចំណាប់​អារម្មណ៍​ក្នុង​ការ​ចុះ​បញ្ជី​ក្នុង​ផ្សារ​ហ៊ុន ហើយ​រហូត​មក​ដល់​ពេល​នេះ​ពួកគេ​ភាគ​ច្រើន​បាន​ដាក់​លិខិត​បង្ហាញ​ឆន្ទៈ រួច​ហើយ​ជាមួយ SECC។ លោក​លើក​ឡើង​ថា ក្រុមហ៊ុន​ទាំង​នោះ​ត្រូវ​កាន់​កាប់​ដោយ​ជន​បរទេស និង​ការ​វិនិយោគ​រួម​គ្នា​ក្នុង​ស្រុក​ដែល​មក​ពី​ភោជនីយដ្ឋាន ផ្សារ​ទំនើប អចលន​ទ្រព្យ វិស័យ​ហិរញ្ញវត្ថុ គ្រឹះស្ថាន​មីក្រូ​ហិរញ្ញវត្ថុ។

លោក គុយ វ៉ាត ប្រធាន​ក្រុមហ៊ុន Vtrust Group បាន​ថ្លែង​ថា លោក​គ្រោង​នឹង​ចុះ​បញ្ជី​ក្រុមហ៊ុន​បុត្រសម្ព័ន្ធ Park Café របស់​លោក ប៉ុន្តែ​បដិសេធ​ផ្ដល់​ព័ត៌មាន​លម្អិត។ លោក​បន្ត​ថា៖ «ខ្ញុំ​មិន​បាន​ដាក់​លិខិត​បង្ហាញ​ឆន្ទៈ​ទេ ដោយ​សារ​តែ​យើង​ចាំ​បាច់​ត្រូវ​រៀបចំ​ការងារ​ខាង​ក្នុង​របស់​យើង»។

លោក ស៊ឹង ប៊ុណ្ណា ប្រធាន​ក្រុមហ៊ុន ប៊ុណ្ណា រៀលធី​គ្រុប ក៏​អះអាង​ថា នឹង​ចុះ​បញ្ជី​ក្រុមហ៊ុន​ក្នុង​ផ្សារ​ហ៊ុន​នេះ​ដែរ ប៉ុន្តែ​មិន​បាន​ដាក់​លិខិត​បង្ហាញ​ឆន្ទៈ​ទេ។ លោក​បន្ថែម​ថា៖ «បច្ចុប្បន្ន យើង​កំពុង​ដំណើរការ​លើ​ការងារ​នេះ»។

បច្ចុប្បន្ន CSX មាន​ក្រុមហ៊ុន​រដ្ឋ​តែ​មួយ​គត់​បាន​នឹង​កំពុង​ធ្វើ​ការ​ជួញ​ដូរ​នៅ​ក្នុង ផ្សារ​ហ៊ុន​កម្ពុជា គឺ​រដ្ឋាករ​ទឹក​ស្វយ័ត​ក្រុង​ភ្នំពេញ​ដែល​ចាប់​ផ្តើម​តាំង​ពី​ខែ មេសា ២០១២ ខណៈ​ក្រុមហ៊ុន​រដ្ឋ​ពីរ​ផ្សេង​ទៀត គឺ​ទូរគមនាគមន៍​កម្ពុជា និង​កំពង់ផែ​ស្វយ័ត​ក្រុង ព្រះសីហនុ មិន​បាន​បញ្ជាក់​អំពី​កាលបរិច្ឆេទ។ តម្លៃ​ភាគ​ហ៊ុន​រដ្ឋករ​ទឹក​ស្វយ័ត​ក្រុង​ភ្នំពេញ​កាល​ពី​ថ្ងៃ​ម្សិលមិញ គឺ​បិទ​ក្នុង​តម្លៃ ៥ ៤៨០ រៀល ដោយ​គ្មាន​ទំហំ​នៃ​ការ​ជួញ​ដូរ​ទេ៕ PB

អត្ថបទគួរចាប់អារម្មណ៍