ភ្នំពេញៈ ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP) ដែលចុះបញ្ជីនៅក្រុមហ៊ុនផ្សារមូលបត្រកម្ពុជា (CSX) បានទិញភាគហ៊ុននៅសល់ ៤០ ភាគរយ មានតម្លៃ ១ ១៧២ ៥១៥ ដុល្លារ ពីក្រុមហ៊ុន Saha E&C Co.,Ltd បន្ទាប់ពីក្រុមហ៊ុនមួយនេះទទួលបានការយល់ព្រមពីនិយតករផ្សារមូលបត្រកម្ពុជាកាលពីថ្ងៃទី ១៨ ខែ មីនា ឆ្នាំ ២០២១។
យោងតាមសេចក្ដីជូនដំណឹងដែលផ្ញើទៅ CSX កាលពីថ្ងៃទី ២២ ខែមីនា ក្រុមហ៊ុន Phnom Penh SEZ Plc ជូនដំណឹងដល់សាធារណជនថា ក្រុមហ៊ុន PPSP បានទិញយកភាគហ៊ុនរបស់ក្រុមហ៊ុន Saha E&C Co.,Ltd ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន PPSP កាន់កាប់ ៦០ ភាគរយ និង ៤០ ភាគរយផ្សេងទៀតកាន់កាប់ដោយក្រុមហ៊ុន LCH ស្ថិតក្រោមការអនុញ្ញាតពីនិយតករផ្សារមូលបត្រកម្ពុជាកាលពីថ្ងៃទី ១៨ ខែមីនា។
«គោលបំណងនៃការកាន់កាប់នេះ គឺដើម្បីកាន់ភាគហ៊ុននៅសល់ចំនួន ៤០ ភាគរយដែលមិនមែនជាកម្មសិទ្ធិរបស់ក្រុមហ៊ុន PPSP។ Saha E & Co.,Ltd គឺជាក្រុមហ៊ុនដែលចូលរួមជាចម្បងរាល់ការងារសាងសង់ និងសំណង់ វិស្វកម្ម ការរចនាលទ្ធកម្ម ការគ្រប់គ្រងគម្រោង និងការថែទាំ»។ នេះបើតាមសេចក្ដីជូនដំណឹង។
នាយកគ្រប់គ្រងក្រុមហ៊ុន PPSEZ លោក Hiroshi Uematsu និយាយថា SAHA E&C ត្រូវបានបង្កើតឡើងក្នុងឆ្នាំ ២០១៧ ក្នុងគោលបំណងដើម្បីទទួលបានគម្រោងពីខាងក្រៅតំបន់សេដ្ឋកិច្ចពិសេសភ្នំពេញក៏ដូចជានៅក្នុងតំបន់របស់ខ្លួន។
លោកថ្លែងថា៖ «យើងបានគិតថាយើងអាចពង្រីកសេវាកម្មយើងនៅក្រៅតំបន់ដើម្បីឆ្លើយតបនឹងតម្រូវការនៃវិស័យឧស្សាហកម្ម។ តាមរយៈការធ្វើដូច្នេះយើងអាចបង្កើនប្រាក់ចំណូលពី SAHA E&C»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បានឱ្យដឹងថា ការកាន់កាប់ភាគហ៊ុនរបស់ក្រុមហ៊ុន Saha E&C ចង្អុលបង្ហាញពីការប្ដេជ្ញាចិត្តក្នុងការពង្រីកអាជីវកម្មរបស់ PPSP។
លោកនិយាយថា៖ «ការទិញភាគហ៊ុនក្រុមហ៊ុនដែលទទួលបានប្រាក់ចំណេញនេះគឺជាព័ត៌មានដ៏អស្ចារ្យសម្រាប់ក្រុមវិនិយោគិន ដោយសារក្រុមហ៊ុនរំពឹងថា នឹងទទួលបានប្រាក់ចំណេញកាន់តែច្រើន ហើយក៏នឹងធ្វើឱ្យភាគលាភកាន់តែច្រើនផងដែរ»។
លោកលើកឡើងថា៖ «ក្នុងអំឡុងសប្ដាហ៍កន្លងមកសកម្មភាពជួញដូរកំពុងលេចធ្លោដោយតម្លៃបានកើនឡើងជាបន្តបន្ទាប់ និងជាភាគហ៊ុនដែលបានជួញដូរច្រើនបំផុតនៅក្នុងចំណោមក្រុមហ៊ុនចុះបញ្ជីទាំងអស់។ ជាមួយនឹងព័ត៌មានបែបនោះ យើងរំពឹងថា និន្នាការនេះនឹងបន្ត»។
យោងតាមសេចក្ដីប្រកាសព័ត៌មាន ដោយសារក្រុមហ៊ុន Saha E&C គឺជាក្រុមហ៊ុនទទួលបានប្រាក់ចំណេញតាមរយៈការទិញភាគហ៊ុនដែលនៅសល់ ៤០ ភាគរយមិនមែនជាកម្មសិទ្ធិរបស់ក្រុមហ៊ុន PPSP ដូចនេះក្រុមហ៊ុននឹងអភិវឌ្ឍឱ្យកាន់តែប្រសើរឡើងទាំងនៅក្នុងរយៈពេលខ្លី និងរយៈពេលវែង។
ដូចដែលបានមើលឃើញពីតារាងតុល្យការដែលបានពិនិត្យឡើងវិញកាលពីថ្ងៃទី ៣០ ខែកញ្ញា ឆ្នាំមុន ដោយសវនករឯករាជ្យគឺ Baker Tilly ដំណើរការដែលត្រូវបង់ប្រាក់ និងទទួលយកដោយភាគីទាំង ២ គឺមានតម្លៃពិតគណនីរបស់ខ្លួន ១ ១៧២ ៥១៥ ដុល្លារ សម្រាប់ភាគហ៊ុន ៤០ ភាគរយដែលមិនទាន់ជាកម្មសិទ្ធិ។
សេចក្ដីប្រកាសព័ត៌មានបន្តទៀតថា៖ «ដូច្នេះការទិញត្រូវបង់ប្រាក់ជា ២ ដំណាក់កាល គឺនៅពេលចុះហត្ថលេខាលើកិច្ចព្រមព្រៀងលក់ភាគហ៊ុនចំនួន ៥០០ ០០០ ដុល្លារកាលពីថ្ងៃទី ១៨ ខែ មីនា ឆ្នាំ ២០២១ និងការទូទាត់ចុងក្រោយ ៦៧២ ៥១៤,៨២ ដុល្លារ ដែលត្រូវបង់នៅមុនថ្ងៃទី ១៤ ខែ មេសា ឆ្នាំ ២០២១ ខាងមុខនេះ»៕ LA