ភ្នំពេញៈ ក្រុមហ៊ុនរដ្ឋាករទឹកស្វយ័តក្រុងភ្នំពេញ (PPWSA) ដែលគ្រប់គ្រងដោយរដ្ឋ និងចុះបញ្ជីនៅផ្សារហ៊ុនកម្ពុជា (CSX) បានរាយការណ៍ពីកំណើនដ៏រឹងមាំនៃប្រតិបត្តិការអាជីវកម្មរបស់ខ្លួនកាលពីឆ្នាំមុន ទោះបីជាមានការរំខានដោយសារតែការរីករាលដាលជំងឺកូវីដ ១៩ លើសេដ្ឋកិច្ចក៏ដោយ។
យោងតាមរបាយការណ៍ហិរញ្ញវត្ថុរបស់ក្រុមហ៊ុនដែលបានផ្ញើឱ្យក្រុមហ៊ុន CSX កាលពីថ្ងៃអង្គារក្នុងរយៈពេល ១២ ខែ គិតត្រឹមថ្ងៃទី ៣១ ខែ ធ្នូ ឆ្នាំ ២០២០ PPWSA រកប្រាក់ចំណូលបានជាង ៣២៤ ពាន់លានរៀល កើនឡើង ជិត ១០៨ ពាន់លានរៀល ឬ ៤៩,៨៣ ភាគរយ ធៀបនឹងរយៈពេលដូចគ្នាកាលពីត្រីមាសមុន និងប្រាក់ចំណេញមានជាង ៨៨ ពាន់លានរៀល កើនឡើងជាង ៥៥ ពាន់លានរៀល ឬ ១៦៥,៣៩ ភាគរយ ធៀបនឹងអំឡុងពេល ១២ ខែគិតត្រឹមថ្ងៃទី ៣១ ខែ ធ្នូ ឆ្នាំ ២០១៩។
លោក Jong Weon Ha អនុប្រធាន CSX បានប្រាប់ ភ្នំពេញ ប៉ុស្ដិ៍ ពីថ្ងៃទី ២ ខែ មីនា ឆ្នាំ ២០២១ ថា ក្រុមហ៊ុនកំពុងធ្វើបានល្អបំផុតក្នុងអំឡុងពេលនេះ។ ប្រាក់ចំណេញរបស់ក្រុមហ៊ុនបានកើនឡើងគួរឱ្យកត់សម្គាល់ក្នុងរយៈពេល ១ ឆ្នាំដោយមានកំណើនយ៉ាងខ្ពស់រហូតដល់ ១៦៥ ភាគរយ បើទោះបីជាមានការរីករាលដាលជំងឺកូវីដ១៩។
លោកឱ្យដឹងថា PWSA បានបញ្ជាក់យ៉ាងច្បាស់លាស់លើការបង្ហាញរបស់ពួកគេផ្ញើទៅ CSX ថាការកើនឡើងប្រាក់ចំណូល និងប្រាក់ចំណេញ គឺដោយសារតែការកើនឡើងការលក់ទឹកស្អាត និងការអនុវត្តតម្លៃថ្មីចាប់ពីដើមឆ្នាំ ២០២០។
លោក Ha ថ្លែងថា៖ «យើងអាចអង្កេតឃើញថា អាជីវកម្មផ្គត់ផ្គង់ទឹកស្អាតមានផលប៉ះពាល់ដោយសារជំងឺនេះតិចជាងអាជីវកម្មផ្សេងៗទៀត ដោយសារតែការប្រើប្រាស់ទឹកពីប្រជាជននៅតែមិនផ្លាស់ប្តូរ។ កំណើនរបស់ក្រុមហ៊ុននេះនឹងបង្កើនទំនុកចិត្តខ្ពស់របស់ក្រុមវិនិយោគិន ឬភាគទុនិកក្នុងការសម្រេចចិត្តវិនិយោគលើផ្សារហ៊ុន។ ខ្ញុំគិតថា ភាគទុនិករបស់ក្រុមហ៊ុនដែលមានប្រតិបត្តិការល្អប្រសើរនេះ មានការពេញចិត្តខ្លាំងនឹងប្រតិបត្តិការអាជីវកម្ម ហើយក្រុមវិនិយោគិនថ្មីៗនឹងចាប់អារម្មណ៍ទិញភាគហ៊ុនពីប្រភេទអាជីវកម្មដែលរីកចម្រើនរហ័សទាំងនេះជាមិនខាន»។
លោកថា៖ «ក្នុងនាមជាផ្សារហ៊ុន យើងពិតជារីករាយក្នុងការមើលឃើញក្រុមហ៊ុនជាច្រើនចុះបញ្ជីនៅលើទីផ្សាររបស់យើង ដែលបង្ហាញលទ្ធផលល្អប្រសើរ ហើយយើងកំពុងទន្ទឹងរង់ចាំក្នុងការនាំយកក្រុមហ៊ុនកាន់តែច្រើន មានគុណភាពបែបនោះដល់ក្រុមវិនិយោគិន។ យើងមានសុទិដ្ឋិនិយមខ្លាំង និងមើលឃើញនូវកំណើនបន្ថែមទៀតរបស់ក្រុមហ៊ុនទាំងនោះនៅក្នុងឆ្នាំ ២០២១ ដែលការចាក់វ៉ាក់សាំងប្រឆាំងជំងឺកូវីដ១៩ កំពុងចាប់ផ្ដើមផ្ដល់ដល់សាធារណជនជាមួយការកាត់បន្ថយផលប៉ះពាល់ដោយសារការរីករាលដាលរបស់ជំងឺនេះ»។
កាលពីត្រីមាសទី ៤ ឆ្នាំ ២០២០ PPWSA រកប្រាក់ចំណូលបានជិត ៨៧ ពាន់លានរៀល កើនឡើងជាង ៤៦ ពាន់លានរៀល ឬ ១១៤,៨០ ភាគរយធៀបនឹងរយៈពេលដូចគ្នាកាលពីត្រីមាសមុន និងប្រាក់ចំណេញក្នុងអំឡុងពេលហិរញ្ញវត្ថុមានចំនួនជិត ១៩ ពាន់លានរៀលកើនឡើងជិត ២៥ ពាន់លានរៀល ឬ ៤១១,៤១ ភាគរយធៀបនឹងរយៈពេលដូចគ្នាកាលពីត្រីមាសមុន។
PWSA កាលពីថ្ងៃទី ១ ខែកុម្ភៈ បានចាប់ផ្ដើមសាងសង់រោងចក្រប្រព្រឹត្តិកម្មទឹកស្អាតបាក់ខែងមានតម្លៃ ៣៨០ លានដុល្លារ នៅជាយក្រុងភាគឦសាន ជាការឆ្លើយតបនឹងតម្រូវការដែលកើនឡើង។ នេះបង្កើតកំណើនសក្ដានុពលវិនិយោគថ្មីៗសម្រាប់ក្រុមហ៊ុន។ ការសាងសង់រោងចក្រនេះនឹងត្រូវបានអនុវត្តជា ២ ដំណាក់កាល ដោយដំណាក់កាលទី ១ នឹងបញ្ចប់ត្រឹមចុងឆ្នាំ ២០២២ ជាមួយនឹងសមត្ថភាពផលិតទឹកស្អាតភ្លាមៗបានបរិមាណ ១៩៥ ០០០ ម៉ែត្រគុប ក្នុង ១ ថ្ងៃ និងក្នុងដំណាក់កាលទី២ សមត្ថភាពផលិតទឹកស្អាតនឹងបន្ថែម ១៩៥ ០០០ ម៉ែត្រគុបផ្សេងទៀត ដល់ការផ្គត់ផ្គង់ប្រចាំថ្ងៃរបស់រោងចក្រនេះ ហើយគ្រោងនឹងបញ្ចប់ត្រឹមចុងឆ្នាំ ២០២៣៕LA