.jpg)
ពិធីសម្ពោធដំណើរការសាកល្បងរបស់ Prince Mall។ រូបថត សហការី
ភ្នំពេញ: ដើម្បីចាប់យកកំណើននៃការមកដល់នៃភ្ញៀវទេសចរបរទេស ជាពិសេសជនជាតិចិនក្នុងរយៈពេលប៉ុន្មានឆ្នាំចុងក្រោយនេះ នៅក្នុងខេត្តនៃតំបន់ឆ្នេរសមុទ្រក្រុងព្រះសីហនុ ក្រុមហ៊ុន Prince Huan You Real Estate Cambodia Group Co. Ltd បានដាក់ឱ្យដំណើរការសាកល្បងផ្សារទំនើប Prince Mall របស់ខ្លួន ដើម្បីឆ្លើយតបទៅនឹងតម្រូវការទីផ្សារ។
ផ្សារទំនើបដែលបានដាក់ឱ្យដំណើរការកាលពីថ្ងៃព្រហស្បតិ៍សប្តាហ៍មុន លាតសន្ធឹងលើផ្ទៃដីទំហំ ៥០ ០០០ ម៉ែត្រការ៉េ មាន ៥ ជាន់ ដោយមានចំណតរួមនៅផ្នែកខាងក្រោយ។
លោក Zhang Rui Jun នាយកប្រតិបត្តិក្រុមហ៊ុន ព្រីនស៍ហ័នយូ រៀលអ៊ីស្ទេត មានប្រសាសន៍ថា ការដាក់ឱ្យដំណើរការនៃមជ្ឈមណ្ឌលទិញទំនិញបែបចម្រុះដំបូងបង្អស់នៅខេត្តព្រះសីហនុ ដើម្បីឆ្លើយតបនឹងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងរបស់ក្រុមហ៊ុន។
លោកបន្តថា៖ «ការបើកសម្ពោធសាកល្បងថ្ងៃនេះគឺទទួលបានការជួយជ្រោមជ្រែង និងការយកចិត្តទុកដាក់ពីរដ្ឋបាលខេត្តព្រះសីហនុ ព្រមទាំងស្ថាប័នពាក់ព័ន្ធ។ នេះជាជំហានដំបូងយើងសង្ឃឹមយ៉ាងមុតមាំថារដ្ឋបាលខេត្ត ក៏ដូចជារាជរដ្ឋាភិបាលបន្តយកចិត្តទុកដាក់គាំទ្រប្រតិបត្តិការរបស់ក្រុមហ៊ុន និងផ្ដល់នូវផលិតផលដែលមានគុណភាព និងសេវាកម្មល្អធ្វើឱ្យខេត្តព្រះសីហនុទទួលបាននូវមជ្ឈមណ្ឌលទិញទំនិញបែបចម្រុះមួយ និងចូលរួមចំណែកក្នុងការបង្កើតឱកាសការងារ និងចំណូលពន្ធជូនរដ្ឋ។
លោក គង់ វិតាណ: អភិបាលរងខេត្តព្រះសីហនុបានថ្លែងក្នុងពិធីបើកសម្ពោធដាក់ឱ្យដំណើរការសាកល្បងនោះថា ការដាក់ឱ្យដំណើរការសាកល្បងផ្សារទំនើបព្រីនស៍ ម៉ល ក្នុងក្រុងព្រះសីហនុ ក្រោមគោលនយោបាយបើកចំហ និងស៊ីជម្រៅរបស់ប្រទេសទាំង ២ ធ្វើឱ្យប្រទេសទាំង ២ មានទំនាក់ទំនងល្អ មានការអភិវឌ្ឍរីកចម្រើនយ៉ាងឆាប់រហ័ស ពិសេសគឺការអភិវឌ្ឍនៅខេត្តព្រះសីហនុ។
លោកបានថ្លែងថា៖ «ជាក់ស្ដែងយើងឃើញមានអ្នកវិនិយោគអន្តរជាតិយ៉ាងច្រើនមកវិនិយោគនៅក្នុងខេត្តព្រះសីហនុលើវិស័យឧស្សាហកម្ម ពាណិជ្ជកម្ម សំណង់ ដឹកជញ្ជូន និងទេសចរណ៍ជាដើម។ ភាពរីកចម្រើនលើវិស័យទាំងនេះបានចូលរួមចំណែកដល់កំណើនចំណូលរបស់ប្រជាពលរដ្ឋ និងកំណើនសេដ្ឋកិច្ចខេត្ត» ។
បច្ចុប្បន្នរដ្ឋាភិបាលកំពុងខិតខំបន្តលើការអភិវឌ្ឍហេដ្ឋារចនាសម្ព័ន្ធរួមមានការកសាងផ្លូវទីក្រុង ផ្លូវប្របឆ្នេរសមុទ្រ ពិសេសផ្លូវទាំង ៣៤ ខ្សែ ក្នុងក្រុងព្រះសីហនុដោយរៀបចំទំនើបកម្ម សុវត្ថិភាព បរិស្ថាន និងសោភណភាព។
លោក គួច ចំរើន បានឱ្យដឹងនៅក្នុងសន្និសីទព័ត៌មានកាលពីខែមិថុនាថា រដ្ឋបាលខេត្តព្រះសីហនុបានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយទីក្រុង និងខេត្តរបស់ប្រទេសចិនចំនួន ១៦ ដើម្បីជំរុញការវិនិយោគខាងវិស័យទេសចរណ៍ វប្បធម៌ ការអប់រំ និងកីឡារវាងខេត្តមួយនេះ និងប្រទេសចិន។
ចំនួនភ្ញៀវទេសចរជនជាតិចិនមកទស្សនាខេត្តព្រះសីហនុបានធ្លាក់ចុះដោយសារតែជំងឺកូវីដ ១៩ និងការហាមឃាត់ការលេងល្បែងភ្នាល់អនឡាញដែលបានចាប់ផ្ដើមអនុវត្តកាលពីខែមករា។ បច្ចុប្បន្នមានជនជាតិចិនប្រហែល ១៥ ០០០ នាក់ នៅក្នុងខេត្តជាប់ឆ្នេរសមុទ្រមួយនេះ បើធៀបនឹង ២ លាននាក់ កាលពី ១ ឆ្នាំកន្លងទៅ។
ចាប់តាំងពីឆ្នាំ ១៩៩៤ លោក គួច ចំរើន បានឱ្យដឹងថា ខេត្តនេះបានទាក់ទាញការវិនិយោគជិត ៤ ពាន់លានដុល្លារ។ លោកបានបញ្ជាក់ថា គិតត្រឹមខែ ឧសភា ក្រុមហ៊ុនចំនួន ២០ បានអភិវឌ្ឍឆ្នេរ និងកោះទំហំ ១១ ៦៣៧ ហិកតា ជាមួយនឹងទុនវិនិយោគចំនួន ៣,៩ ពាន់លានដុល្លារ។
លោកបន្ថែមទៀតថា រហូតមកដល់ពេលនេះ ក្រុមហ៊ុនចំនួន ៦០ បានគ្រោងនឹងវិនិយោគសរុប ១០,៧៤ ពាន់លានដុល្លារ លើវិស័យទេសចរណ៍ និងសណ្ឋាគារ។ វិស័យទេសចរណ៍បានបង្កើតការងារជាង ១០ ០០០ កន្លែងនៅឆ្នាំនេះ៕ LA
