ក្រុងគូឡាឡាំពួៈ ក្រុមហ៊ុនផលិតរថយន្ត Proton របស់ម៉ាឡេស៊ី កំណត់ទិសដៅលក់ឲ្យបានច្រើនជាងគេក្នុងប្រទេសម៉ាឡេស៊ីនៅឆ្នាំ ២០២៣ និងជាក្រុមហ៊ុនដែលលក់រថយន្តច្រើនជាងគេនៅអាស៊ានក្នុងឆ្នាំ ២០២៧។ នេះបើយោងតាមអគ្គនាយកក្រុមហ៊ុនលោក Li Chunrong។
លោក Li បានថ្លែងថា ចាប់តាំងពីបាត់បង់ឋានៈជាក្រុមហ៊ុនលក់រថយន្តបានច្រើនជាងគេក្នុងប្រទេសម៉ាឡេស៊ីនៅឆ្នាំ ២០០៥ មក ការលក់របស់ក្រុមហ៊ុន Proton បានធ្លាក់មកនៅចំណាត់ថ្នាក់ទី ៤ កាលពីឆ្នាំមុន ប៉ុន្តែអាចឡើងមកចំណាត់ថ្នាក់ទី ២ វិញនៅឆមាសទី ១ ឆ្នាំនេះ។
ថ្លែងសុន្ទរកថានៅវេទិកា និងពិព័រណ៍ Talent Endowment ឆ្នាំ ២០១៩ លោក Li ថ្លែងថាបច្ចុប្បន្នក្រុមហ៊ុនកំពុងសម្លឹងឆ្ពោះទៅរកប្រាក់ចំណេញឲ្យបានឆាប់តាមដែលអាចធ្វើទៅបាន។
លោកបន្ថែមថាក្រុមហ៊ុន Proton ដែលលក់រថយន្ត ២៧ ប្រភេទបានកត់ត្រាការលក់រថយន្តសរុបចំនួន ៤ លានគ្រឿងទៅកាន់ប្រទេស ៧០ សម្រាប់រយៈពេល ៣៦ ឆ្នាំកន្លងមកនេះ។
លោកថ្លែងថារថយន្តដែលដំឡើងពេញលេញ (CBU) នៅឥណ្ឌូនេស៊ីមានតែ ៣០ ភាគរយនៃការលក់រថយន្តសរុបប៉ុណ្ណោះ និង ១០០ ភាគរយនៅថៃ។ ធៀបប្រទេសទាំង ២ ម៉ាឡេស៊ីនៅមានឱកាសច្រើនសម្រាប់ការនាំចេញរថយន្តដែលដំឡើងពេញលេញ។
លោកសង្កត់ធ្ងន់ថានៅពេលអនាគត ឧស្សាហកម្មរថយន្តនឹងមាននិន្នាការធំៗ ៤ គឺ ការលក់អនឡាញនៅឆ្នាំ ២០២៥ រថយន្តស្វ័យបើកបរ រថយន្តដំណើរការដោយបច្ចេកវិទ្យាឆ្លាតវៃ និងផ្នត់គំនិតជួលរថយន្ត។ ផលប៉ះពាល់អវិជ្ជមាននៃរថយន្តជួលនេះនឹងធ្វើឲ្យការធ្លាក់ចុះចន្លោះពី ៥ ទៅ ១០ ភាគរយ៕ ANN/KC