The Phnom Penh Post Search

Search form

Logo of Phnom Penh Post newspaper Phnom Penh Post - PTT គ្រោង​សិក្សា​លទ្ធភាព​បង្កើត​រោងចក្រ​ចម្រាញ់​ប្រេង​នៅ​កម្ពុជា​




PTT គ្រោង​សិក្សា​លទ្ធភាព​បង្កើត​រោងចក្រ​ចម្រាញ់​ប្រេង​នៅ​កម្ពុជា​

PTT គ្រោង​សិក្សា​លទ្ធភាព​បង្កើត​រោងចក្រ​ចម្រាញ់​ប្រេង​នៅ​កម្ពុជា​

ភ្នំពេញៈ​PTT​ដែល​ជា​ក្រុម​ហ៊ុន​ប្រេង​និង​ឧស្ម័ន​ដ៏​ធំ​បំផុត​របស់​ថៃ​បាន​ឲ្យ​ដឹង​ថា គេ​នឹង​សិក្សា​ពី​លទ្ធ​ភាព​បង្កើត​គម្រោង​ចម្រាញ់​ប្រេង​និង​តេល​សិលា​គីមី​នៅ​ក្នុង​ប្រទេស​អាស៊ាន​បី​ក្នុង​នោះ​មាន​កម្ពុជា​ឥណ្ឌូនេស៊ី​និង​មីយ៉ាន់ម៉ា​។​នេះ​បើ​តាម​សារព័ត៌មាន​DowJones​Newswire​។

លោក​PailinChuchottaworn​នាយក​ប្រតិ​បត្តិ​ក្រុម​ហ៊ុន​PTT​បាន​និយាយ​ថា​ទោះ​បី​យ៉ាង​នេះ​ក្តី​ប្រទេស​មីយ៉ាន់ម៉ា​និង​ឥណ្ឌូនេស៊ី​មាន​សក្តានុពល​ជាង​។

លោក​ប៊ិន​ម៉ៃមាលា​អ្នក​គ្រប់​គ្រង​ផ្នែក​ពាណិជ្ជ​កម្ម​របស់​PTT​នៅ​កម្ពុជា​មិន​បាន​ដឹង​ពី​បញ្ហា​នេះ​ទេ​ហើយ​លោក​មិន​ធ្វើ​អត្ថាធិប្បាយ​ណា​មួយ​លើ​បញ្ហា​នេះ​ឡើយ​។

លោក​ម៉ែន​ដែន​អ្នក​នាំ​ពាក្យ​អាជ្ញាធរ​ប្រេង​កាត​ជាតិ​កម្ពុជា (CNPA) បាន​ឲ្យ​ដឹង​ថា មក​ដល់​ពេល​នេះ​លោក​មិន​ទាន់​បាន​ទទួល​លិខិត​ផ្លូវ​ការ​ណា​មួយ​របស់​ក្រុម​ហ៊ុន​នៅ​ឡើយ​ទេ។​លោក​បន្ត​ថា​៖

«​វា​ជា​ព័ត៌​មាន​ថ្មី​សម្រាប់​ខ្ញុំ​ហើយ​ក្រុម​ការ​ងារ​មិន​ទាន់​បាន​ទទួល​ព័ត៌​មាន​ណា​មួយ​អំពី​បញ្ហា​នេះ​ទេ​»​។

លោក​ម៉ម​សម្បត្តិ​ប្រធាន​អង្គការ​អភិវឌ្ឍន៍​និង​ភាព​ជា​ដៃ​គូ​ក្នុង​សកម្ម​ភាព​(DPA)​មាន​ប្រសាសន៍​ថា គម្រោង​របស់​PTT​និង​ធ្វើ​ឲ្យ​ឧស្សាហកម្ម​នេះ​កាន់​តែ​មាន​ទស្សន​វិស័យ​ច្បាស់​លាស់​។​លោក​បន្ត​ថា​៖​«ខ្ញុំ​គិត​ថា វា​ជា​គម្រោង​ល្អ​បើ​ពួកគេ​បោះ​ជំហាន​ទៅ​មុខ​ព្រោះ​ពួកគេ​កំពុង​ប្រតិ​បត្តិ​ការ​អាជីវ​កម្ម​នៅ​ទី​នេះ​ជា​យូរ​មក​ហើយ​។​នៅ​ពេល​ពួក​គេ​ចាប់​ផ្តើម​ការ​សិក្សា​ពួក​គេ​អាច​ដឹង​ច្បាស់​ពី​សក្តានុពល​របស់​យើង​»​។

លោក​ថ្លែង​ថា៖​«​យើង​ទាំង​អស់​គ្នា​បាន​ដឹង​ហើយ​ថា​មាន​ក្រុម​ហ៊ុន​មួយ​បាន​ចាប់​ផ្តើម​សាង​សង់​រោង​ចក្រ​មួយ​នៅ​ខេត្ត​កំពត​កាល​ពី​ឆ្នាំ​ទៅ​ដូច្នេះ​ឥឡូវ​នេះ​បើ​PTT​ពិត​ជា​ចង់​ធ្វើ​រោង​ចក្រ​ចម្រាញ់​ប្រេង​មែន គេ​នឹង​ធ្វើ​ឲ្យ​ឧស្សាហកម្ម​នេះ​កាន់​តែ​មាន​ការ​ប្រកួត​ប្រជែង​ហើយ​អ្នក​ប្រើ​ប្រាស់​នឹង​រីក​រាយ​ជា​មួយ​នឹង​តម្លៃ​ប្រកួត​ប្រជែង​»​។

កាល​ពី​ឆ្នាំ​ទៅ​ក្រុម​ហ៊ុន​ក្នុង​ស្រុក​មួយ​ឈ្មោះ​Cambodian Petrochemical​Company​(CPC)​បាន​ចុះ​ហត្ថ​លេខា​លើ​ការ​វិនិយោគ​រួម​គ្នា​មួយ​ជា​មួយ​ក្រុម​ហ៊ុន​ចិន​ពីរ​គឺ​ក្រុម​ហ៊ុន​China​National​Automation​Control​System​Corporation​និង​ក្រុម​ហ៊ុន​ChineseSino​នូវ​ទឹក​ប្រាក់​៦០០​លាន​ដុល្លារ​សម្រាប់​ការ​សាង​សង់​រោង​ចក្រ​ចម្រាញ់​ប្រេង​នៅ​ខេត្ត​កំពត​។

កម្ពុជា​រំពឹង​ថា​នឹង​ទទួល​បាន​តំណក់​ប្រេង​លើក​ដំបូង​របស់​ខ្លួន​ក្នុង​ពេល​ឆាប់​ៗ​នេះ​ដែល​នឹង​ត្រូវ​ទាញ​យក​ដោយ​ក្រុមហ៊ុន​អាមេរិក​Chevron​។​នៅ​ក្នុង​ការ​វិនិយោគ​នេះ​រដ្ឋាភិ​បាល​កម្ពុជា​នឹង​ទទួល​បាន​ចំណែក​ពី​៧០ ទៅ​៨០​ភាគ​រយ​នៃ​ចំណូល​បាន​ពី​ប្រេង​។

លោក​ម៉ម​សម្បត្តិ បាន​ឲ្យ​ដឹង​ថា​កម្ពុជា​នឹង​ទទួល​បាន​ចំណូល​ពី​ប្រេង​ប្រមាណ​៥០០​លាន​ដុល្លារ​ក្នុង​មួយ​ឆ្នាំ​ៗ​ពី​ប្រេង​នៅ​ក្នុង​សមុទ្រ​។

លោក​Pailin បាន​ឲ្យ​ដឹង​ថា​បច្ចុប្បន្ន​ក្រុម​ហ៊ុន​PTT​ជិត​ឈាន​ដល់​ការ​បញ្ចប់​លទ្ធ​ភាព​សិក្សា​របស់​ខ្លួន​ដែល​មាន​តម្លៃ​២៨,​៧​ពាន់​លាន​ដុល្លារ​នៃ​ការ​បង្កើត​រោង​ចក្រ​តេល សិលា​គីមី​នៅ​តំបន់​សេដ្ឋ​កិច្ច​ពិសេស​Nhon Hoi​នៅ​ខេត្ត​Binh Dinh​របស់​វៀត​ណាម​ហើយ​៕SS

អត្ថបទគួរចាប់អារម្មណ៍