The Phnom Penh Post Search

Search form




Logo of Phnom Penh Post newspaper Phnom Penh Post - PTT ពង្រីក​ស្ថានីយ​ប្រេង ៤៥ ទៀត​នៅ​កម្ពុជា

PTT ពង្រីក​ស្ថានីយ​ប្រេង ៤៥ ទៀត​នៅ​កម្ពុជា

ស្ថានីយ​ប្រេង​របស់​ក្រុម​ហ៊ុន​ PTT ដែល​មាន​ទីតាំង​នៅ​កែង​ស្ពាន​អាកាស​ក្បាល​ថ្នល់។
ស្ថានីយ​ប្រេង​របស់​ក្រុម​ហ៊ុន​ PTT ដែល​មាន​ទីតាំង​នៅ​កែង​ស្ពាន​អាកាស​ក្បាល​ថ្នល់។ ផា លីណា

PTT ពង្រីក​ស្ថានីយ​ប្រេង ៤៥ ទៀត​នៅ​កម្ពុជា

ភ្នំពេញៈ ​ក្រុម​ហ៊ុន​ PTT Plc ជា​ក្រុម​ហ៊ុន​ប្រេង​ និង​ឧស្ម័ន​រដ្ឋ​របស់​ថៃ និង​ជា​ក្រុម​ហ៊ុន​ផ្គត់ផ្គង់​ប្រេង​សាំង​នាំ​មុខ​មួយ​នៅ​កម្ពុជា ​កំពុង​រៀប​ចំ​ផែន​ការ​ពង្រីក​អាជីវកម្ម​២៩៥​លាន​ដុល្លារ​លើ​អាជីវកម្ម​លក់​រាយ​នៅ​ក្នុង​រយៈ​ពេល​ ៥ ​ឆ្នាំ​ខាង​មុខ​ ដើម្បី​ក្លាយ​ជា​ក្រុម​ហ៊ុន​លក់​រាយ​នាំ​មុខ​មួយ​នៅ​តំបន់​អាស៊ី​។

ផែន​ការ​នេះ ​រួម​មាន​ការ​បង្កើន​​ចំនួន​ស្ថានីយ​ប្រេង​នៅ​ប្រទេស​ឡាវ​ពី ​២៤ ​កន្លែង​ដល់ ​៦២​ កន្លែង ​បង្កើន​ស្ថានីយ​ប្រេង​នៅ​កម្ពុជា​ពី​ ២០ ​កន្លែង​ដល់​ ៦៥ ​កន្លែង​ នៅ​ប្រទេស​ ហ្វីលីពីន ​ពី​ ៨៥​ កន្លែង​ដល់​ ១៥០​ កន្លែង​។ នេះ​បើ​យោង​តាម​សេចក្តី​រាយការណ៍​របស់​កាសែត​បាងកក​ប៉ុស្តិ៍​កាល​ពី​ថ្ងៃ​ចន្ទ​។

លោក ​បិន ​មនីមាលា ​នាយក​គ្រប់​គ្រង​រង​ទទួល​បន្ទុក​កិច្ចការ​សាជីវកម្ម​ប្រចាំ​ក្រុមហ៊ុន​ PTT (Cambodia) Limited ​មាន​ប្រសាសន៍​ថា ​ក្រុម​ហ៊ុន​ PTT ​នឹង​បង្កើន​ចំនួន​ស្ថានីយ​ប្រេង​ពី​ចំនួន​ ២០ ​កន្លែង​នៅ​កម្ពុជា​ដល់​៦៥​កន្លែង​នៅ​ទូទាំង​ប្រទេស​កម្ពុជា​ក្នុង​រយៈ​ពេល​៥​ឆ្នាំ​ខាង​មុខ។​

លោក​បាន​ឲ្យ​ដឹង​ថា៖​«​ជា​បឋម​ស្ថានីយ​ប្រេង​នឹង​ត្រូវ​បង្កើត​ឡើង​នៅ​ជុំវិញ​តំបន់​ប្រជុំជន​ និង​តាម​ផ្លូវ​ហាយវ៉េ​អាស៊ី​។ ​គោល​ដៅ​នេះ​គឺ​ដើម្បី​បង្កើត​ចំនួន​ស្ថានីយ​ប្រេង​៤៥​កន្លែង​បន្ថែម​ទៀត​នៅ​កម្ពុជា​»។

លោក​មាន​ប្រសាសន៍​ថា ​កំណើន​ចំនួន​ស្ថានីយ​ប្រេង​ដែល​នឹង​ត្រូវ​បង្កើត​ឡើង​នេះ នឹង​មិន​បង្កើត​ការ​ប្រកួត​ប្រជែង​ក្នុង​ចំណោម​ស្ថានីយ​ប្រេង​របស់​ក្រុម​ហ៊ុន​ PTT​ ដោយ​សារ​តម្លៃ​ប្រេង​សាំង​ត្រូវ​បាន​កំណត់​នៅ​តម្លៃ​ដដែល​សម្រាប់​ក្រុម​ហ៊ុន​លក់​រាយ​ទាំង​អស់។

​លោក​បន្ត​ថា៖ «​ស្ថានីយ​ប្រេង​របស់​ក្រុម​ហ៊ុន​ PTT​ នឹង​កំណត់​តម្លៃ​ដដែល​មិន​ថា​ស្ថានីយ​នោះ​មាន​ទីតាំង​នៅ​កន្លែង​ណា​នោះ​ទេ ដែល​ខុស​ពី​ស្ថានីយ​លក់​ប្រេង​ក្នុង​ស្រុក​មួយ​ចំនួន ​ដែល​តម្លៃ​ប្រេង​សាំង​ត្រូវ​បាន​លក់​ចេញ​ក្នុង​តម្លៃ​ខុស​គ្នា​នៅ​តាម​ស្ថានីយ​ប្រេង»។

លោក​បាន​បន្ថែម​ថា ​ការ​រត់​ពន្ធ​ប្រេង​ និង​ឧស្ម័ន​ខុស​ច្បាប់​នៅ​កម្ពុជា​ពី​ប្រទេស​ជិត​ខាង ​និង​លក់​ប្រេង​ទាំង​នោះ​ក្នុង​តម្លៃ​ថោក​ជាង នៅ​តែ​ជា​បញ្ហា​មួយ​ តែ​លោក​មាន​ភាព​សុទិដ្ឋិ​និយម​ថា ​បញ្ហា​ប្រឈម​នេះ​នឹង​បញ្ចប់​ នៅ​ពេល​ដែល​សមាហរណកម្ម​សេដ្ឋកិច្ច​អាស៊ាន​ចាប់​ផ្តើម។​

លោក​បាន​បន្ត​ថា៖«​រដ្ឋាភិបាល​កំពុង​ដោះស្រាយ​បញ្ហា​នេះ ​ទន្ទឹម​នឹង​នោះ​ដែរ​ នៅ​ពេល​សមាហរណកម្ម​សេដ្ឋកិច្ច​អាស៊ាន​ មក​ដល់ ​ក្រុម​ហ៊ុន​លក់​រាយ ​នឹង​ត្រូវ​ប្រតិបត្តិការ​អាជីវកម្ម​ស្រប​តាម​ស្តង់ដារ និង​ច្បាប់​»។​

ក្រុម​ហ៊ុន​ PTT​ ក៏​រំពឹង​ដែរ​ថា​ នឹង​បើក​អាជីវកម្ម​លក់​រាយ​នៅ​ប្រទេស​ឥណ្ឌូនេស៊ី ​ម៉ាឡេស៊ី ​មីយ៉ាន់ម៉ា ​តៃវ៉ាន់ ​និង​កូរ៉េ​ខាង​ត្បូង​។

លោក ​Buranin​ Rattanasombat ​អនុ​ប្រធាន​ប្រតិបត្តិ​ប្រចាំ​ក្រុមហ៊ុន​ប្រេង​ PTT​ បាន​ប្រាប់​កាសែត​បាងកក​ប៉ុស្តិ៍​ថា​ ថវិកា​ភាគ​ច្រើន​នឹង​ត្រូវ​ប្រើប្រាស់​ដើម្បី​ពង្រីក​ការ​បង្កើត​ស្ថានីយ​ប្រេង​នៅ​ទីផ្សារ​ក្នុង​ស្រុក និង​តាម​ប្រទេស​ជិត​ខាង ​ដោយ​ថវិកា​តិច​តួច ​នឹង​បែង​ចែក​សម្រាប់​រៀប​ចំ​ក្រុម​ហ៊ុន​មិន​មែន​ប្រេង។

កម្ពុជា​ចំណាយ​ជាង​១​ពាន់​លាន​ដុល្លារ​រៀង​រាល់​ឆ្នាំ​ដើម្បី​នាំ​ចូល​ប្រេង និង​ឧស្ម័ន​ពី​ប្រទេស​ជិត​ខាង​ដើម្បី​ផ្គត់​ផ្គង់​តម្រូវ​ការ​ក្នុង​ស្រុក៕ BP

អត្ថបទគួរចាប់អារម្មណ៍