.jpg)
PWSA ដាក់ផែនការរកចំណូលឱ្យបានជាង ៨៥ លានដុល្លារក្នុងឆ្នាំ ២០២២។ រូបថត ភ្នំពេញ ប៉ុស្តិ៍
ភ្នំពេញៈ រដ្ឋាករទឹកស្វយ័តក្រុងភ្នំពេញ (PWSA) ដែលគ្រប់គ្រងដោយរដ្ឋ និងចុះបញ្ជីនៅផ្សារមូលបត្រកម្ពុជា (CSX) បានដាក់ផែនការរកចំណូលឱ្យបានជាង ៨៥ លានដុល្លារក្នុងឆ្នាំ ២០២១។ នេះបើយោងតាមសេចក្តីប្រកាសព័ត៌មាន។
ការកំណត់នេះធ្វើឡើងក្នុងកិច្ចប្រជុំមហាសន្និបាតភាគហ៊ុនិកលើកទី ៩ ជាមួយភាគទុនិកដែលដឹកនាំដោយលោក អ៊ុំ សុថា ប្រធានប្រឹក្សាភិបាលនៃរដ្ឋាករទឹកស្វយ័តក្រុងភ្នំពេញកាលពីថ្ងៃទី ២១ ខែឧសភា។
PWSA ឱ្យដឹងថា ទិសដៅអាជីវកម្មឆ្នាំ ២០២១ គឺផែនការផលិតទឹកស្អាត ២២៧ ៩៦០ ៣៥៨ ម៉ែត្រគុប និងបង្កើនអតិថិជនថ្មីឱ្យបាន ២៧ ០០៦ បណ្តាញនៅឆ្នាំនេះ។
PWSA ក៏មានផែនការរកចំណូលឱ្យបាន ៣៤៧ ៤៤១ ៦៦៥ ០០០ រៀល (ជាង ៨៥ លានដុល្លារ) ដោយកំណត់ទិសដៅចំណេញក្រោយបង់ពន្ធ ១០៣ ៧៤២ ៥០៤ ០០០ រៀល (ជាង ២៥,៤៧ លានដុល្លារ) ព្រមទាំងមានផែនការចំណាយ ២១៧ ៧៦៣ ៥៣៥ ០០០ រៀល (៥៣,៤៧ លានដុល្លារ)។
លោក ហុង សុខហួរ អគ្គនាយក CSX ប្រាប់ភ្នំពេញប៉ុស្តិ៍ថា នេះជាតួលេខល្អដែលអាចទាក់ទាញការចាប់អារម្មណ៍ពីសាធារណជនកាន់តែខ្លាំងនៅវិស័យនេះ។ លោកឱ្យដឹងថា៖ «ខ្ញុំគិតថា អាជីវកម្មក្នុងវិស័យនេះមិនទទួលរងផលប៉ះពាល់ជាអវិជ្ជមានប៉ុន្មានទេក្នុងអំឡុងពេលការរីករាលដាលជំងឺកូវីដ-១៩ ប៉ុន្តែអាចមានការលំបាកខ្លះក្នុងការប្រមូលការទូទាត់ពីអ្នកប្រើប្រាស់របស់គាត់»។
របាយការណ៍លទ្ធផលអាជីវកម្មរបស់ PWSA ឆ្នាំ ២០២០ បង្ហាញថា PWSA ផលិតទឹកស្អាតបាន ២២៤ ៧៧៣ ៩៧១ ម៉ែត្រគុប បង្កើនអតិថិជនថ្មីបាន ១៧ ៧១២ បណ្តាញ និងទទួលបានចំណូល ៣២៤ ៣៦៧ ៨៥៦ ០០០ រៀល (៧៩,៦៤ លានដុល្លារ) និងប្រាក់ចំណេញក្រោយបង់ពន្ធ ៨៨ ៣៥១ ៨៤៥ ០០០ រៀល (២១,៦៩ លានដុល្លារ)។
PWSA កាលពីថ្ងៃទី ១ ខែកុម្ភៈ បានចាប់ផ្ដើមសាងសង់រោងចក្រប្រព្រឹត្តិកម្មទឹកស្អាតបាក់ខែងមានតម្លៃ ៣៨០ លានដុល្លារ ជាការឆ្លើយតបទៅនឹងតម្រូវការដែលកើនឡើង។
ការសង់រោងចក្រនេះនឹងធ្វើឡើងជា ២ ដំណាក់កាលដោយដំណាក់កាលទី ១ នឹងបញ្ចប់ត្រឹមចុងឆ្នាំ ២០២២ និងដំណាក់កាលទី ២ ចុងឆ្នាំ ២០២៣។
របាយការណ៍ហិរញ្ញវត្ថុរបស់ក្រុមហ៊ុនដែលបានផ្ញើឱ្យក្រុមហ៊ុន CSX បង្ហាញថា ក្នុងរយៈពេល ១២ ខែគិតត្រឹមថ្ងៃទី ៣១ ខែធ្នូ ឆ្នាំ ២០២០ PWSA រកចំណូលបានជាង ៣២៤ ពាន់លានរៀល កើនជិត ១០៨ ពាន់លានរៀលស្មើនឹង ៤៩,៨៣ ភាគរយបើធៀបនឹងរយៈពេលដូចគ្នាត្រីមាសមុន និងប្រាក់ចំណេញជាង ៨៨ ពាន់លានរៀល កើនឡើង ៥៥ ពាន់លានរៀល ឬ ១៦៥,៣៩ ភាគរយធៀបនឹង ១២ ខែ គិតត្រឹមថ្ងៃទី ៣១ ខែធ្នូ ឆ្នាំ ២០១៩៕ LA
