ក្រុងដូហាៈ ក្រុមហ៊ុន Qatar Airways នឹងបន្តពង្រីកអាជីវកម្ម បើទោះជាក្រុមហ៊ុននេះត្រៀមខ្លួនប្រកាសពីការខាតបង់ប្រចាំឆ្នាំ «ដ៏ច្រើន» ដោយសារការហាមឃាត់មិនឲ្យប្រើប្រាស់ដែនអាកាសរបស់ប្រទេសជិតខាងក្តី។ នេះបើយោងតាមនាយកប្រតិបត្តិរបស់ក្រុមហ៊ុនអាកាសចរណ៍មួយនេះកាលពីថ្ងៃចន្ទ។
លោក Akbar al-Baker បានមានប្រសាសន៍ថា ក្រុមហ៊ុន Qatar Airways នៅតែជា «ក្រុមហ៊ុនដ៏រឹងមាំមួយ» ដដែល បើទោះជាបានរងផលប៉ះពាល់ខ្លាំងដោយសារជម្លោះការទូតប្រចាំតំបន់ដែលបានបង្ហាញពីការបាត់បង់លទ្ធភាពរបស់ក្រុមហ៊ុនក្នុងការប្រើប្រាស់ផ្លូវហោះហើរឆ្លងកាត់ប្រទេសអារ៉ាប៊ីសាអ៊ូឌីត ប្រទេសអេមីរ៉ាតអារ៉ាប់រួម ប្រទេសបារ៉ែន និងប្រទេសអេហ្ស៊ីបក្តី។
លោក Baker បានថ្លែងក្នុងសន្និសីទសារព័ត៌មានមួយថា៖ «ត្រូវហើយ វានឹងក្លាយជាការខាតបង់ច្រើន។ នៅពេលខ្ញុំនិយាយថា យើងនឹងប្រកាសពីការខាតបង់ច្រើននោះ ចំពោះរូបខ្ញុំផ្ទាល់ បន្ទាប់ពីទទួលបានប្រាក់ចំណេញ វាគឺជាការខាតបង់ច្រើន បើទោះជាខ្ញុំខាតបង់ត្រឹមតែ ១០ លានដុល្លារក៏ដោយ»។
តែលោកបានបន្តឲ្យដឹងថាក្រុមហ៊ុនអាកាសចរណ៍ជាតិមួយនេះនឹងមិនប្រឈមនឹងការដួលរលំនោះទេ។
លោកបានបញ្ជាក់ថា៖ «អ្នកអាចមើលឃើញបើទោះជាថា យើងកំពុងព្យាករពីការខាតបង់ក្តី យើងនឹងនៅតែពង្រីកអាជីវកម្ម យើងនឹងនៅតែវិនិយោគ យើងនឹងនៅតែទិញយន្តហោះបន្ថែមទៀត»។
លោកបន្ថែមថា៖ «យើងនឹងបន្តពង្រីកអាជីវកម្ម បន្តជ្រើសរើសបុគ្គលិក មិនមែនបណ្តេញបុគ្គលិកនោះទេ មិនមែនចតយន្តហោះចោលនោះទេ (និង) មិនកាត់បន្ថយបណ្តាញការងារនោះទេ ពោលគឺយើងពិតជាធ្វើកិច្ចការដែលផ្ទុយពីនេះ»។
ការហាមឃាត់មិនឲ្យក្រុមហ៊ុន Qatar Airways ប្រើប្រាស់ផ្លូវអាកាសរបស់ប្រទេសជិតខាងបានបង្កើនចំណាយចំពោះក្រុមហ៊ុននេះក្នុងអំឡុងពេល ១០ ខែ គិតចាប់ពីវិបត្តិការទូតបានផ្ទុះឡើង។
ក្រុមហ៊ុនអាកាសចរណ៍នេះបានទទួលប្រាក់ចំណេញចំនួន ៥៤០ លានដុល្លារដុល្លារកាលពីឆ្នាំមុន ហើយលទ្ធផលថ្មីនឹងត្រូវប្រកាសនៅខែមិថុនាខាងមុខនេះ។
Qatar Airways មានយន្តហោះប្រមាណ ២០០ គ្រឿង និងបញ្ជាទិញយន្តហោះច្បាស់លាស់ជាង ១០០ គ្រឿងទៀត។
លោក Baker បានចោទប្រទេសជិតខាងរបស់ខ្លួនថា «ធ្វើបាប» ក្រុមហ៊ុន Qatar បន្ទាប់ពីប្រទេសទាំងនោះ បានកាត់ផ្តាច់ទំនាក់ទំនងការទូតទាំងអស់ជាមួយកាតានៅឆ្នាំមុន៕ BP