.jpg)
ទិដ្ឋភាពនៅកំពង់ផែក្នុងប្រទេសចិន។ RCEP រួមបញ្ចូលចិន តែគ្មានអាមេរិក។ រូបថត AFP
ក្រុងសិង្ហបុរីៈ មេដឹកនាំពិភពលោក នឹងជំរុញឲ្យបញ្ចប់យ៉ាងរហ័សនូវកិច្ចព្រមព្រៀងពាណិជ្ជកម្មដ៏ធំមួយដែលគាំទ្រដោយប្រទេស ចិន ក្នុងកិច្ចប្រជុំកំពូលមួយនៅសប្ដាហ៍នេះ ក្នុងគ្រាដែលមានការរិះគន់ដល់របៀបវារៈការគាំពារនិយម និង «អាមេរិកជាអាទិភាព» កាន់តែខ្លាំងឡើងៗរបស់លោក ដូណាល់ ត្រាំ។
ប្រទេស ចិន ជប៉ុន ឥណ្ឌា និងបណ្ដាប្រទេសក្នុងតំបន់អាស៊ីប៉ាស៊ីហ្វិកផ្សេងទៀត អាចប្រកាសកិច្ចព្រមព្រៀងដ៏ទូលំទូលាយមួយស្ដីពីកិច្ចព្រមព្រៀងភាពជាដៃគូសេដ្ឋកិច្ចដ៏ទូលំទូលាយក្នុងតំបន់ (RCEP) ដែលគ្របដណ្ដប់លើប្រជាជនពាក់កណ្ដាលពិភពលោក នៅក្រៅជំនួបនៃកិច្ចប្រជុំប្រចាំឆ្នាំនេះ។
អាមេរិក មិនគ្រាន់តែអវត្តមានក្នុងកិច្ចព្រមព្រៀងនេះប៉ុណ្ណោះទេ តែលោក ត្រាំ ក៏នឹងមិនចូលរួមកិច្ចប្រជុំកំពូលក្នុងប្រទេស សិង្ហបុរី នេះផងដែរ ដែលបញ្ជាក់ពីការដកខ្លួនយ៉ាងឆ្ងាយរបស់លោកចេញពីកិច្ចខិតខំប្រឹងប្រែង ដើម្បីបង្កើតច្បាប់ពាណិជ្ជកម្មពិភពលោក និងការបង្កើនបញ្ហាចោទបន្ថែមទៀតអំពីការប្ដេជ្ញាចិត្តរបស់ទីក្រុងវ៉ាស៊ីនតោនចំពោះអាស៊ី។
លោកស្រី Deborah Elms នាយកប្រតិបត្តិការមជ្ឈមណ្ឌលពាណិជ្ជកម្មអាស៊ី បានប្រាប់ទីភ្នាក់ងារព័ត៌មាន AFP ថា សេចក្ដីប្រកាសក្នុងប្រទេស សិង្ហបុរី ដែលថា ការចរចានានាស្តីពីកិច្ចព្រមព្រៀង RCEP ភាគច្រើនត្រូវបានបញ្ចប់នោះ នឹងមាន «សារៈសំខាន់ជានិមិត្តរូបមួយនៃការប្ដេជ្ញាចិត្តរបស់អាស៊ីចំពោះពាណិជ្ជកម្ម នៅពេលភាពតានតឹងពិភពលោកកាន់តែកើនឡើង»។
ប៉ុន្តែលោកស្រីឲ្យដឹងថា ការចរចាលើវិស័យមួយចំនួនទំនងជានឹងបន្តទៅក្នុងឆ្នាំក្រោយ ខណៈដែលអ្នកការទូតចូលរួមក្នុងកិច្ចប្រជុំកំពូលមួយរូប បាននិយាយដោយមិនបញ្ចេញឈ្មោះថា «ការរីកចម្រើនជាច្រើន» ត្រូវបានធ្វើឡើង ប៉ុន្តែនៅតែមានចំណុចជាច្រើនកំពុងរិះគន់។
កិច្ចប្រជុំរបស់មេដឹកនាំពិភពលោកទាំង ២០ កើតមានឡើងក្នុងគ្រាដែលមានជម្លោះពាណិជ្ជកម្មជាច្រើនខែរវាងប្រទេស ចិន និងអាមេរិក។
មេដឹកនាំផ្សេងទៀតដែលចូលរួមក្នុងកិច្ចប្រជុំកំពូលនេះ រួមមានទាំងលោកប្រធានាធិបតីរបស់ប្រទេសរុស្ស៊ី វ៉្លាឌីមៀរ ពូទីន និងលោកនាយករដ្ឋមន្ដ្រីជប៉ុន ស៊ីនហ្សូ អាបេ ផងដែរ។
ប៉ុន្តែការផ្ដោតការយកចិត្តទុកដាក់ភាគច្រើន នឹងផ្ដោតលើ RCEP ដោយសារតែមេដឹកនាំភាគច្រើន ស្វែងរកសារមួយគាំទ្រដល់ពាណិជ្ជកម្មសេរី៕ AFP/LA
