.jpg)
គម្រោងរ៉ែមាសថ្មីមួយកន្លែងនៅស្រុកមេមត់ ខេត្តត្បូងឃ្មុំ ដែលគ្របដណ្ដប់លើផ្ទៃដីទំហំ ១០៧ គីឡូម៉ែត្រការ៉េ កំពុងធ្វើការវាយតម្លៃបរិស្ថាន។ រូបថត ភ្នំពេញ ប៉ុស្តិ៍
ភ្នំពេញ៖ Renaissance Minerals (Cambodia) Ltd ជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL ដែលចុះបញ្ជីនៅប្រទេសអូស្ដ្រាលី បច្ចុប្បន្នកំពុងធ្វើការវាយតម្លៃផលប៉ះពាល់បរិស្ថាន (EIA) នៃគម្រោងរ៉ែមាសថ្មីមួយកន្លែងនៅស្រុកមេមត់ ខេត្តត្បូងឃ្មុំ បន្ទាប់ពីខ្លួនទើបទទួលបានអាជ្ញាប័ណ្ណពីរាជរដ្ឋាភិបាលកម្ពុជានាពេលថ្មីៗនេះ។
លោក Bernie Cleary ប្រធានគ្រប់គ្រងផ្នែកប្រតិបត្តិការក្រុមហ៊ុន Renaissance បានប្រាប់ ភ្នំពេញ ប៉ុស្ដិ៍ ថា អាជ្ញាប័ណ្ណមេមត់ គឺជាអាជ្ញាប័ណ្ណរុករករ៉ែមាសដែលមានសក្ដានុពលខ្ពស់ ដោយគ្របដណ្ដប់លើផ្ទៃដីទំហំ ១០៧ គីឡូម៉ែត្រការ៉េ និងមានទីតាំងចម្ងាយ ៩៥ គីឡូម៉ែត្រភាគអាគ្នេយ៍នៃគម្រោងរ៉ែមាសអូរខ្វាវដែលក្រុមហ៊ុនកំពុងប្រតិបត្តិការជិតទាញយករ៉ែនៅខេត្តមណ្ឌលគិរី។
លោកថ្លែងថា៖ «ចក្ខុវិស័យរបស់យើងនឹងមានផលប៉ះពាល់វិជ្ជមានលើបរិស្ថានជិតអណ្ដូងរ៉ែ និងតម្លៃសង្គម តាមរយៈការកំណត់ទិសដៅអនុលោមតាមអភិបាលកិច្ចសាជីវកម្មដ៏តឹងរ៉ឹង គោលការណ៍ណែនាំអន្តរជាតិ និងច្បាប់ក្នុងស្រុក ព្រមទាំងចូលរួម និងសហការជាមួយភាគីពាក់ព័ន្ធនៅក្នុងតំបន់គម្រោងនេះ»។
លោកប្រាប់ទៀតថា ក្រុមហ៊ុនកំពុងអនុវត្តការវាយតម្លៃផលប៉ះពាល់បរិស្ថានដំបូង ដែលរួមមានការចូលរួមរបស់សហគមន៍ និងការកំណត់បរិស្ថានដែលមានសក្ដានុពល កត្តាសង្គម និងបុរាណវិទ្យា ដោយនៅពេលបញ្ចប់ និងអនុម័តដោយក្រសួងបរិស្ថាន ហើយនឹងគ្រប់គ្រងលើការអនុវត្តការរុករកនៅក្នុងលក្ខខណ្ឌស្មារតីទទួលខុសត្រូវផ្នែកសង្គម និងបរិស្ថាន។
លោកបន្ថែមថា៖ «បច្ចុប្បន្នក្រុមហ៊ុន Renaissance កំពុងវាយតម្លៃកំណត់ត្រាប្រវត្តិសាស្ដ្រនៃតំបន់អាជ្ញាប័ណ្ណ ដើម្បីរៀបចំផែនការកម្មវិធីរុករករ៉ែ ដែលនឹងចាប់ផ្ដើម បន្ទាប់ពីការចេញអាជ្ញាប័ណ្ណផ្នែកបរិស្ថាន»។
យោងតាមសេចក្ដីប្រកាសរបស់ក្រុមហ៊ុនកាលពីថ្ងៃទី ២៨ ខែមករា ក្រសួងរ៉ែ និងថាមពលកម្ពុជា បានផ្ដល់ការយល់ព្រមដំបូងក្នុងការអនុវត្តការរុករករ៉ែមាស ហើយអាជ្ញាប័ណ្ណនេះនឹងត្រូវបានចេញជាផ្លូវការបន្ទាប់ពីការបញ្ចប់ឯកសារបទដ្ឋាន។ ក្រុមហ៊ុននេះថា៖ «ការណ៍នេះធ្វើឡើងបន្ទាប់ពីការបញ្ចប់ការវាយតម្លៃផលប៉ះពាល់បរិស្ថាននៃការរុករករ៉ែ ដែលអនុម័តដោយក្រសួងបរិស្ថានកម្ពុជា»។
លោក Morgan Hart នាយកគ្រប់គ្រងក្រុមហ៊ុនបានឱ្យដឹងថា គម្រោងមេមត់បំពេញបន្ថែមលើផលបត្រវិនិយោគកន្លែងជួលដែលមានស្រាប់របស់ក្រុមហ៊ុន ហើយស្របតាមគោលបំណងរបស់ក្រុមហ៊ុននៃការបង្កើនតំបន់ទ្រព្យសកម្មរុករករ៉ែប្រកបដោយសក្ដានុពលនៅប្រទេសកម្ពុជា ជាមួយនឹងចក្ខុវិស័យក្នុងការបង្កើតផែនការនៃទ្រព្យសកម្មវិនិយោគ ដែលបន្ថែមដល់ធនធាន និងទុនបម្រុងបច្ចុប្បន្ននៅគម្រោងរ៉ែមាសអូរខ្វាវទំហំ ១,១៤ Moz។
លោកបន្ថែមថា គម្រោងរ៉ែមាសអូរខ្វាវបន្តធ្វើទាន់ពេលវេលា និងតាមថវិកាជាមួយនឹងការអនុវត្តការងារ និងការរំពឹងទុករ៉ែមាសដំបូងនៅត្រីមាសទី២ ឆ្នាំ ២០២១ តាមរយៈកិច្ចខិតខំរបស់ក្រុមហ៊ុនអភិវឌ្ឍន៍។
លោកនិយាយថា៖ «វត្តមានការងារសិប្បកម្មដែលកំពុងធ្វើឡើងយ៉ាងទូលំទូលាយនៅក្នុងតំបន់ជួលថ្មី និងការចង្អុលបង្ហាញដ៏រឹងមាំនៃការផលិតរ៉ែមាសដ៏សំខាន់ពីកំណត់ត្រាជាប្រវត្តិសាស្ដ្រផ្ដល់ដល់ក្រុមហ៊ុន Emerald នូវតំបន់អាជ្ញាប័ណ្ណរ៉ែមាសប្រកបដោយសក្ដានុពលខ្ពស់ផ្សេងទៀត ជាមួយនឹងសក្ដានុពលដ៏រឹងមាំក្នុងការបន្ថែមដល់មូលដ្ឋានធនធាន និងទុនបម្រុងរបស់ក្រុមហ៊ុននៅក្នុងប្រទេសកម្ពុជា»។
ថ្មីៗនេះ ក្រុមហ៊ុន Renaissance Minerals (Cambodia)Ltd ជិតសម្រេចបានការផលិតរ៉ែមាសលើកដំបូងរបស់ខ្លួននៅគម្រោងរ៉ែមាសអូរខ្វាវ នៅខេត្តមណ្ឌលគិរី ដែលគ្រោងនឹងចាប់ផ្ដើមដំណើរការនៅក្នុងត្រីមាសទី២ ឆ្នាំនេះ៕
