ភ្នំពេញៈ Sailun Group ជាក្រុមហ៊ុនរបស់ប្រទេសចិន កំពុងពិចារណាបង្កើតរោងចក្រផលិតកង់រថយន្តដឹកអ្នកដំណើរនៅប្រទេសកម្ពុជា។ នេះបើយោងតាមប្រព័ន្ធព័ត៌មាន tyrepress media ដែលចេញផ្សាយកាលពីថ្ងៃទី ៩ ខែមីនា។
យោងតាមការចេញផ្សាយកាលពីថ្ងៃទី ៩ ខែមីនា ក្រុមហ៊ុនផលិតកង់រថយន្តនេះបានចាប់អារម្មណ៍ក្នុងការសាងសង់រោងចក្រក្នុងតំបន់សេដ្ឋកិច្ចពិសេស QiLu (Cambodia) នៅខេត្តសា្វយរៀងដោយមានសមត្ថភាពផលិតកង់រថយន្តបាន ៥ លានក្នុង ១ ឆ្នាំ។ នេះបើតាមព័ត៌មានខាងលើ។
Tyrepress media បានឱ្យដឹងថា Sailun Group បានប៉ាន់ប្រមាណថា គម្រោងនេះនឹងតម្រូវឱ្យមានការវិនិយោគចំនួន ១,១៨ ពាន់លានយន់។
តំបន់សេដ្ឋកិច្ចពិសេស Qilu ត្រូវបានប្រតិបត្តិការដោយក្រុមហ៊ុន Qilu (Cambodia) Economic Co., Ltd។ តំបន់សេដ្ឋកិច្ចពិសេសនេះស្ថិតនៅក្នុងខេត្តស្វាយរៀង។
លោក រស់ ផារិទ្ធ អ្នកនាំពាក្យ រដ្ឋបាលខេត្តស្វាយរៀងបានស្វាគមន៍ចំពោះគម្រោងបង្កើតរោងចក្រផលិតសម្បកកង់រថយន្តនេះ។ លោកនិយាយថា រដ្ឋបាលខេត្តគាំទ្ររាល់គម្រោងវិនិយោគទាំងអស់ដើម្បីជួយបង្កើតការងារ និងបង្កើនប្រាក់ចំណូលដល់ប្រជាជន។
លោកថ្លែងថា៖ «យើងគ្មានអ្វីត្រូវជំទាស់ទេ ចំពោះគាត់មានបំណងមកវិនិយោគនៅស្រុក យើងឱ្យតែត្រឹមត្រូវតាមច្បាប់ និងមានការអនុម័តពីក្រុមប្រឹក្សាអភិវឌ្ឍន៍កម្ពុជា»។
ក្រុមប្រឹក្សាអភិវឌ្ឍន៍កម្ពុជាកាលពីខែកុម្ភៈក៏បានអនុម័តរោងចក្រផលិតកង់រថយន្តមានតម្លៃ ១៥ លានដុល្លាររបស់ក្រុមហ៊ុន Cart Tire Co Ltd នៅក្នុងតំបន់សេដ្ឋកិច្ចពិសេស QiLu Bavet Special Economic Zone នៅក្រុងបាវិតខេត្តស្វាយរៀងផងដែរ។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូបានប្រាប់ភ្នំពេញប៉ុស្តិ៍ថ្មីៗនេះថា កម្ពុជាស្វាគមន៍គម្រោងនេះដោយលើកឡើងថា វានឹងស្រូបយកកិច្ចព្រមព្រៀងដ៏ធំនៃដំណាំកៅស៊ូមិនទាន់កែច្នៃនៅកម្ពុជា ដែលពេលនេះភាគច្រើនត្រូវបាននាំចេញទៅក្រៅប្រទេស។
លោកនិយាយថា៖ «រោងចក្រផលិតកង់រថយន្តក្នុងប្រទេសគឺជាព័ត៌មានដ៏អស្ចារ្យ»។ លោកបន្តថា៖ «យើងកំពុងខិតខំធ្វើឱ្យមានកំណើនក្នុងឧស្សាហកម្មកៅស៊ូ និងបានអញ្ជើញក្រុមវិនិយោគិន ដើម្បីចាប់យកមួយចំណែកនៃឧស្សាហកម្មនេះ និងកែច្នៃកៅស៊ូរបស់យើងទៅជាកង់រថយន្ត»។
លោកបន្ថែមថា៖ «ការបង្កើតរោងចក្រផលិតកង់រថយន្តនៅក្នុងប្រទេសនឹងធ្វើឱ្យតម្លៃកៅស៊ូក្នុងស្រុកមានស្ថិរភាព និងកាត់បន្ថយការពឹងផ្អែកលើតម្លៃតាមបណ្ដាប្រទេសផ្សេង»។
ទិន្នន័យពីអគ្គនាយកដ្ឋានគយ និងរដ្ឋាករក្រសួងសេដ្ឋកិច្ច និងហិរញ្ញវត្ថុ ឱ្យដឹងថា កម្ពុជាបាននាំចូលរថយន្តចំនួន ១ ១២៤ ២១០ គ្រឿងមានតម្លៃ ១,៨៨២ ពាន់លានដុល្លារក្នុងឆ្នាំ ២០១៩។
ដោយបែងចែកតាមប្រភេទកម្ពុជាបាននាំចូលម៉ូតូ ៥១១ ៤៣៤ គ្រឿងមានតម្លៃ ២៧៨,២៨ លានដុល្លារ កង់ ៤៦៦ ១១២គ្រឿងមានតម្លៃ ១០,៤ លានដុល្លារ និងរថយន្ត ៩៥ ០៦៧ គ្រឿងមានតម្លៃ ៨២៧, ៤៤ លានដុល្លារ។
កម្ពុជានាំចូលរថយន្តដឹកអ្នកដំណើរពី ១០ កៅអី ឬលើសពីនេះមានតម្លៃ ១១២,៧៥ លានដុល្លារ រថយន្តដឹកទំនិញ ៣៩ ០០៨ គ្រឿងមានតម្លៃ ៥៤២,២ លានដុល្លារ និងរថយន្តផ្សេងៗ ៤៥៩១ គ្រឿង តម្លៃ ១១០,៧៨ លានដុល្លារ៕ LA