ទីក្រុងសេអ៊ូលៈ ក្រុមហ៊ុនអេឡិចត្រូនិក Samsung បានកើនប្រាក់ចំណេញប្រតិបត្តិការរហូតដល់ជិត ៦០ ភាគរយក្នុងត្រីមាសទី ៣ ខណៈអាជីវកម្មទូរស័ព្ទចល័ត និងបន្ទះឈីបរបស់ខ្លួនត្រូវបានកើនឡើងដោយការដាក់ទណ្ឌកម្មរបស់សហរដ្ឋអាមេរិកប្រឆាំងនឹងក្រុមហ៊ុន Huawei ដែលជាគូប្រជែងរបស់ខ្លួន។
ក្រុមហ៊ុនយក្សផ្នែកបច្ចេកវិទ្យារបស់កូរ៉េខាងត្បូងបានឱ្យដឹងក្នុងការព្យាករប្រាក់ចំណូលរបស់ខ្លួនថា ខ្លួនរំពឹងថាប្រាក់ចំណេញប្រតិបត្តិការឈានដល់ ១២,៣ ពាន់ពាន់លានវុន (១០,៦ ពាន់លានដុល្លារ) ពីខែកក្កដាដល់ខែកញ្ញា កើនពី ៧,៨ ពាន់ពាន់លានវុនក្នុងរយៈពេលដូចគ្នាកាលពីឆ្នាំមុន។
ការព្យាករនឹងបង្ហាញថា នេះជាប្រាក់ចំណេញប្រតិបត្តិការខ្ពស់បំផុតរបស់ក្រុមហ៊ុនប្រចាំត្រីមាសនីមួយៗរយៈពេល ២ ឆ្នាំ និងដើរលឿនជាងការព្យាកររបស់អ្នកវិភាគ។
ក្រុមហ៊ុនអេឡិចត្រូនិក Samsung គឺសំខាន់ណាស់ចំពោះសុខភាពសេដ្ឋកិច្ចរបស់ប្រទេសកូរ៉េខាងត្បូង។ វាជាក្រុមហ៊ុននិមិត្តសញ្ញាជាតិ និងជាបុត្រសម្ព័ន្ធនៃក្រុមហ៊ុនមេ Samsung គ្រុបដែលរហូតមកដល់ពេលនេះជាក្រុមហ៊ុនធំជាងគេបំផុតគ្រប់គ្រងដោយគ្រួសារដែលគ្រប់គ្រងអាជីវកម្មនៅក្នុងប្រទេសដែលមានសេដ្ឋកិច្ចធំជាងគេទី ១២ នៅលើពិភពលោក។
ចំណូលសរុបរបស់ក្រុមហ៊ុននេះសមមូលទៅនឹង ១ ភាគ ៥ នៃផលិតផលក្នុងស្រុកសរុបរបស់ប្រទេសកូរ៉េខាងត្បូង។
លោក James Kang អ្នកវិភាគជាន់ខ្ពស់នៅក្រុមហ៊ុន Euromonitor International Korea បាននិយាយថា ការចេញលក់ទូរស័ព្ទដៃទំនើបចុងក្រោយបំផុតរបស់ Samsung គឺ Galaxy Note 20 និង Galaxy Z Fold 2 កាលពីខែសីហារួមជាមួយនឹងការលក់ទូរស័ព្ទសេរីថ្មីៗទៀតបាននាំទៅដល់ការលក់ឈានមុខក្នុងត្រីមាសទី ៣ របស់ក្រុមហ៊ុន។
ទីក្រុងវ៉ាស៊ីនតោនបានហាមក្រុមហ៊ុនបរទេសក្នុងការផ្គត់ផ្គង់ឱ្យក្រុមហ៊ុន Huawei ជាមួយបច្ចេកវិទ្យាមានប្រភពពីអាមេរិក ដែលចូលជាធរមានកាលពីថ្ងៃទី ១៥ ខែកញ្ញា បានកាត់ផ្តាច់នូវការផ្គត់ផ្គង់ដ៏សំខាន់នៃឧបករណ៍ពាក់កណ្តាលចម្លង និង កម្មវិធីដែលត្រូវការចាំបាច់សម្រាប់ផ្គុំទូរស័ព្ទទំនើប និងឧបករណ៍ 5G ក៏ជាផ្នែកជំរុញកំណើនដែរ។
លោក Kang Minsoo អ្នកវិភាគនៅក្រុមហ៊ុនស្រាវជ្រាវ Counterpoint Research បាននិយាយថា ការដាក់ទណ្ឌកម្មប្រឆាំងនឹងក្រុមហ៊ុន Huawei កំពុងក្លាយជា «កត្តាចម្បង» ប៉ះពាល់ដល់ទីផ្សារទូរស័ព្ទស្មាតហ្វូនជាសកល។
លោកបន្ថែម៖ «សម្រាប់ Samsung វានឹងក្លាយជាឱកាសល្អដើម្បីបង្កើនចំណែកទីផ្សារក្នុងតំបន់អឺរ៉ុប ដែលខ្លួនបានប្រកួតប្រជែងតម្លៃជាច្រើនជាមួយផលិតផលរបស់ Huawei»។
អាជីវកម្មមេម៉ូរីរបស់ក្រុមហ៊ុនក៏ទទួលបានអត្ថប្រយោជន៍ពីជម្លោះ បន្ទាប់ពីក្រុមហ៊ុន Huawei ប្រញាប់ប្រញាល់ធ្វើសន្និធិឧបករណ៍ពាក់កណ្តាលចម្លង ផលិតដោយក្រុមហ៊ុន Samsung មុនពេលការរឹតត្បិតរបស់សហរដ្ឋអាមេរិកបានចាប់ផ្តើម។
អ្នកវិភាគថា៖ «ក្រុមហ៊ុន Huawei បានធ្វើសន្និធិផលិតផលបន្ថែមដែលមានតម្លៃស្មើរយៈពេល ៦ ខែនៃបញ្ជីសារពើភណ្ឌមុនបម្រាមរបស់អាមេរិកចូលជាធរមានថ្ងៃ ទី ១៥ ខែកញ្ញា»៕ RR