ក្រុងប៉ារីសៈ ក្រុមហ៊ុនឱសថ Sanofi របស់ប្រទេស បារាំង បានឲ្យដឹងកាលពីថ្ងៃអង្គារថា ខ្លួននឹងធ្វើជាដៃគូជាមួយក្រុមហ៊ុន Google ដើម្បីប្រើប្រាស់បច្ចេកវិទ្យាបញ្ញាសិប្បនិម្មិត (AI) និងឧបករណ៍វិភាគស៊ីជម្រៅ ដើម្បីត្រួតពិនិត្យមើលដោយយកចិត្តទុកដាក់លើទិន្នន័យរបស់ខ្លួន ក្នុងការស្វែងរកការព្យាបាលកាន់តែប្រសើរ។
ក្រុមហ៊ុនឱសថនេះបានឲ្យដឹងក្នុងសេចក្ដីប្រកាសព័ត៌មានមួយថា ក្រុមហ៊ុន Google ដែលឈានមុខគេខាងផ្នែកស្វែងរកអនឡាញមួយនេះ «នឹងប្រើប្រាស់បច្ចេកវិទ្យា និងការវិភាគលើមូលដ្ឋានទិន្នន័យពិភពលោកពិតដ៏ធំរបស់ក្រុមហ៊ុន Sanofi ដើម្បីយល់ដឹងកាន់តែប្រសើរថាតើអ្វីដែលជាការងារព្យាបាលសម្រាប់អ្នកជំងឺ»។
ការប្រើប្រាស់ឧបករណ៍របស់ក្រុមហ៊ុន Google សម្រាប់ការវិភាគស៊ីជម្រៅ ដោយការរៀបចំទិន្នន័យធំៗជាច្រើនដើម្បីធ្វើឲ្យមានការយល់ដឹងស៊ីជម្រៅ នឹងជួយក្រុមហ៊ុននេះយល់ដឹងកាន់តែប្រសើរអំពីជំងឺសំខាន់ៗ និងលទ្ធផលអ្នកជំងឺដើម្បីធ្វើឲ្យប្រសើរឡើងបន្ថែមទៀត។
Sanofi ក៏នឹងផ្លាស់ប្តូរកម្មវិធីអាជីវកម្មរបស់ខ្លួនមួយចំនួនទៅកាន់កម្មវិធីកុំព្យូទ័រខ្លោដរបស់ក្រុមហ៊ុន Google ផងដែរ និងប្រើប្រាស់បញ្ញាសិប្បនិម្មិតដើម្បីកែលម្អប្រតិបត្តិការ។
លោក Ameet Nathwani អនុប្រធានក្រុមហ៊ុន Sanofi បានថ្លែងថា៖ «ដោយរួមបញ្ចូលនវានុវត្តន៍ជីវសាស្ដ្រ និងទិន្នន័យវិទ្យាសាស្ដ្រ ជាមួយសមត្ថភាពឈានមុខគេផ្នែកឧស្សាហកម្មរបស់ក្រុមហ៊ុន Google រាប់ចាប់ពីកុំព្យូទ័រខ្លោដ រហូតដល់បញ្ញាសិប្បនិម្មិតដ៏ទំនើប យើងចង់ផ្ដល់ជូនប្រជាជននូវការត្រួតពិនិត្យកាន់តែច្រើនលើសុខភាពរបស់ពួកគេ និងបង្កើនល្បឿនការរកឃើញវិធីព្យាបាលថ្មីៗ»។
ក្រុមហ៊ុន Sanofi ដែលរកប្រាក់ចំណូលពីការលក់ចំនួន ៣៤,៥ ពាន់លានអឺរ៉ូ (៣៨,៨ ពាន់លានដុល្លារ) កាលពីឆ្នាំ ២០១៨ គឺជាក្រុមហ៊ុនផលិតដ៏ធំមួយខាងផ្នែកឱសថវ៉ាក់សាំង ឱសថព្យាបាលជំងឺទឹកនោមផ្អែម ឱសថព្យាបាលជំងឺមហារីក និងឱសថព្យាបាលជំងឺសរសៃឈាមបេះដូង។
ក្រុមហ៊ុន Sanofi មិនបានលើកឡើងពីតួលេខហិរញ្ញវត្ថុណាមួយ ដែលជាប់ទាក់ទងនឹងកិច្ចព្រមព្រៀងជាមួយក្រុមហ៊ុននោះទេ Google នោះទេ ប៉ុន្តែសហជីពកម្មករបារម្ភថា ក្រុមហ៊ុននេះអាចប្រកាសការកាត់បន្ថយផ្នែកស្រាវជ្រាវ និងការអភិវឌ្ឍនៅក្នុងកិច្ចប្រជុំដែលគ្រោងនឹងធ្វើឡើងនៅថ្ងៃពុធនេះ។
វាមិនមែនជាការសហការលើកដំបូងរបស់ក្រុមហ៊ុន Sanofi ជាមួយក្រុមហ៊ុន Alphabet ដែលជាក្រុមហ៊ុនមេរបស់ក្រុមហ៊ុន Google ទេ។
កាលពីខែមុន ក្រុមហ៊ុន Verily ដែលជាក្រុមហ៊ុនសុខភាពរបស់ក្រុមហ៊ុន Alphabet បានប្រកាសភាពជាដៃគូជាមួយក្រុមហ៊ុនឱសថចំនួន ៤ ដែលរួមទាំងក្រុមហ៊ុន Sanofi ផងដែរ ដើម្បីបង្កើនល្បឿនការសាកល្បងការព្យាបាលដោយប្រើប្រាស់បច្ចេកវិទ្យាឌីជីថល។
ក្រុមហ៊ុន Sanofi និងក្រុមហ៊ុន Verily ក៏បានបង្កើតក្រុមហ៊ុន Onduo ដែលជាការវិនិយោគរួមគ្នាផងដែរនៅឆ្នាំ ២០១៧ ដើម្បីអភិវឌ្ឍឧបករណ៍ដែអាចភ្ជាប់អ៊ីនធឺណិតបាន ដើម្បីបង្កើនប្រសិទ្ធភាពការព្យាបាលជំងឺទឹកនោមផ្អែម៕ AFP/LA