The Phnom Penh Post Search

Search form

Logo of Phnom Penh Post newspaper Phnom Penh Post - SAP សង្ឃឹម​ថា នឹង​ឡើង​ផ្សារហ៊ុន​ឆ្នាំ​ក្រោយ

SAP សង្ឃឹម​ថា នឹង​ឡើង​ផ្សារហ៊ុន​ឆ្នាំ​ក្រោយ

Content image - Phnom Penh Post

SAP សង្ឃឹម​ថា នឹង​ឡើង​ផ្សារហ៊ុន​ឆ្នាំ​ក្រោយ

ភ្នំពេញៈ កំពង់ផែ​ស្វយ័ត​ក្រុង​ព្រះសីហនុ​ (SAP)​ ជា​សហគ្រាស​មួយ​ក្នុង​ចំណោម​សហគ្រាស​រដ្ឋ​ទាំង​បី​សង្ឃឹម​ថា​នឹង​ចុះបញ្ជី​លើ​ផ្សារហ៊ុន ខែ​មិថុនា ឆ្នាំ​២០១៥ បន្ទាប់ពី​យឺតយ៉ាវ​ពី​ផែនការ​ឡើង​ផ្សារហ៊ុន​កាលពី​៣​ឆ្នាំ​មុន​។ នេះ​បើ​តាម​មន្ត្រី​កំពង់ផែ។

រដ្ឋាភិបាល​គ្រោង​នឹង​ចុះ​បញ្ជី​សហគ្រាស​រដ្ឋ​ចំនួន​៣ គឺ​កំពង់ផែ​ស្វយ័ត​ក្រុង​ព្រះសីហនុ (SAP) និង​ក្រុមហ៊ុន​ទូរគមនាគមន៍​កម្ពុជា​(TC) ខណៈ​រដ្ឋករទឹក​ស្វយ័ត​ក្រុង​ភ្នំពេញ​(PPWSA)​ជា​សហគ្រាស​រដ្ឋ​មុន​គេ​ដែល​ឡើង​ផ្សារហ៊ុន​។

លោក លូ គឹមឈុន អគ្គនាយក​កំពង់ផែ​នេះ​បាន​ថ្លែង​ថា គម្រោង​បោះផ្សាយ​មូលបត្រ​លក់​ជា​លើក​ដំបូង (IPO) កំពុង​មាន​ដំណើរការ​រលូន និង​កំពុង​រង់ចាំ​ការ​វាយតម្លៃ​ចុងក្រោយ​ដោយ​គណនីករ​ឯករាជ្យ​សម្រាប់​ឆ្នាំ​ក្រោយ​។

លោក​បន្ត​ថា៖ «​យើង​យឺត​បន្តិច​ដោយសារ​តែ​អាជីវកម្ម​របស់​យើង​ខាតបង់​ក្នុង​រយៈពេល​កាលពី​ប៉ុន្មាន​ឆ្នាំ​មុន​ដោយសារ​តែ​តម្រូវការ​ត្រូវ​ចុះ​បញ្ជី​ទាមទារ​ឲ្យ​យើង​មាន​ប្រាក់​ចំណេញ​រយៈពេល​៣​ឆ្នាំ។ ពេល​នេះ​យើង​មាន​ភាព​ល្អ​ប្រសើរ​ហើយ​»​។

លោក​ថ្លែង​ថា កាលពី​ឆ្នាំ​២០១០ និង ២០១១ កំពង់ផែ​នេះ​បាន​ខាតបង់​ប្រាក់​ដោយសារ​អត្រា​ការប្រាក់​ប្រែប្រួល​រវាង​តម្លៃ​ប្រាក់​ដុល្លារ និង​តម្លៃ​ប្រាក់​យ៉េន ព្រោះ​តែ​វា​ដល់​ពេល​ត្រូវ​សង​បំណុល​ដែល​កំពង់ផែ​ជំពាក់​រដ្ឋាភិបាល​ជប៉ុន​។

លោក​បន្ត​ថា៖ «​ការ​ចាប់ផ្ដើម​ពី ២០១២ ឆ្នាំ​២០១៣ និង​ឆ្នាំ​២០១៤ យើង​ទទួល​បាន​ប្រាក់ចំណេញ​មក​វិញ​ដោយសារ​តែ​អត្រា​ការប្រាក់​របស់​តម្លៃ​ប្រាក់​យ៉េន​គឺ​ល្អ​។ ខ្ញុំ​ពិតជា​សង្ឃឹម​ថា យើង​នៅ​តែ​ទទួល​បាន​ប្រាក់ចំណេញ​សម្រាប់​ឆ្នាំ​ក្រោយ​ដូច្នេះ​វា​ត្រួសត្រាយ​ផ្លូវ​សម្រាប់​ពួកយើង​ក្នុង​ការ​ចុះ​បញ្ជី​នៅ​ពាក់កណ្ដាល​ឆ្នាំ​ក្រោយ»​។

លោក​បញ្ជាក់​ថា៖ «​ដោយសារ​យើង​ធ្វើការ​វាយតម្លៃ​ប្រតិបត្តិការ​អាជីវកម្ម​របស់​យើង​ម្តង​ទៀត​នៅ​ឆ្នាំ​ក្រោយ ខ្ញុំ​គិត​ថា​យើង​នឹង​ត្រៀម​ខ្លួន​រួចរាល់​សម្រាប់​ផ្សារហ៊ុន ទោះបី​ជា​យើង​មិន​បាន​ដាក់​ឯកសារ​ណា​មួយ​ទៅ​គណៈកម្មការ​មូលបត្រ ឬ ផ្សារហ៊ុន​ក៏ដោយ តែ​ពួកគេ​បាន​ដឹង​គ្នា​រួច​ហើយ​អំពី​ឯកសារ​របស់​យើង (​បរិយាយ​បណ្ណ)»។

លោក​បាន​ថ្លែង​ថា កំពង់ផែ​របស់​លោក​អាច​រក​ចំណូល​បាន​ក្នុង​រង្វង់​ពី​៣​លាន​ទៅ​៤​លាន​ដុល្លារ​អាមេរិក​ក្នុង​មួយ​ឆ្នាំ​។

SAP បាន​ទទួល​កម្ចី​ពី​រដ្ឋាភិបាល​ជប៉ុន​ចំនួន​ ៧៧​ លាន​ដុល្លារ​អាមេរិក​កាលពី​ឆ្នាំ​ ២០០៤ សម្រាប់​អភិវឌ្ឍ​កំពង់ផែ​ដែល​មាន​ពីរ​ដំណាក់កាល និង​ទទួល​បាន​ទឹកប្រាក់​​៣៦​​លាន​ដុល្លារ​អាមេរិក​ផ្សេង​ទៀត​សម្រាប់​ការ​សាងសង់​តំបន់​សេដ្ឋកិច្ច​ពិសេស​ដែល​បាន​ចុះហត្ថលេខា​កាលពី​ឆ្នាំ​ ២០០៩ និង​ទឹកប្រាក់​ ៨០​ លាន​ដុល្លារ​អាមេរិក​ផ្សេង​ទៀត​សម្រាប់​ការ​សាងសង់​ស្ថានីយ​ពហុ​បំណង​ដែល​ត្រូវ​រំពឹង​ថា នឹង​ត្រូវ​បញ្ចប់​នៅ​ឆ្នាំ​ ២០១៧ ជាមួយ​នឹង​អត្រា​ការប្រាក់​ទាប​បំផុត​ចំនួន​ ០,០១​ ភាគរយ​។

ដំណើរការ​យឺត​របស់​ផ្សារ​នេះ​នឹង​ជា​ហេតុផល​ដែល​ក្រុមហ៊ុន​រដ្ឋ​មួយ​ចំនួន​ផ្សេង​ទៀត​ពន្យារពេល​ចុះ​បញ្ជី​លើ​ផ្សារហ៊ុន​របស់​ខ្លួន​។ នេះ​បើ​យោង​តាម​លោក ល្មុន សូឡី អនុប្រធាន​នាយកដ្ឋាន​ប្រតិបត្តិការ​ទីផ្សារ​របស់​ផ្សារ​មូលបត្រ​កម្ពុជា (CSX)​។

លោក​លើក​ឡើង​ថា៖​«វិនិយោគិន​មួយ​ចំនួន​ទំនង​ជា​មិន​ទុក​ចិត្ត​លើ​សហគ្រាស​រដ្ឋ​ដូច​ដែល​អ្នក​បាន​លើក​ឡើង​នោះ​ទេ ប៉ុន្តែ​វិនិយោគិន​ជាច្រើន​ជឿជាក់​នៅ​ស្ថិរភាព​កំណើន​របស់​ពួកគេ​»។

លោក​បញ្ជាក់​ថា៖​ «បើ​លោក​អគ្គនាយក​កំពង់ផែ​ក្រុង​ព្រះសីហនុ​បាន​និយាយ​ថា កំពង់ផែ​នេះ​ត្រៀម​ខ្លួន​រួច​ស្រេច​នៅ​ពាក់កណ្ដាល​ឆ្នាំ​ក្រោយ យើង​មាន​សេចក្ដី​សប្បាយ​រីករាយ​ជាខ្លាំង និង​បាន​ត្រៀម​ខ្លួន​ធ្វើ​ការងារ​ជាមួយ​ពួកគេ»។

លោក​ថ្លែង​ថា​៖ «ប៉ុន្តែ​ពិត​ហើយ​ដំណើរការ​អាជីវកម្ម​របស់​ពួកគេ​កំណត់​ពី​ជោគជ័យ​នៃ​ការ​ចុះ​បញ្ជី​លើ​ផ្សារហ៊ុន​របស់​ពួកគេ​។ ប៉ុន្តែ​ខ្ញុំ​ជឿជាក់​ថា ក្រុមហ៊ុន​ចុះ​បញ្ជី​មាន​សក្ដានុពល​របស់​យើង​ដែល​បាន​គ្រោង​នឹង​ចុះបញ្ជី​មិន​បារម្ភ​អំពី​បញ្ហា​នេះ​ទេ​»​។

លោក គឺម ឈុន មិន​បារម្ភ​ជាមួយ​នឹង​ការ​ចុះបញ្ជី​របស់​ក្រុមហ៊ុន​លោក​លើ​ផ្សារហ៊ុន​នោះ​ទេ។

លោក​បន្ត​ថា៖ «​ខ្ញុំ​គិត​ថា ផ្សារហ៊ុន​ពិត​ណាស់​គឺ​ថ្មី​សម្រាប់​ប្រជាជន​យើង​ដែល​ពួកគាត់​មិន​មាន​បទពិសោធ​ខាង​ផ្សារហ៊ុន​នេះ​»។

លោក​បន្ថែម​ថា​៖ «ខ្ញុំ​គិត​ថា​យើង​មិន​មាន​បញ្ហា​ណា​មួយ​ជាមួយ​ភាគហ៊ុន​របស់​យើង​នៅពេល​យើង​បាន​ចុះបញ្ជី​លើ​ផ្សារហ៊ុន​នោះ​ទេ ដោយសារ​វា​កំពុង​បង្ហាញ​ថា ការ​ចូលរួម​របស់​យើង​នឹង​ផ្ដល់​ឱកាស​កាន់តែ​ច្រើន​ដល់​ប្រជាជន​របស់​យើង​អាច​វិនិយោគ​ទឹកប្រាក់​របស់​ខ្លួន​លើ​ការ​ទិញ​ភាគហ៊ុន​របស់​យើង​ដែល​ល្អ​ប្រសើរ​ជាង​ការ​ទុក​ប្រាក់​នៅ​លំនៅឋាន​»។

ផ្សារហ៊ុន​បិទ​ក្នុង​សន្ទស្សន៍ ៤៣៥ ពិន្ទុ​កាលពី​ម្សិលមិញ ជាមួយ​នឹង​ទំហំ​នៃ​ការ​ជួញដូរ​សរុប​ចំនួន ៦ ៣២៩ ហ៊ុន​។ ក្នុង​នោះ​ដែរ តម្លៃ​របស់ PPWSA បិទ​ក្នុង​តម្លៃ ៤៤០០ រៀល ក្នុង​មួយ​ហ៊ុន​ជាមួយ​នឹង​ទំហំ​នៃ​ការ​ជួញដូរ​ចំនួន ៤ ៦៣៩ ហ៊ុន ចំណែក​តម្លៃ​របស់​ក្រុមហ៊ុន Grand Twins បិទ​ក្នុង​តម្លៃ ៧ ០០០ រៀល​ក្នុង​មួយ​ហ៊ុន​ជាមួយ​នឹង​ទំហំ​នៃ​ការ​ជួញដូរ ១ ៦៩០​ហ៊ុន​៕PB

អត្ថបទគួរចាប់អារម្មណ៍