ភ្នំពេញៈ ទីប្រឹក្សាអាជីវកម្មបង្កើតថ្មីកម្ពុជា (Cambodia Startup Advisers) បានប្រកាសពីការដំណើរការសម្ព័ន្ធសេវាអាជីពលើកដំបូង ដើម្បីគាំទ្រឧស្សាហកម្មក្រុមហ៊ុនបង្កើតថ្មីបច្ចេកវិទ្យា ដែលរីកចម្រើនយ៉ាងរហ័សនៅកម្ពុជា។ នេះបើយោងតាមសេចក្ដីប្រកាសព័ត៌មាន។
សម្ព័ន្ធរបស់ក្រុមហ៊ុនប្រឹក្សាដែលបង្កើតឡើងនេះនឹងផ្ដល់នវានុវត្តន៍ និងការគិតឆ្ពោះទៅមុខផ្នែកច្បាប់ពន្ធ និងដំណោះស្រាយកម្មសិទ្ធិបញ្ញាចំពោះក្រុមហ៊ុនបង្កើតថ្មីកម្ពុជា និងក្រុមវិនិយោគិនរបស់ពួកគេ។
លោកស្រី ចាំង ស្រីពៅ មេធាវីនៅក្រុមហ៊ុន Law and Managing Partner នៃសមាគមសមាជិកសម្ព័ន្ធ CSP & Associates បានថ្លែងថា៖ «ការបង្កើតក្រុមហ៊ុនបង្កើតថ្មីប្រកបដោយជោគជ័យមានការពិបាក។ ស្ថាបនិកមានបញ្ជីច្រើនត្រូវធ្វើគឺ ចាប់ពីការបង្កើតក្រុមហ៊ុនមួយ ដល់ការជួលបុគ្គលិក ការបង់ពន្ធ និងការចុះបញ្ជីពាណិជ្ជសញ្ញា»។
ក្រុមហ៊ុនបង្កើតថ្មីនៅកម្ពុជានៅក្នុងវិស័យបច្ចេកវិទ្យា វិស័យពាណិជ្ជកម្ម វិស័យឡូជីស្ទិក វិស័យប្រព័ន្ធព័ត៌មានឌីជីថល និងវិស័យផ្សេងទៀតមានជាង ១០០ ត្រូវបានបង្កើតឡើងក្នុងរយៈពេលជាច្រើនខែថ្មីៗនេះ។ នេះបើយោងតាម Startup Advisers។
លោក David Haskel នាយកក្រុមហ៊ុន Cambodia Startup Advisers និងសមាជិកសម្ព័ន្ធ Abacus IP ថ្លែងថា៖ «អេកូស៊ីស្ដែមក្រុមហ៊ុនបង្កើតថ្មីកម្ពុជា ក្មេងខ្ចីណាស់ តែរីកចម្រើនរហ័ស»។ លោកបន្តថា៖ «តាមរយៈសម្ព័ន្ធនេះ យើងសង្ឃឹមថា នឹងគាំទ្រក្រុមហ៊ុនមានមូលដ្ឋានលើបច្ចេកវិទ្យាឲ្យសម្រេចបានសក្ដានុពលពេញលេញរបស់ពួកគេ»។
ការអង្កេតនៅពេលថ្មីបង្ហាញថា ជាង ៦០ ភាគរយនៃស្ថាបនិកបានឲ្យដឹងថា ព័ត៌មានស្ដីពីច្បាប់ និងការប្រឹក្សាពន្ធសម្រាប់ក្រុមហ៊ុនបង្កើតថ្មី មានការពិបាក ឬមិនអាចទទួលបាន។ នេះបើតាមសេចក្ដីប្រកាសព័ត៌មាននេះ។ លើសពីនេះ កង្វះសេវាពាណិជ្ជកម្មគ្រប់គ្រាន់សម្រាប់ក្រុមហ៊ុនបង្កើតថ្មី ត្រូវបានបញ្ជាក់ដោយធនាគារពិភពលោកផងដែរ ថាជាការរារាំងមួយដល់សហគ្រិនភាពនៅកម្ពុជា៕LA