.jpg)
ក្រុមកម្មករកំពុងសង់សំណង់ដ៏ធំមួយក្នុងរាជធានីភ្នំពេញ។ ហេង ជីវ័ន
ភ្នំពេញៈ ក្រុមហ៊ុន Siam Cement Group (SCG) ជាក្រុមហ៊ុនផលិតសម្ភារសំណង់ចុះបញ្ជីនៅប្រទេសថៃកាលពីថ្ងៃចន្ទបានរាយការណ៍នូវកំណើនវិជ្ជមាននៃអាជីវកម្មរបស់ខ្លួននៅទីផ្សារប្រទេសកម្ពុជាក្នុងឆមាសទី ១ នៃឆ្នាំនេះ ទោះបីការរីករាលដាលជំងឺកូវីដ១៩ ប៉ះពាល់ធ្ងន់ធ្ងរដល់សេដ្ឋកិច្ច។
យោងតាមលទ្ធផលហិរញ្ញវត្ថុដែលបានចេញផ្សាយ ក្រុមហ៊ុន SCG នៅកម្ពុជាគ្រប់គ្រងទ្រព្យសកម្មមានតម្លៃសរុប ៣៨២ លានដុល្លារអាមេរិកកើនឡើង ២ ភាគរយធៀបនឹងរយៈពេលដូចគ្នាកាលពីឆ្នាំមុន។ សម្រាប់រយៈពេលឆមាសទី ១ នៃឆ្នាំនេះ ក្រុមហ៊ុន SCG នៅកម្ពុជាសម្រេចបានចំណូលពីការលក់ចំនួន ១២៩,៣៩ លានដុល្លារអាមេរិក ដែលកើនឡើង ០,២ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ប៉ុន្តែប្រាក់ចំណូលត្រីមាសទី ២ ឆ្នាំ ២០២០ បង្ហាញពីការធ្លាក់ចុះច្រើនរហូតដល់ ៦ ភាគរយធៀបនឹងត្រីមាសទី ២ នៃឆ្នាំមុនដោយការលក់សម្រេចតែចំនួន ៦២,៤៨ លានដុល្លារក្នុងនោះរាប់បញ្ចូលទាំងចំណូលលក់អាជីវកម្មផលិតស៊ីម៉ងត៍ និងអាជីវកម្មលក់គ្រឿងសំណង់។
របាយការណ៍បានឲ្យដឹងថា សេដ្ឋកិច្ចប្រទេសកម្ពុជាបន្តរងផលប៉ះពាល់ ដោយសារតែការផ្ទុះឡើងនៃជំងឺឆ្លងកូវីដ១៩ និងប្រឈមនឹងការធ្លាក់ចុះយ៉ាងខ្លាំងគួរឲ្យកត់សម្គាល់។ ប៉ុន្តែទោះជាយ៉ាងនេះក្ដី ដើម្បីចាប់យកឱកាសទីផ្សារ និងផ្ដល់សេវាកម្មដែលបំពេញតម្រូវការរបស់អតិថិជនក្នុងអំឡុងកូវីដ ១៩ ក្រុមហ៊ុនបានចរាចរផលិតផលថ្មីមួយនៅទីផ្សារគឺក្បឿងខៀវការ៉ាត់ជាផលិតផលដែលកើតចេញពីបញ្ហា និងតម្រូវការរបស់អតិថិជនទាក់ទងនឹងការរចនា និងតម្លៃ។
លោក RoongroteRangsiyopash ប្រធាន និងជានាយកប្រតិបត្តិរបស់ក្រុមហ៊ុនបានថ្លែងថា៖ «ក្នុងអំឡុងពេលនៃវិបត្តិកូវីដ ១៩ ទោះបីក្រុមហ៊ុន SCG មិនស្ថិតក្នុងវិស័យដែលរងផលប៉ះពាល់ធ្ងន់ធ្ងរ ដូចវិស័យទេសចរណ៍ ឬអាកាសចរណ៍ក្ដី ក្រុមហ៊ុនបានតាមដាន និងវាយតម្លៃស្ថានការណ៍ជាប់ជាប្រចាំ ដើម្បីគ្រប់គ្រងស្ថានការណ៍បាននៅក្នុងបរិយាកាសមួយដែលពោរពេញទៅដោយភាពមិនច្បាស់លាស់»។
ទិន្នន័យបានពីក្រសួងពាណិជ្ជកម្មបង្ហាញថា ប្រទេសកម្ពុជាបាននាំចូលគ្រឿងសំណង់ ៨៧៩ ៣៩៤ តោនមានតម្លៃ ៣១៧,៧៤ លានដុល្លារ នៅត្រីមាសទី ១ ឆ្នាំនេះដោយក្នុងនោះការនាំចូលដែកថែបមានចំនួន ១០០ ៤៤០ តោនដែលមានតម្លៃ ៦៦,៨៣ លានដុល្លារ ស៊ីម៉ងត៍ចំនួន ៣៨៤ ៦០៩ តោន មានតម្លៃ ២៤,៥៧ លានដុល្លារ និងឧបករណ៍សំណង់ ៣៩៤ ៣៤៦ តោន មានតម្លៃ ២២៦, ៣៤ លានដុល្លារ។
កាលពីឆ្នាំ ២០១៨ កម្ពុជាបាននាំចូលគ្រឿងសំណង់គ្រប់ប្រភេទចំនួន ៤ ៦៦៧ ០៧៧ តោន មានតម្លៃ ១,៧០ ពាន់លានដុល្លារកាលពីឆ្នាំមុន កើនឡើងពី ៣ ១៨១ ១៤២ តោន មានតម្លៃ ១,០៧ ពាន់លានដុល្លារ៕ LA
